By Rosalini 
ବଲିଉଡର ଚର୍ଚ୍ଚିତ ନିର୍ଦ୍ଦେଶକ ସଂଜୟ ଲୀଲା ଭଂସାଲୀଙ୍କ ବହୁ ପ୍ରତୀକ୍ଷିତ ଫିଲ୍ମ ‘ଇନଶାଲ୍ଲାହ୍’କୁ ନେଇ ପୁଣିଥରେ ଚର୍ଚ୍ଚା ଜୋର ଧରିଛି। ୨୦୧୯ରେ ଘୋଷଣା ହୋଇଥିବା ଏହି ପ୍ରକଳ୍ପକୁ ଭଂସାଲୀ ପୁଣି ଆରମ୍ଭ କରିବାକୁ ଯୋଜନା କରୁଥିବା ନେଇ ଏକ ରିପୋର୍ଟରେ ଦାବି କରାଯାଇଛି। ଏହି ଫିଲ୍ମରେ ଆଲିଆ ଭଟ୍ଟ ପୁଣି ମୁଖ୍ୟ ଭୂମିକାରେ ରହିପାରନ୍ତି ବୋଲି ମଧ୍ୟ ଚର୍ଚ୍ଚା ହେଉଛି।
‘ଇନଶାଲ୍ଲାହ୍’ର ଘୋଷଣା ୨୦୧୯ରେ ହୋଇଥିଲା। ସେତେବେଳେ ଫିଲ୍ମରେ ଆଲିଆ ଭଟ୍ଟ ଓ ସଲମାନ ଖାନ୍ଙ୍କୁ ମୁଖ୍ୟ ଭୂମିକା ପାଇଁ ଚୟନ କରାଯାଇଥିଲା। ଫିଲ୍ମକୁ ନେଇ ଦର୍ଶକଙ୍କ ମଧ୍ୟରେ ମଧ୍ୟ ଭଲ ଉତ୍ସାହ ଦେଖାଯାଇଥିଲା।
ତେବେ ସୁଟିଂ ଆରମ୍ଭ ହେବା ପୂର୍ବରୁ ସଲମାନ ଖାନ୍ ଫିଲ୍ମରୁ ଓହରିଯିବା ପରେ ପ୍ରକଳ୍ପଟି ଅଟକି ଯାଇଥିଲା। ଏହାପରେ ‘ଇନଶାଲ୍ଲାହ୍’ ଆଉ ଆଗକୁ ବଢ଼ିପାରିନଥିଲା।
‘ଇନଶାଲ୍ଲାହ୍’ ସ୍ଥଗିତ ହେବା ପରେ ସଂଜୟ ଲୀଲା ଭଂସାଲୀ ଓ ଆଲିଆ ଭଟ୍ଟ ‘ଗଙ୍ଗୁବାଇ କାଠିଆୱାଡି’ରେ ଏକାଠି କାମ କରିଥିଲେ। ଏହି ଫିଲ୍ମରେ ଆଲିଆଙ୍କ ଅଭିନୟକୁ ବ୍ୟାପକ ପ୍ରଶଂସା ମିଳିଥିଲା।
ଫିଲ୍ମର ସଫଳତା ପରେ ଭଂସାଲୀ ଓ ଆଲିଆଙ୍କ ଯୋଡ଼ି ଉପରେ ଦର୍ଶକଙ୍କ ଆଗ୍ରହ ଆହୁରି ବଢ଼ିଥିଲା। ଏବେ ଏହି ଯୋଡ଼ି ‘ଲଭ୍ ଆଣ୍ଡ ୱାର୍’ରେ ପୁଣି ଏକାଠି ହୋଇଥିବାରୁ ‘ଇନଶାଲ୍ଲାହ୍’କୁ ନେଇ ନୂଆ ଚର୍ଚ୍ଚା ଆରମ୍ଭ ହୋଇଛି।
