ବୈଭବଙ୍କୁ ନେଇ ବଢ଼ିଲା ସସପେନ୍ସ!

ଟିମ୍ ଇଣ୍ଡିଆର ଯୁବ ଧୂଆଁଧାର ବ୍ୟାଟର ବୈଭବ ସୂର୍ଯ୍ୟବଂଶୀଙ୍କୁ ନେଇ ଆସିଛି ବଡ଼ ଖବର। ଦୁଲୀପ୍ ଟ୍ରଫି ୨୦୨୬ର ଫାଇନାଲରେ ଖେଳିବାକୁ ନେଇ ବୈଭବଙ୍କ ସ୍ଥିତି ଏବେ ଅନିଶ୍ଚିତ। କେବଳ ବୈଭବ ନୁହଁନ୍ତି, ଭାରତୀୟ ଦଳର ଦୁଇ ଷ୍ଟାର ଖେଳାଳି ଇଶାନ କିଶନ ଏବଂ ତିଲକ ବର୍ମାଙ୍କ ଖେଳିବା ନେଇ ମଧ୍ୟ ଦ୍ୱନ୍ଦ୍ୱ ରହିଛି।

ବୈଭବ ସୂର୍ଯ୍ୟବଂଶୀ ପୂର୍ବ ଜୋନ୍ ପାଇଁ ଚଳିତ ଦୁଲୀପ୍ ଟ୍ରଫିରେ ଦମଦାର ପ୍ରଦର୍ଶନ କରିଛନ୍ତି। ସେମିଫାଇନାଲର ପ୍ରଥମ ଇନିଂସରେ ୯୨ ରନ୍ ଏବଂ ଦ୍ୱିତୀୟ ଇନିଂସରେ ୪୦ ରନ୍ କରି ଦଳକୁ ଫାଇନାଲରେ ପହଞ୍ଚାଇବାରେ ବଡ଼ ଭୂମିକା ନେଇଛନ୍ତି।ଏବେ ତାଙ୍କ ଦଳ ଫାଇନାଲରେ ଦକ୍ଷିଣ ଜୋନ୍‌କୁ ଭେଟିବ। ମ୍ୟାଚ୍‌ଟି ସେପ୍ଟେମ୍ବର ୬ରୁ ଚେନ୍ନାଇର ଏମ୍‌.ଏ. ଚିଦାମ୍ବରମ୍ ଷ୍ଟାଡିୟମରେ ଖେଳାଯିବ।

ତେବେ ସମସ୍ୟା ହେଉଛି ଆଗକୁ ଆସୁଥିବା ଭାରତ-ଆଫଗାନିସ୍ତାନ ଟି-୨୦ ସିରିଜ୍। ସେପ୍ଟେମ୍ବର ୧୩ରୁ ଏହି ସିରିଜ୍ ଆରମ୍ଭ ହେବ। ବୈଭବ, ଇଶାନ ଏବଂ ତିଲକ ଭାରତୀୟ ଟି-୨୦ ଦଳର ଅଂଶ ଥିବାରୁ, ଦୁଲୀପ୍ ଟ୍ରଫି ଫାଇନାଲ୍ ଏବଂ ଟି-୨୦ ସିରିଜ୍ ମଧ୍ୟରେ ବିଶେଷ ଅଧିକ ସମୟ ନାହିଁ। ରିପୋର୍ଟ ଅନୁଯାୟୀ, ଭାରତୀୟ ଦଳ ସେପ୍ଟେମ୍ବର ୯ କିମ୍ବା ୧୦ରେ ଦିଲ୍ଲୀରେ ପହଞ୍ଚିପାରେ। ତେଣୁ ଏହି ତିନି ଖେଳାଳି ଦୁଲୀପ୍ ଟ୍ରଫି ଫାଇନାଲ୍ ଖେଳିବେ କି ନାହିଁ, ସେନେଇ ଚୂଡ଼ାନ୍ତ ନିଷ୍ପତ୍ତି ଟିମ୍ ଇଣ୍ଡିଆର ମୁଖ୍ୟ କୋଚ୍ ଗୌତମ ଗମ୍ଭୀର ନେବେ।

ଅନ୍ୟପଟେ ଦକ୍ଷିଣ ଜୋନ୍ ପାଇଁ ଏକ ବଡ଼ ଆଶ୍ୱସ୍ତି ହେଉଛି—କେଏଲ୍ ରାହୁଲ, ମହମ୍ମଦ ସିରାଜ ଏବଂ ଦେବଦତ୍ତ ପାଡିକ୍କଲ୍ ଫାଇନାଲ୍ ଖେଳିବାର ସମ୍ଭାବନା ରହିଛି। ତେବେ ଫାଇନାଲ୍‌ରେ ବୈଭବ, ଇଶାନ ଏବଂ ତିଲକଙ୍କୁ ଦେଖିବାକୁ ମିଳିବ କି ନାହିଁ—ଏବେ ସମସ୍ତଙ୍କ ନଜର ଗମ୍ଭୀରଙ୍କ ନିଷ୍ପତ୍ତି ଉପରେ।