By Rosalini 
ନୂଆଦିଲ୍ଲୀ: ଋଣ ନେଇଥିବା ଗ୍ରାହକଙ୍କ ପାଇଁ ଆସିଛି ବଡ଼ ଖବର। ରେପୋ ରେଟ୍ରେ ବୃଦ୍ଧି କରିଛି ଭାରତୀୟ ରିଜର୍ଭ ବ୍ୟାଙ୍କ୍ (RBI)। ପୂର୍ବରୁ ୫.୨୫ ପ୍ରତିଶତରେ ସ୍ଥିର ଥିବା ରେପୋ ରେଟ୍କୁ ବଢ଼ାଇ ୫.୫୦ ପ୍ରତିଶତ କରାଯାଇଛି। ଏହି ନିଷ୍ପତ୍ତି ପରେ ଗୃହ ଋଣ ଓ କାର୍ ଋଣ ନେଇଥିବା ଲୋକଙ୍କ EMI ବୋଝ ବଢ଼ିପାରେ ବୋଲି ଅର୍ଥନୀତି ବିଶେଷଜ୍ଞମାନେ ଆକଳନ କରୁଛନ୍ତି।
ଆର୍ବିଆଇର ତିନି ଦିନିଆ ମୁଦ୍ରାନୀତି ବୈଠକରେ ବିଭିନ୍ନ ଆର୍ଥିକ ପ୍ରସଙ୍ଗ ଉପରେ ଆଲୋଚନା ପରେ ରେପୋ ରେଟ୍ ବଢ଼ାଇବା ନିଷ୍ପତ୍ତି ନିଆଯାଇଛି। ଆର୍ବିଆଇ ଗଭର୍ଣ୍ଣର ସଞ୍ଜୟ ମାଲହୋତ୍ରା ଏହି ନିଷ୍ପତ୍ତି ସମ୍ପର୍କରେ ସୂଚନା ଦେଇଛନ୍ତି।
ବିଶ୍ୱସ୍ତରରେ ମୁଦ୍ରାସ୍ଫୀତି ବଢ଼ିବାର ଆଶଙ୍କା ଏବଂ ସେୟାର ବଜାରରେ ଅନିଶ୍ଚିତତା ଭଳି ବିଭିନ୍ନ ଆର୍ଥିକ ଚାପ ଉପରେ ନଜର ରଖିଛି କେନ୍ଦ୍ରୀୟ ବ୍ୟାଙ୍କ। ଏହାସହ ଅଶୋଧିତ ତୈଳ ମୂଲ୍ୟ ବୃଦ୍ଧି ଓ ମୁଦ୍ରାସ୍ଫୀତିକୁ ନେଇ ମଧ୍ୟ ଚିନ୍ତା ପ୍ରକାଶ ପାଇଛି।
ରେପୋ ରେଟ୍ ହେଉଛି ସେହି ସୁଧ ହାର, ଯେଉଁଥିରେ ଆର୍ବିଆଇ ବ୍ୟାଙ୍କଗୁଡ଼ିକୁ ସ୍ୱଳ୍ପ ସମୟ ପାଇଁ ଋଣ ପ୍ରଦାନ କରେ। ରେପୋ ରେଟ୍ ବଢ଼ିଲେ ବ୍ୟାଙ୍କଗୁଡ଼ିକର ଋଣ ନେବା ଖର୍ଚ୍ଚ ବଢ଼ିପାରେ। ଏହାର ପ୍ରଭାବରେ ବ୍ୟାଙ୍କଗୁଡ଼ିକ ଋଣର ସୁଧ ହାର ବଢ଼ାଇପାରନ୍ତି।
ଫଳରେ ଗୃହ ଋଣ, କାର୍ ଋଣ ଏବଂ ଅନ୍ୟାନ୍ୟ ଫ୍ଲୋଟିଂ ରେଟ୍ ଋଣ ନେଇଥିବା ଗ୍ରାହକଙ୍କ EMI ବଢ଼ିବାର ସମ୍ଭାବନା ରହିଛି। ଅର୍ଥାତ୍, ଆଗାମୀ ଦିନରେ ଋଣଗ୍ରହୀତାଙ୍କ ମାସିକ ଆର୍ଥିକ ବୋଝ ବଢ଼ିପାରେ।
ରେପୋ ରେଟ୍ ବୃଦ୍ଧିର ସିଧାସଳଖ ପ୍ରଭାବ ବ୍ୟାଙ୍କ ଋଣ ଉପରେ ପଡ଼ିପାରେ। ବିଶେଷକରି ଦୀର୍ଘମିଆଦୀ ଗୃହ ଋଣ ନେଇଥିବା ଗ୍ରାହକଙ୍କ ପାଇଁ ସୁଧ ହାର ବୃଦ୍ଧି ଅତିରିକ୍ତ EMI ବୋଝ ସୃଷ୍ଟି କରିପାରେ। ତେଣୁ ରେପୋ ରେଟ୍ର ଏହି ପରିବର୍ତ୍ତନ ଉପରେ ଋଣଗ୍ରହୀତାଙ୍କ ନଜର ରହିଛି।