ରିପୋର୍ଟ ଅନୁଯାୟୀ, ‘ଲଭ୍ ଆଣ୍ଡ ୱାର୍’ର କାମ ଶେଷ ହେବା ପରେ ଭଂସାଲୀ ‘ଇନଶାଲ୍ଲାହ୍’କୁ ଏକ ନୂଆ ରୂପରେ ଆରମ୍ଭ କରିପାରନ୍ତି। ଫିଲ୍ମର ମୂଳ କାହାଣୀର ଆଧାର ସମାନ ରହିପାରେ, କିନ୍ତୁ ଏହାକୁ ନୂଆ ଦୃଷ୍ଟିକୋଣରେ ପ୍ରସ୍ତୁତ କରିବା ନେଇ ଯୋଜନା ଥିବା ଚର୍ଚ୍ଚା ହେଉଛି।
ଏଥିରେ ଆଲିଆ ଭଟ୍ଟଙ୍କୁ ପୁଣି ମୁଖ୍ୟ ଭୂମିକାରେ ରଖାଯାଇପାରେ। ତେବେ ଫିଲ୍ମର ପୁରୁଷ ମୁଖ୍ୟ ଭୂମିକାରେ କିଏ ଅଭିନୟ କରିବେ, ସେନେଇ ଏପର୍ଯ୍ୟନ୍ତ କୌଣସି ନାମ ଚୂଡ଼ାନ୍ତ ହୋଇନଥିବା ସୂଚନା ମିଳିଛି।
‘ଇନଶାଲ୍ଲାହ୍’ର ପୁରୁଷ ମୁଖ୍ୟ ଭୂମିକା ପାଇଁ ଶାହରୁଖ ଖାନ୍ଙ୍କ ନାମ ମଧ୍ୟ ଚର୍ଚ୍ଚାକୁ ଆସିଛି। ତେବେ ଏହା ଏପର୍ଯ୍ୟନ୍ତ ଚୂଡ଼ାନ୍ତ ନୁହେଁ। ସ୍କ୍ରିପ୍ଟ ଚୂଡ଼ାନ୍ତ ହେବା ପରେ ହିଁ କାଷ୍ଟିଂ ନେଇ ଅନ୍ତିମ ନିଷ୍ପତ୍ତି ହେବ ବୋଲି ରିପୋର୍ଟରେ ଉଲ୍ଲେଖ ରହିଛି।
ଯଦି ‘ଇନଶାଲ୍ଲାହ୍’ ପୁଣି ଆରମ୍ଭ ହୁଏ ଏବଂ ଆଲିଆଙ୍କ ସହ ଅନ୍ୟ କୌଣସି ବଡ଼ ଷ୍ଟାର୍ଙ୍କୁ ନିଆଯାଏ, ତେବେ ଏହି ପ୍ରକଳ୍ପ ବଲିଉଡର ଏକ ବଡ଼ ଚର୍ଚ୍ଚିତ ଫିଲ୍ମ ହୋଇପାରେ।
ଏପଟେ ସଂଜୟ ଲୀଲା ଭଂସାଲୀଙ୍କ ଆଗାମୀ ଫିଲ୍ମ ‘ଲଭ୍ ଆଣ୍ଡ ୱାର୍’କୁ ନେଇ ମଧ୍ୟ ଦର୍ଶକଙ୍କ ମଧ୍ୟରେ ଉତ୍ସାହ ରହିଛି। ଫିଲ୍ମରେ ଆଲିଆ ଭଟ୍ଟ, ରଣବୀର କପୁର ଓ ଭିକି କୌଶଲ ମୁଖ୍ୟ ଭୂମିକାରେ ଅଛନ୍ତି। ଫିଲ୍ମଟି ୨୧ ଜାନୁଆରୀ ୨୦୨୭ରେ ପ୍ରେକ୍ଷାଳୟକୁ ଆସିବାକୁ ଧାର୍ଯ୍ୟ ହୋଇଛି।
ଏବେ ‘ଇନଶାଲ୍ଲାହ୍’ ପୁଣି ଆରମ୍ଭ ହେବ କି ନାହିଁ ଏବଂ ଆଲିଆଙ୍କ ସହ କେଉଁ ଅଭିନେତା ନଜର ଆସିବେ, ତାହା ଉପରେ ସମସ୍ତଙ୍କ ନଜର ରହିଛି।