ସରକାରୀ ଚାକିରି ଆଶାୟୀଙ୍କ ପାଇଁ ବଡ଼ ଖବର, ୫ ବର୍ଷ ବଢ଼ିଲା ବୟସ ସୀମା!

ତାମିଲନାଡୁରେ ସରକାରୀ ଚାକିରି ଆଶାୟୀଙ୍କ ପାଇଁ ବଡ଼ ଆଶ୍ୱସ୍ତି। ଚାକିରି ପାଇଁ ପ୍ରସ୍ତୁତି କରୁଥିବା ଅନେକ ପ୍ରାର୍ଥୀଙ୍କ ଦୀର୍ଘଦିନର ଦାବିକୁ ଗୁରୁତ୍ୱ ଦେଇ ମୁଖ୍ୟମନ୍ତ୍ରୀ ସି. ଜୋସେଫ ବିଜୟ ସରକାରୀ ନିଯୁକ୍ତି ପାଇଁ ୫ ବର୍ଷର ଅତିରିକ୍ତ ବୟସ ଛାଡ଼ ଘୋଷଣା କରିଛନ୍ତି। ଅକ୍ଟୋବର ୩୦, ୨୦୨୬ରୁ ଏହି ନିଷ୍ପତ୍ତି ଲାଗୁ ହୋଇଛି ଏବଂ ଏହା ୫ ବର୍ଷ ପର୍ଯ୍ୟନ୍ତ କାର୍ଯ୍ୟକାରୀ ରହିବ।

ସରକାରୀ ପ୍ରେସ୍ ବିଜ୍ଞପ୍ତି ଅନୁଯାୟୀ, ପ୍ରତିଯୋଗିତାମୂଳକ ପରୀକ୍ଷା ଦେଉଥିବା ଚାକିରି ଆଶାୟୀଙ୍କ ଦାବିକୁ ଦୃଷ୍ଟିରେ ରଖି ଏହି ନିଷ୍ପତ୍ତି ନିଆଯାଇଛି। ନିଯୁକ୍ତି ପ୍ରକ୍ରିୟାରେ ବିଳମ୍ବ ଯୋଗୁଁ ଅନେକ ପ୍ରାର୍ଥୀଙ୍କ ବୟସ ସୀମା ଅତିକ୍ରମ କରିଯାଉଥିଲା। ଏହି ନୂଆ ନିଷ୍ପତ୍ତି ସେମାନଙ୍କୁ ସରକାରୀ ଚାକିରି ପାଇଁ ଆଉ ଏକ ସୁଯୋଗ ଦେବ।

ସରକାରଙ୍କ ପକ୍ଷରୁ ସ୍ପଷ୍ଟ କରାଯାଇଛି ଯେ, ଏହି ୫ ବର୍ଷର ଅତିରିକ୍ତ ବୟସ ଛାଡ଼ ପୂର୍ବରୁ ରହିଥିବା ନିୟମ ଓ ରିହାତି ସହିତ ଯୋଡ଼ି ହେବ। ଅର୍ଥାତ୍, ପଛୁଆ ବର୍ଗ, ଅତି ପଛୁଆ ବର୍ଗ, ଅନୁସୂଚିତ ଜାତି, ଅନୁସୂଚିତ ଜନଜାତି ଏବଂ ଅସହାୟ ବିଧବା ପ୍ରାର୍ଥୀଙ୍କୁ ମିଳୁଥିବା ପୂର୍ବ ରିହାତି ବ୍ୟତୀତ ଏହି ଅତିରିକ୍ତ ସୁବିଧା ମିଳିବ।

ଗ୍ରୁପ୍-୧ ପଦବୀ ପାଇଁ ସାଧାରଣ ବର୍ଗର ପ୍ରାର୍ଥୀଙ୍କ ସର୍ବାଧିକ ବୟସ ସୀମା ୩୨ରୁ ବଢ଼ି ୩୭ ବର୍ଷ ହୋଇଛି। ସଂରକ୍ଷିତ ବର୍ଗର ପ୍ରାର୍ଥୀଙ୍କ ପାଇଁ ଏହା ୩୭ରୁ ୪୨ ବର୍ଷକୁ ବୃଦ୍ଧି ପାଇଛି।

ସେହିପରି ଦିବ୍ୟାଙ୍ଗ ପ୍ରାର୍ଥୀଙ୍କ କ୍ଷେତ୍ରରେ ମଧ୍ୟ ଅତିରିକ୍ତ ୫ ବର୍ଷର ଛାଡ଼ ଲାଗୁ ହେବ। ସାଧାରଣ ବର୍ଗର ଦିବ୍ୟାଙ୍ଗ ପ୍ରାର୍ଥୀଙ୍କ ବୟସ ସୀମା ୪୨ରୁ ୪୭ ବର୍ଷ ଏବଂ ସଂରକ୍ଷିତ ବର୍ଗର ଦିବ୍ୟାଙ୍ଗ ପ୍ରାର୍ଥୀଙ୍କ ପାଇଁ ୪୭ରୁ ୫୨ ବର୍ଷ ହୋଇଛି।

ଗ୍ରୁପ୍-୨ ଓ ଗ୍ରୁପ୍-୨ଏ ପଦବୀ ପାଇଁ ସାଧାରଣ ବର୍ଗର ପ୍ରାର୍ଥୀଙ୍କ ସର୍ବାଧିକ ବୟସ ସୀମା ୩୦ରୁ ବଢ଼ି ୩୫ ବର୍ଷ ହୋଇଛି। ସଂରକ୍ଷିତ ବର୍ଗର ପ୍ରାର୍ଥୀଙ୍କ ପାଇଁ ପୂର୍ବରୁ ଉପର ବୟସ ସୀମା ନଥିବା ବ୍ୟବସ୍ଥା ଜାରି ରହିବ। ସାଧାରଣ ବର୍ଗର ଦିବ୍ୟାଙ୍ଗ ପ୍ରାର୍ଥୀଙ୍କ କ୍ଷେତ୍ରରେ ମଧ୍ୟ ବୟସ ସୀମା ୪୦ରୁ ୪୫ ବର୍ଷକୁ ବୃଦ୍ଧି ପାଇଛି।

ବୟସ ସୀମା ଅତିକ୍ରମ କରିଯିବା କାରଣରୁ ସରକାରୀ ଚାକିରି ପରୀକ୍ଷାରୁ ବାଦ୍ ପଡ଼ୁଥିବା ପ୍ରାର୍ଥୀଙ୍କ ପାଇଁ ଏହି ନିଷ୍ପତ୍ତି ଏକ ବଡ଼ ଆଶ୍ୱସ୍ତି ଆଣିଛି। ତେବେ ଗ୍ରୁପ୍-୪ ସମେତ ବିଭିନ୍ନ ପଦବୀ ପାଇଁ ପ୍ରକୃତ ବୟସ ସୀମା ଓ ଯୋଗ୍ୟତା ସମ୍ପର୍କିତ ସୂଚନା ଜାଣିବାକୁ ପ୍ରାର୍ଥୀମାନେ ସମ୍ପୃକ୍ତ ନିଯୁକ୍ତି ବିଜ୍ଞପ୍ତି ଯାଞ୍ଚ କରିବା ଆବଶ୍ୟକ।