By Rosalini 
ଭାରତୀୟ ମହିଳା କ୍ରିକେଟ୍ ଦଳ ଏସିଆନ୍ ଗେମ୍ସ ୨୦୨୬ର ଫାଇନାଲରେ ପ୍ରବେଶ କରିଛି। ବାଂଲାଦେଶକୁ ୧୧୪ ରନ୍ରେ ପରାସ୍ତ କରି ଭାରତ ଗୋଲ୍ଡ ମେଡାଲ୍ ମ୍ୟାଚ୍ରେ ସ୍ଥାନ ପକ୍କା କରିଛି। ନିଶିନ୍ର କୋରୋଗି ସ୍ପୋର୍ଟସ ପାର୍କରେ ଖେଳାଯାଇଥିବା ସେମିଫାଇନାଲରେ ଭାରତ ବ୍ୟାଟିଂ ଓ ବୋଲିଂ—ଉଭୟ ବିଭାଗରେ ଦମଦାର ପ୍ରଦର୍ଶନ କରିଥିଲା।
ଟସ୍ ଜିତି ପ୍ରଥମେ ବ୍ୟାଟିଂ କରି ଭାରତ ୨୦ ଓଭରରେ ୪ ୱିକେଟ୍ ହରାଇ ୧୯୫ ରନ୍ ସଂଗ୍ରହ କରିଥିଲା। ଓପନର୍ ଶେଫାଳୀ ବର୍ମା ମାତ୍ର ୪୯ ବଲ୍ରେ ଅପରାଜିତ ୧୦୦ ରନ୍ କରିଥିଲେ। ତାଙ୍କ ଇନିଂସରେ ୯ଟି ଛକା ଓ ୩ଟି ଚୌକା ରହିଥିଲା। ଏହି ଶତକ ଏସିଆନ୍ ଗେମ୍ସ ଇତିହାସରେ କ୍ରିକେଟ୍ରେ ପ୍ରଥମ ଶତକ ଭାବେ ରେକର୍ଡ ହୋଇଛି।
ଶେଫାଳୀଙ୍କ ସହ ସ୍ମୃତି ମନ୍ଧାନା ୧୯ ବଲ୍ରେ ୩୭ ରନ୍ କରିଥିବା ବେଳେ ଅଧିନାୟିକା ହରମନପ୍ରୀତ କୌର ୩୩ ବଲ୍ରେ ୪୦ ରନ୍ କରିଥିଲେ। ଭାରତର ଦମଦାର ବ୍ୟାଟିଂ ଯୋଗୁଁ ବାଂଲାଦେଶ ସାମ୍ନାରେ ୧୯୬ ରନ୍ର ବିଜୟ ଲକ୍ଷ୍ୟ ରହିଥିଲା।
ଜବାବରେ ବାଂଲାଦେଶ ଭାରତୀୟ ବୋଲରଙ୍କ ସାମ୍ନା କରିପାରିନଥିଲା। ୧୫.୪ ଓଭରରେ ମାତ୍ର ୮୧ ରନ୍ରେ ଦଳ ଅଲଆଉଟ୍ ହୋଇଥିଲା। ଫଳରେ ଭାରତ ୧୧୪ ରନ୍ର ବଡ଼ ବିଜୟ ସହ ଫାଇନାଲ୍ ଟିକେଟ୍ ହାସଲ କରିଛି।
ଏବେ ଫାଇନାଲରେ ଭାରତର ମୁକାବିଲା ଶ୍ରୀଲଙ୍କା ସହ ହେବ। ଗୋଲ୍ଡ ମେଡାଲ୍ ପାଇଁ ଦୁଇ ଦଳ ମଧ୍ୟରେ ଏହି ଲଢ଼େଇ ସେପ୍ଟେମ୍ବର ୨୨ରେ ହେବ। ଭାରତୀୟ ଦଳ ଏସିଆନ୍ ଗେମ୍ସରେ ଲଗାତାର ଦ୍ୱିତୀୟ ଥର ସ୍ୱର୍ଣ୍ଣ ପଦକ ଜିତିବା ଲକ୍ଷ୍ୟରେ ମଇଦାନକୁ ଓହ୍ଲାଇବ।