By Rosalini 
ଭୁବନେଶ୍ୱର: ରାଜଧାନୀ ଭୁବନେଶ୍ୱରର ନୟାପଲ୍ଲୀ ଅଞ୍ଚଳରେ ଜଣେ ଯୁବତୀଙ୍କୁ ବନ୍ଧୁକ ମୁନରେ ଧମକ ଦେଇ ଜୋରଜବରଦସ୍ତି ଦୁଷ୍କର୍ମ କରାଯାଇଥିବା ନେଇ ଥାନାରେ ଅଭିଯୋଗ ହୋଇଛି। ଅଭିଯୋଗ ପରେ ନୟାପଲ୍ଲୀ ଥାନା ପୁଲିସ ଘଟଣାର ତଦନ୍ତ ଆରମ୍ଭ କରିଛି।
ଅଭିଯୋଗ ଅନୁସାରେ, ଯୁବତୀଙ୍କୁ ଧମକ ଦେଇ ଅଭିଯୁକ୍ତ ଜୋରଜବରଦସ୍ତି କରିଥିବା କୁହାଯାଇଛି। ଘଟଣା ପରେ ଅଭିଯୁକ୍ତ ‘ଆମ ବସ୍’ରେ ଚଢ଼ି ଫେରାର ହୋଇଯାଇଥିବା ନେଇ ପୁଲିସକୁ ସୂଚନା ମିଳିଛି।
ଏହି ସୂଚନାକୁ ଆଧାର କରି ପୁଲିସ ଅଭିଯୁକ୍ତଙ୍କ ଗତିବିଧି ସମ୍ପର୍କରେ ଖୋଳତାଡ଼ କରୁଛି। ଘଟଣାସ୍ଥଳ ସହ ଆଖପାଖ ଅଞ୍ଚଳରେ ଲାଗିଥିବା ସିସିଟିଭି କ୍ୟାମେରାର ଫୁଟେଜ୍ ଯାଞ୍ଚ କରାଯାଉଛି।
ଅଭିଯୁକ୍ତ ବସ୍ରେ ଫେରାର ହୋଇଥିବା ସମ୍ଭାବନା ଥିବାରୁ ସମ୍ପୃକ୍ତ ବସ୍ ରୁଟ୍ ଓ ଅନ୍ୟାନ୍ୟ ସୂଚନା ମଧ୍ୟ ପୁଲିସ ଯାଞ୍ଚ କରୁଛି। ଅଭିଯୁକ୍ତଙ୍କୁ ଚିହ୍ନଟ କରି ଧରିବା ପାଇଁ ପୁଲିସ ପକ୍ଷରୁ ଛାନଭିନ ଜାରି ରହିଛି।
ତେବେ ଅଭିଯୋଗର ସମ୍ପୂର୍ଣ୍ଣ ସତ୍ୟତା ଓ ଘଟଣାର ପ୍ରକୃତ ପୃଷ୍ଠଭୂମି ପୁଲିସ ତଦନ୍ତ ପରେ ସ୍ପଷ୍ଟ ହେବ। ଘଟଣାକୁ ନେଇ ନୟାପଲ୍ଲୀ ଥାନା ପୁଲିସର ତଦନ୍ତ ଜାରି ରହିଛି।