By Rosalini 
ବଲିଉଡ୍ ଅଭିନେତ୍ରୀ ନୋରା ଫତେହିଙ୍କୁ ନେଇ ପୁଣି ଚର୍ଚ୍ଚାରେ ୨୦୦ କୋଟି ଟଙ୍କାର ଠକେଇ ଓ ବଟି ଆଦାୟ ମାମଲା। ଏହି ହାଇପ୍ରୋଫାଇଲ୍ ମାମଲାରେ ଅଭିଯୁକ୍ତ ସୁକେଶ ଚନ୍ଦ୍ରଶେଖରଙ୍କ ବିରୋଧରେ ସାକ୍ଷ୍ୟ ଦେବା ପାଇଁ ନୋରା ଫତେହି ନଭେମ୍ବର ୬ ତାରିଖରେ ଦିଲ୍ଲୀର ରାଉସ୍ ଆଭେନ୍ୟୁ କୋର୍ଟରେ ହାଜର ହୋଇଛନ୍ତି। ଏହି ମାମଲାରେ ସେ ଅଭିଯୋଗ ପକ୍ଷର ସାକ୍ଷୀ ବା ପ୍ରୋସିକ୍ୟୁସନ୍ ୱିଟନେସ୍ ଭାବରେ ନିଜର ବୟାନ ରଖିଛନ୍ତି।
ସୂଚନା ଅନୁସାରେ, ଏହି ମାମଲାରେ ସାକ୍ଷ୍ୟ ଦେବା ପାଇଁ ନୋରା ଫତେହିଙ୍କୁ ପୂର୍ବରୁ ନଭେମ୍ବର ୨ ତାରିଖରେ କୋର୍ଟରେ ହାଜର ହେବାକୁ ସମନ ଜାରି କରାଯାଇଥିଲା। କିନ୍ତୁ ବ୍ୟସ୍ତବହୁଳ କାର୍ଯ୍ୟସୂଚୀ କାରଣରୁ ସେ ନିର୍ଦ୍ଧାରିତ ଦିନରେ କୋର୍ଟରେ ଉପସ୍ଥିତ ହୋଇପାରିନଥିଲେ।
ତାଙ୍କ ଅନୁପସ୍ଥିତିକୁ ନେଇ କୋର୍ଟ ଅସନ୍ତୋଷ ପ୍ରକାଶ କରିବା ସହ ନିର୍ଦ୍ଦେଶକୁ ହାଲୁକା ଭାବେ ନ ନେବା ପାଇଁ ଚେତାବନୀ ଦେଇଥିଲେ। ପରେ ତାଙ୍କ ପକ୍ଷରୁ ଆବେଦନ ଦାଖଲ କରାଯାଇଥିଲା। ଶେଷରେ ନଭେମ୍ବର ୬ ତାରିଖରେ ସେ କୋର୍ଟରେ ହାଜର ହୋଇ ସାକ୍ଷ୍ୟ ପ୍ରଦାନ କରିଛନ୍ତି। ଏଏନଆଇ ପକ୍ଷରୁ ଜାରି ଏକ ଭିଡିଓରେ ନୋରାଙ୍କୁ କୋର୍ଟ ପରିସରକୁ ପ୍ରବେଶ କରୁଥିବାର ଦେଖିବାକୁ ମିଳିଛି।
ଏହି ମାମଲାର ମୁଖ୍ୟ ଅଭିଯୁକ୍ତ ସୁକେଶ ଚନ୍ଦ୍ରଶେଖରଙ୍କ ନାଁ ଦେଶର ଏକ ବଡ଼ ଠକେଇ ଓ ବଟି ଆଦାୟ ମାମଲା ସହ ଜଡ଼ିତ। ଅଭିଯୋଗ ଅନୁସାରେ, ସେ ନିଜକୁ ପ୍ରଭାବଶାଳୀ ବ୍ୟକ୍ତି ବୋଲି ପରିଚୟ ଦେଇ ଦିଲ୍ଲୀର ଜଣେ ବ୍ୟବସାୟୀଙ୍କ ପରିବାରଠାରୁ ପ୍ରାୟ ୨୦୦ କୋଟି ଟଙ୍କା ଆଦାୟ କରିଥିଲେ। ଏହି ଘଟଣାର ତଦନ୍ତରେ ଅନେକ ବ୍ୟକ୍ତି ଓ ଅଭିନେତ୍ରୀଙ୍କ ନାଁ ସାମ୍ନାକୁ ଆସିଥିଲା।
ଏହି ମାମଲାରେ ନୋରା ଫତେହିଙ୍କ ନାଁ ମଧ୍ୟ ଚର୍ଚ୍ଚାକୁ ଆସିଥିଲା। ସୁକେଶ ତାଙ୍କୁ ଦାମୀ ଉପହାର ଦେଇଥିବା ଅଭିଯୋଗ ରହିଛି। ତେବେ ନୋରା ପୂର୍ବରୁ କହିଥିଲେ ଯେ ସେ ସୁକେଶଙ୍କ ପ୍ରକୃତ ପରିଚୟ ଓ ତାଙ୍କ କାର୍ଯ୍ୟକଳାପ ବିଷୟରେ ଜାଣିନଥିଲେ। ଏହି ମାମଲାରେ ନିଜର କୌଣସି ଅପରାଧିକ ସମ୍ପୃକ୍ତି ନଥିବା ମଧ୍ୟ ସେ କହିଆସିଛନ୍ତି।
ସୁକେଶ ଚନ୍ଦ୍ରଶେଖର ମାମଲାରେ ବଲିଉଡ୍ ଅଭିନେତ୍ରୀ ଜ୍ୟାକଲିନ୍ ଫର୍ଣ୍ଣାଣ୍ଡିଜ୍ଙ୍କ ନାଁ ମଧ୍ୟ ସାମ୍ନାକୁ ଆସିଛି। ସୁକେଶ ଜ୍ୟାକଲିନ୍ଙ୍କ ସହ ପ୍ରେମ ସମ୍ପର୍କରେ ଥିବା ଦାବି କରିବା ସହ ତାଙ୍କୁ ଦାମୀ ଉପହାର ଦେଇଥିବା କହିଥିଲେ। ଅନ୍ୟପଟେ ଜ୍ୟାକଲିନ୍ ଏହି ଦାବିକୁ ଖଣ୍ଡନ କରିଥିବା ସହ ସୁକେଶଙ୍କ ସହ ପ୍ରେମ ସମ୍ପର୍କ ଥିବା କଥାକୁ ଅସ୍ୱୀକାର କରିଛନ୍ତି।
ନୋରା ଫତେହିଙ୍କ ସାକ୍ଷ୍ୟ ଏହି ହାଇପ୍ରୋଫାଇଲ୍ ମାମଲାରେ ଗୁରୁତ୍ୱ ବହନ କରୁଛି। ସେ କୋର୍ଟରେ କେଉଁ କେଉଁ ତଥ୍ୟ ରଖିଛନ୍ତି ଏବଂ ତାଙ୍କ ବୟାନ ମାମଲାର ପରବର୍ତ୍ତୀ ଶୁଣାଣିରେ କିପରି ପ୍ରଭାବ ପକାଇବ, ତାହା ଉପରେ ଏବେ ନଜର ରହିଛି। ତେବେ ମାମଲାର ତଦନ୍ତ ଓ ଆଇନଗତ ପ୍ରକ୍ରିୟା ଜାରି ରହିଛି।