By Rosalini 
ବଲିଉଡ୍ ଅଭିନେତାଙ୍କୁ ଟାର୍ଗେଟ୍ କରୁଛି କି ଅପରାଧୀ ଗୋଷ୍ଠୀ? ଜଣକ ପରେ ଜଣେ ଅଭିନେତାଙ୍କୁ ମିଳୁଛି ଧମକ। ଏବେ ଅଭିନେତା ତୁଷାର କପୁରଙ୍କୁ ୫ କୋଟି ଟଙ୍କା ଦାବି କରି ହତ୍ୟା ଧମକ ଦିଆଯାଇଥିବା ଅଭିଯୋଗ ସାମ୍ନାକୁ ଆସିଛି। ଫୋନ୍ କରିଥିବା ବ୍ୟକ୍ତି ନିଜକୁ ଲରେନ୍ସ ବିଷ୍ଣୋଇ ଗ୍ୟାଙ୍ଗ୍ର ସଦସ୍ୟ ବୋଲି ପରିଚୟ ଦେଇଥିବା ଜଣାପଡ଼ିଛି। ଘଟଣା ପରେ ତୁଷାର କପୁର ତୁରନ୍ତ ମୁମ୍ବାଇ ପୁଲିସକୁ ଏନେଇ ଅବଗତ କରାଇଥିଲେ। ଏବେ ମାମଲାର ତଦନ୍ତ ଆରମ୍ଭ କରିଛି ମୁମ୍ବାଇ କ୍ରାଇମ୍ବ୍ରାଞ୍ଚ।
ପୁଲିସ ସୂଚନା ଅନୁସାରେ, ଫୋନ୍ କରିଥିବା ବ୍ୟକ୍ତି ନିଜକୁ ହ୍ୟାରି ବକ୍ସର ବୋଲି ପରିଚୟ ଦେଇଥିଲେ। ସେ ନିଜକୁ ଲରେନ୍ସ ବିଷ୍ଣୋଇ ଗ୍ୟାଙ୍ଗ୍ର ସଦସ୍ୟ ବୋଲି ଦାବି କରିବା ସହ ତୁଷାର କପୁରଙ୍କୁ ୫ କୋଟି ଟଙ୍କା ଦେବାକୁ ଧମକ ଦେଇଥିବା ଅଭିଯୋଗ ହୋଇଛି। ଟଙ୍କା ନଦେଲେ ଗମ୍ଭୀର ପରିଣାମ ଭୋଗିବାକୁ ପଡ଼ିବ ବୋଲି ଧମକ ଦିଆଯାଇଥିବା କୁହାଯାଉଛି।
ଘଟଣା ସମ୍ପର୍କରେ ଅଭିଯୋଗ ମିଳିବା ପରେ ପୁଲିସ ତଦନ୍ତ ଆରମ୍ଭ କରିଛି। ମାମଲାକୁ ଆଣ୍ଟି ଏକ୍ସଟର୍ସନ୍ ସେଲ୍ ଏବଂ କ୍ରାଇମ୍ବ୍ରାଞ୍ଚକୁ ହସ୍ତାନ୍ତର କରାଯାଇଛି। ତେବେ ଏହି ଧମକ ପଛରେ ପ୍ରକୃତରେ କାହାର ହାତ ରହିଛି, ତାହା ଏଯାଏଁ ସ୍ପଷ୍ଟ ହୋଇନାହିଁ।
ଏହି ଘଟଣାର ତଦନ୍ତ ବେଳେ ମୁମ୍ବାଇ କ୍ରାଇମ୍ବ୍ରାଞ୍ଚର ଟେକ୍ନିକାଲ୍ ଟିମ୍ ଧମକପୂର୍ଣ୍ଣ ଫୋନ୍ର ଅଡିଓ ରେକର୍ଡିଂ ଯାଞ୍ଚ କରିଥିଲା। ଏହି ସ୍ୱରକୁ ହ୍ୟାରି ବକ୍ସରଙ୍କ ଉପଲବ୍ଧ ଅଫିସିଆଲ୍ ଭଏସ୍ ସାମ୍ପଲ୍ ସହ ତୁଳନା କରାଯାଇଥିଲା। କିନ୍ତୁ ଉଭୟ ସ୍ୱର ମଧ୍ୟରେ କୌଣସି ସମାନତା ମିଳିନଥିବା ପୁଲିସ ସୂଚନାରୁ ଜଣାପଡ଼ିଛି।
