ବାତ୍ୟା ପରେ ଓଡ଼ିଶାରେ ବନ୍ୟା ଆଶଙ୍କା! ୩ ନଦୀରେ ବିପଦ ସଂକେତ ଟପିଲା ଜଳସ୍ତର, ନଦୀକୂଳିଆ ଅଞ୍ଚଳରେ ଛନକା

ବାତ୍ୟାର ପ୍ରଭାବ କମିବା ପରେ ଏବେ ଓଡ଼ିଶାରେ ବନ୍ୟା ଆଶଙ୍କା। ରାଜ୍ୟର ତିନୋଟି ପ୍ରମୁଖ ନଦୀରେ ବଢ଼ିଛି ଜଳସ୍ତର। ଋଷିକୁଲ୍ୟା, ଘୋଡ଼ାହାଡ଼ ଓ ଜଳକା ନଦୀର ଜଳସ୍ତର ବିପଦ ସଂକେତ ଅତିକ୍ରମ କରିଥିବାରୁ ନଦୀକୂଳିଆ ଅଞ୍ଚଳରେ ବନ୍ୟା ଆଶଙ୍କା ଦେଖାଦେଇଛି। ନଦୀର ଜଳସ୍ତର ବଢ଼ୁଥିବାରୁ ତଳିଆ ଅଞ୍ଚଳର ଲୋକଙ୍କ ମଧ୍ୟରେ ଚିନ୍ତା ବଢ଼ିଛି।

ଗଞ୍ଜାମ ଜିଲ୍ଲା ପୁରୁଷୋତ୍ତମପୁର ନିକଟରେ ଋଷିକୁଲ୍ୟା ନଦୀର ଜଳସ୍ତର ବିପଦ ସଂକେତ ଅତିକ୍ରମ କରିଛି। ଏଠାରେ ନଦୀର ବିପଦ ସଂକେତ ୧୬.୮୩୫ ମିଟର ରହିଥିବାବେଳେ ବର୍ତ୍ତମାନ ଜଳସ୍ତର ୧୮.୨୮୦ ମିଟରରେ ପହଞ୍ଚିଛି। ଅର୍ଥାତ୍ ବିପଦ ସଂକେତଠାରୁ ୧.୪୪୫ ମିଟର ଅଧିକ ଉଚ୍ଚତାରେ ପ୍ରବାହିତ ହେଉଛି ନଦୀଜଳ।

ସେହିପରି ଘୋଡ଼ାହାଡ଼ ନଦୀର ଜଳସ୍ତର ମଧ୍ୟ ବିପଦ ସଂକେତ ଟପିଛି। କୁରୁଲା ନିକଟରେ ନଦୀର ବିପଦ ସଂକେତ ୩୨.୮୪ ମିଟର ଥିବାବେଳେ ବର୍ତ୍ତମାନ ଜଳସ୍ତର ୩୪.୦୮ ମିଟର ରହିଛି। ଏହା ବିପଦ ସଂକେତଠାରୁ ୧.୨୪ ମିଟର ଅଧିକ। ଫଳରେ ନଦୀ ନିକଟବର୍ତ୍ତୀ ଅଞ୍ଚଳରେ ବନ୍ୟାଜଳ ପ୍ରବେଶ ଆଶଙ୍କା ରହିଛି।

ଉତ୍ତର ଓଡ଼ିଶାର ବାଲେଶ୍ୱର ଜିଲ୍ଲାରେ ମଧ୍ୟ ବଢ଼ିଛି ନଦୀଜଳ। ବସ୍ତା ବ୍ଲକ୍‌ର ମଥାନିଠାରେ ଜଳକା ନଦୀର ଜଳସ୍ତର ବିପଦ ସଂକେତ ଅତିକ୍ରମ କରିଛି। ଏଠାରେ ବିପଦ ସଂକେତ ୬.୫୦ ମିଟର ଥିବାବେଳେ ବର୍ତ୍ତମାନ ଜଳସ୍ତର ୬.୫୮ ମିଟର ରହିଛି। ଅର୍ଥାତ୍ ବିପଦ ସଂକେତଠାରୁ ୮ ସେଣ୍ଟିମିଟର ଅଧିକ ରହିଛି ଜଳସ୍ତର।

ତିନୋଟି ନଦୀରେ ଜଳସ୍ତର ବଢ଼ି ବିପଦ ସଂକେତ ଅତିକ୍ରମ କରିଥିବାରୁ ନଦୀକୂଳିଆ ଓ ତଳିଆ ଅଞ୍ଚଳରେ ଚିନ୍ତା ବଢ଼ିଛି। ନଦୀର ଜଳସ୍ତର ଉପରେ ନଜର ରଖିବା ସହ ତଳିଆ ଅଞ୍ଚଳର ଲୋକଙ୍କୁ ସତର୍କ ରହିବା ଆବଶ୍ୟକ। ପ୍ରଶାସନ ପକ୍ଷରୁ ଜାରି ହେଉଥିବା ସୂଚନା ଓ ସତର୍କତାକୁ ଅନୁସରଣ କରିବା ଜରୁରୀ।

ବାତ୍ୟା ପରେ ନଦୀରେ ବଢ଼ୁଥିବା ଜଳସ୍ତର ଆଗକୁ କେଉଁ ରୂପ ନେବ, ତାହା ଉପରେ ନଜର ରହିଛି।