By Rosalini 
କ୍ୟାନସର ଭଳି ଗୁରୁତର ରୋଗର ଜୀବନରକ୍ଷକ ଔଷଧର ମୂଲ୍ୟକୁ ନେଇ ସୁପ୍ରିମକୋର୍ଟ କଡ଼ା ଟିପ୍ପଣୀ ଦେଇଛନ୍ତି। ଖୁଚୁରା ବିକ୍ରେତାଙ୍କୁ ₹୨,୭୦୦ରେ ମିଳୁଥିବା ଏକ କ୍ୟାନସର ଔଷଧର MRP ₹୨୭,୦୦୦ ରହିବା ନେଇ ଦୁଇ ଜଣିଆ ଖଣ୍ଡପୀଠ ଗୁରୁତର ପ୍ରଶ୍ନ ଉଠାଇଛନ୍ତି। ଜଷ୍ଟିସ ବିକ୍ରମ ନାଥ ଓ ଜଷ୍ଟିସ ସନ୍ଦୀପ ମେହତାଙ୍କ ଖଣ୍ଡପୀଠ ଏଭଳି ୧୦ ଗୁଣ ମୂଲ୍ୟ ତଫାତକୁ ରୋଗୀଙ୍କ ପାଇଁ ‘ଦିନ ଦ୍ୱିପହରେ ଡକାୟତି’ ସଦୃଶ ବୋଲି ମନ୍ତବ୍ୟ ଦେଇଛନ୍ତି।
ସୁପ୍ରିମକୋର୍ଟ ପ୍ରଶ୍ନ କରିଛନ୍ତି, ଯେତେବେଳେ ଏକ ଔଷଧ ଖୁଚୁରା ବିକ୍ରେତାଙ୍କୁ ₹୨,୭୦୦ରେ ଯୋଗାଇ ଦିଆଯାଉଛି, ସେତେବେଳେ ତାହାର MRP ₹୨୭,୦୦୦ କାହିଁକି ରହିବ? ଔଷଧ ମୂଲ୍ୟ ନିୟନ୍ତ୍ରଣ ଓ ରୋଗୀଙ୍କ ସୁରକ୍ଷା ପାଇଁ ଦାୟୀ କର୍ତ୍ତୃପକ୍ଷଙ୍କ ଭୂମିକା ନେଇ ମଧ୍ୟ ଖଣ୍ଡପୀଠ ପ୍ରଶ୍ନ ଉଠାଇଛନ୍ତି।
ମାମଲାର ଶୁଣାଣି ସମୟରେ ସରକାରୀ ସ୍ୱାସ୍ଥ୍ୟ ଯୋଜନା ଅଧୀନରେ ଔଷଧ ଖର୍ଚ୍ଚର ରିଇମ୍ବର୍ସମେଣ୍ଟ ପ୍ରସଙ୍ଗ ମଧ୍ୟ ଉଠିଥିଲା। କୋର୍ଟଙ୍କ ମତରେ, ଅତ୍ୟଧିକ ମୂଲ୍ୟରେ ଔଷଧ କିଣାଯାଇ ସରକାରୀ ଯୋଜନାରୁ ରିଇମ୍ବର୍ସମେଣ୍ଟ ନିଆଯାଇଲେ ତାହାର ଆର୍ଥିକ ଭାର ଶେଷରେ ସରକାରୀ ଅର୍ଥ ଉପରେ ପଡ଼େ।
ଏହି ଶୁଣାଣିରେ ଜେନେରିକ୍ ଔଷଧର ବ୍ୟବହାର, ଜୀବନରକ୍ଷକ ଔଷଧର ମୂଲ୍ୟ ନିୟନ୍ତ୍ରଣ ଏବଂ MRP ଓ Price to Retailer (PTR) ମଧ୍ୟରେ ଥିବା ବଡ଼ ତଫାତ ଭଳି ପ୍ରସଙ୍ଗ ଉପରେ ମଧ୍ୟ ଆଲୋଚନା ହୋଇଛି।
କେନ୍ଦ୍ର ସରକାରଙ୍କ ପକ୍ଷରୁ ମଧ୍ୟ ଔଷଧକୁ ସାଧାରଣ ଲୋକଙ୍କ ପାଖରେ ସୁଲଭ ମୂଲ୍ୟରେ ପହଞ୍ଚାଇବା ପାଇଁ ସୁଧାରର ସମ୍ଭାବନା ଉପରେ କାମ କରିବାର ଆଶ୍ୱାସନ ଦିଆଯାଇଛି। ମାମଲାର ପରବର୍ତ୍ତୀ ଶୁଣାଣି ସେପ୍ଟେମ୍ବର ୨୯ରେ ହେବାକୁ ରହିଛି।