ଏହାପରେ ତଦନ୍ତକାରୀ ଅଧିକାରୀଙ୍କ ସନ୍ଦେହ ବଢ଼ିଛି ଯେ, କେହି ହ୍ୟାରି ବକ୍ସରଙ୍କ ନାଁ ବ୍ୟବହାର କରି ତୁଷାର କପୁରଙ୍କୁ ଭୟଭୀତ କରି ଟଙ୍କା ଆଦାୟ କରିବାକୁ ଉଦ୍ୟମ କରିଥାଇପାରନ୍ତି। ତେବେ ଏହା ପ୍ରକୃତରେ ଏକ ନକଲି ଫୋନ୍ କଲ୍ ନା ଏହା ପଛରେ ଅନ୍ୟ କୌଣସି ଷଡ଼ଯନ୍ତ୍ର ରହିଛି, ସେନେଇ ତଦନ୍ତ ଜାରି ରହିଛି।
ପୁଲିସ ସୂଚନା ଅନୁସାରେ, ତୁଷାର କପୁର ପ୍ରାୟ ଏକ ସପ୍ତାହ ପୂର୍ବରୁ ଏହି ଧମକ ସମ୍ପର୍କରେ ଅଭିଯୋଗ କରିଥିଲେ। ତେବେ ଏହି ଘଟଣାରେ ଏଯାଏଁ କୌଣସି ଏଫ୍ଆଇଆର୍ ରୁଜୁ ହୋଇନଥିବା ଜଣାପଡ଼ିଛି। ଅନ୍ୟପଟେ, ଧମକପୂର୍ଣ୍ଣ ଫୋନ୍ କେଉଁଠାରୁ ଆସିଥିଲା, କିଏ କରିଥିଲା ଏବଂ ଏହା ପଛରେ କାହାର ହାତ ରହିଛି, ସେସବୁ ଦିଗକୁ ନେଇ ତଦନ୍ତ କରୁଛି କ୍ରାଇମ୍ବ୍ରାଞ୍ଚ।
ଏହି ଘଟଣା ଏମିତି ଏକ ସମୟରେ ସାମ୍ନାକୁ ଆସିଛି, ଯେତେବେଳେ କିଛି ସପ୍ତାହ ପୂର୍ବରୁ ଅଭିନେତା ଟାଇଗର ଶ୍ରଫ୍ଙ୍କ ସହ ଜଡ଼ିତ ଏକ ଗୁଳିକାଣ୍ଡ ଘଟଣାକୁ ନେଇ ଚର୍ଚ୍ଚା ହୋଇଥିଲା। ସେହି ଘଟଣାରେ ମଧ୍ୟ ଲରେନ୍ସ ବିଷ୍ଣୋଇ ଗ୍ୟାଙ୍ଗ୍ ସହ ଜଡ଼ିତ ବ୍ୟକ୍ତିଙ୍କ ନାଁ ସାମ୍ନାକୁ ଆସିଥିବା ଖବର ପ୍ରକାଶ ପାଇଥିଲା।
ଏବେ ତୁଷାର କପୁରଙ୍କୁ ମିଳିଥିବା ଧମକ ଘଟଣା ବଲିଉଡ୍ ମହଲରେ ପୁଣି ଥରେ ଚିନ୍ତା ବଢ଼ାଇଛି। ତେବେ କେବଳ ଗ୍ୟାଙ୍ଗ୍ର ନାଁ ବ୍ୟବହାର କରି କେହି ଟଙ୍କା ଆଦାୟ କରିବାକୁ ଉଦ୍ୟମ କରୁଛି ନା ଏହା ପଛରେ କୌଣସି ସଂଗଠିତ ଅପରାଧୀ ଗୋଷ୍ଠୀର ସମ୍ପୃକ୍ତି ରହିଛି, ତାହା ପୁଲିସ ତଦନ୍ତ ପରେ ହିଁ ସ୍ପଷ୍ଟ ହେବ।