By Rosalini 
ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କୁ ନେଇ ଦିଲ୍ଲୀରେ ପୁଣି ତେଜ ହୋଇଛି ରାଜନୈତିକ ତାତି। ଜ୍ଞାନେଶ କୁମାରଙ୍କ ବିରୋଧରେ ପ୍ରତିବାଦ ପାଇଁ ଆଜି ବିରୋଧୀ ଦଳର ସାଂସଦମାନେ ଜନ୍ତର-ମନ୍ତର ଅଭିମୁଖେ ଯାଉଛନ୍ତି। ଏହି ପ୍ରତିବାଦରେ ଲୋକସଭାର ବିରୋଧୀ ଦଳ ନେତା ରାହୁଲ ଗାନ୍ଧୀ ମଧ୍ୟ ସାମିଲ ହେବେ ବୋଲି କୁହାଯାଇଛି।
କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେଙ୍କ ଡାକରାରେ ଇଣ୍ଡିଆ ବ୍ଲକ୍ର ବିରୋଧୀ ସାଂସଦମାନେ ଦିଲ୍ଲୀର ଜନପଥସ୍ଥିତ ଏକ ରେଷ୍ଟୁରାଣ୍ଟରେ ଏକାଠି ହୋଇଥିଲେ। ଏହି ସ୍ଥାନ ଜନ୍ତର-ମନ୍ତରଠାରୁ ପ୍ରାୟ ୧୦୦ ମିଟର ଦୂରରେ ଥିବାରୁ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଥିଲା।
ଅଞ୍ଚଳରେ ବ୍ୟାପକ ପୁଲିସ ମୁତୟନ ସହ ବ୍ୟାରିକେଡିଂ କରାଯାଇଥିଲା। ରିପୋର୍ଟ ଅନୁସାରେ, ଏଠାରେ ଭାରତୀୟ ନ୍ୟାୟ ସଂହିତାର ଧାରା ୧୬୩ ଲାଗୁ କରାଯାଇଥିବା କୁହାଯାଇଛି।
ରାହୁଲ ଗାନ୍ଧୀ କହିଛନ୍ତି ଯେ ବିରୋଧୀ ସାଂସଦମାନେ ତିନିଜଣ ନିର୍ବାଚନ କମିଶନରଙ୍କୁ ଭେଟିବାକୁ ଚେଷ୍ଟା କରିଥିଲେ। କିନ୍ତୁ ସେମାନଙ୍କୁ ଭେଟିବା ପାଇଁ ଅନୁମତି ମିଳିନଥିବା ତାଙ୍କ ଦାବି।
ଏହାପରେ ଜନ୍ତର-ମନ୍ତରରେ ପ୍ରତିବାଦ ଓ ଧାରଣା ଦେବାକୁ ବିରୋଧୀ ନେତାମାନେ ନିଷ୍ପତ୍ତି ନେଇଥିବା ରାହୁଲ କହିଛନ୍ତି। ଏଥିସହ ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାର ଇସ୍ତଫା ଦେବା ଦରକାର ବୋଲି ସେ ଦାବି କରିଛନ୍ତି।
ଏପଟେ ଟିଏମସି ସାଂସଦ ଡେରେକ୍ ଓ’ବ୍ରାଏନ୍ ବିରୋଧୀ ଦଳଗୁଡ଼ିକ ଏହି ପ୍ରସଙ୍ଗରେ ଏକଜୁଟ ଥିବା କହିଛନ୍ତି। ନିର୍ବାଚନ ପ୍ରକ୍ରିୟା, ଭୋଟର ତାଲିକା ଓ ଏସଆଇଆର୍କୁ ନେଇ ବିରୋଧୀଙ୍କ ଅଭିଯୋଗ ମଧ୍ୟରେ ଏହି ପ୍ରତିବାଦ ରାଜନୈତିକ ଭାବେ ଗୁରୁତ୍ୱ ବହନ କରୁଛି।
ବିରୋଧୀଙ୍କ ପ୍ରତିବାଦକୁ ନେଇ ଦିଲ୍ଲୀ ପୁଲିସ ମଧ୍ୟ ସତର୍କ ରହିଛି। ଜନ୍ତର-ମନ୍ତର, କନାଟ୍ ପ୍ଲେସ୍ ଏବଂ ଏହାର ଆଖପାଖ ଅଞ୍ଚଳରେ ସୁରକ୍ଷା ବ୍ୟବସ୍ଥା ବଢ଼ାଯାଇଛି।
ଜ୍ଞାନେଶ କୁମାରଙ୍କ ବିରୋଧରେ ବିରୋଧୀଙ୍କ ଏହି ପ୍ରତିବାଦ ଆଗକୁ କେଉଁ ରୂପ ନେଉଛି ଏବଂ ଏହାକୁ ନେଇ ରାଜନୈତିକ ବିବାଦ କେତେ ତୀବ୍ର ହେଉଛି, ତାହା ଉପରେ ଏବେ ସମସ୍ତଙ୍କ ନଜର।