୫ ଦିନିଆ କାର୍ଯ୍ୟ ସପ୍ତାହ ଦାବିରେ ବ୍ୟାଙ୍କ ଧର୍ମଘଟ: ୨୮ରୁ ୩ ଦିନ ବନ୍ଦ, ସରକାରଙ୍କ ସ୍ପଷ୍ଟୀକରଣ

ସପ୍ତାହକୁ ୫ ଦିନ ବ୍ୟାଙ୍କ କାର୍ଯ୍ୟ ଦାବିକୁ ନେଇ ପୁଣି ତେଜ ହୋଇଛି ବ୍ୟାଙ୍କ କର୍ମଚାରୀଙ୍କ ଆନ୍ଦୋଳନ। ଆସନ୍ତା ସେପ୍ଟେମ୍ବର ୨୮ରୁ ତିନିଦିନିଆ ଧର୍ମଘଟ ପାଇଁ ୟୁନାଇଟେଡ୍ ଫୋରମ୍ ଅଫ୍ ବ୍ୟାଙ୍କ ୟୁନିୟନ୍ସ (UFBU) ଡାକରା ଦେଇଛି। ଏହି ଦାବି ସରକାର ମାନିନେଇଥିବା ନେଇ ପ୍ରଚାରିତ ଖବରକୁ ଅର୍ଥ ମନ୍ତ୍ରଣାଳୟ ଖଣ୍ଡନ କରିଛି। ଏପର୍ଯ୍ୟନ୍ତ ସରକାରଙ୍କ ପକ୍ଷରୁ ଏନେଇ କୌଣସି ପ୍ରତିବଦ୍ଧତା ଦିଆଯାଇନଥିବା ମନ୍ତ୍ରଣାଳୟ ସ୍ପଷ୍ଟ କରିଛି।

ସପ୍ତାହକୁ ୫ ଦିନ ବ୍ୟାଙ୍କ କାର୍ଯ୍ୟ ଦାବି UFBUର ଦୀର୍ଘଦିନର ଦାବି ମଧ୍ୟରୁ ଗୋଟିଏ। UFBUର କହିବା ଅନୁସାରେ, ୨୦୨୪ ମାର୍ଚ୍ଚ ୮ ତାରିଖରେ ଭାରତୀୟ ବ୍ୟାଙ୍କ ସଂଘ (IBA) ପାଞ୍ଚ ଦିନିଆ କାର୍ଯ୍ୟ ସପ୍ତାହ ପ୍ରସ୍ତାବ ଉପରେ ସହମତ ହୋଇଥିଲା।

ଏହି ପ୍ରସ୍ତାବ ଅନୁସାରେ ସୋମବାରରୁ ଶୁକ୍ରବାର ପର୍ଯ୍ୟନ୍ତ ବ୍ୟାଙ୍କ କର୍ମଚାରୀମାନେ ପ୍ରତିଦିନ ପ୍ରାୟ ୪୦ ମିନିଟ୍ ଅଧିକ ସମୟ କାମ କରିବେ। ଅର୍ଥାତ୍ ସପ୍ତାହରେ ଶନିବାର ଓ ରବିବାର ଛୁଟି ରହିବା ସହ କାର୍ଯ୍ୟ ସମୟରେ ଆବଶ୍ୟକ ସମନ୍ୱୟ କରାଯିବା ପ୍ରସ୍ତାବ ରହିଛି।

ପ୍ରସ୍ତାବଟି ସରକାରଙ୍କ ବିଚାର ପାଇଁ ପଠାଯାଇଥିଲେ ମଧ୍ୟ ଏପର୍ଯ୍ୟନ୍ତ ଏନେଇ କୌଣସି ଚୂଡ଼ାନ୍ତ ନିଷ୍ପତ୍ତି ହୋଇନଥିବା UFBU ପକ୍ଷରୁ କୁହାଯାଇଛି।

ଦାବି ଉପରେ ନିଷ୍ପତ୍ତି ନ ହେବାରୁ ଚଳିତ ମାସ ୧୧ ତାରିଖରେ UFBU ପକ୍ଷରୁ ଦେଶବ୍ୟାପୀ ଦିନିକିଆ ଧର୍ମଘଟ ଡାକରା ଦିଆଯାଇଥିଲା। ଏହା ପରେ ମଧ୍ୟ ଦାବି ପୂରଣ ହୋଇନଥିବାରୁ ଆସନ୍ତା ୨୮ ତାରିଖରୁ ତିନିଦିନିଆ ଧର୍ମଘଟ କରିବାକୁ ସଂଗଠନ ଘୋଷଣା କରିଛି।

UFBU ଚେତାବନୀ ଦେଇଛି ଯେ, ଏହା ପରେ ମଧ୍ୟ ଦାବି ଉପରେ ସମାଧାନ ନ ହେଲେ ଅକ୍ଟୋବର ୨୬ରୁ ଅନିର୍ଦ୍ଦିଷ୍ଟକାଳୀନ ଧର୍ମଘଟ ଆରମ୍ଭ କରାଯାଇପାରେ।

ଏପଟେ ସପ୍ତାହକୁ ୫ ଦିନ ବ୍ୟାଙ୍କ କାର୍ଯ୍ୟ ଦାବି ସରକାର ମାନିନେଇଥିବା ନେଇ ଆସୁଥିବା ଖବରକୁ ଅର୍ଥ ମନ୍ତ୍ରଣାଳୟ ସ୍ପଷ୍ଟ ଭାବେ ଖଣ୍ଡନ କରିଛି। ଏନେଇ ସରକାରଙ୍କ ପକ୍ଷରୁ କୌଣସି ପ୍ରତିବଦ୍ଧତା ଦିଆଯାଇନଥିବା ମନ୍ତ୍ରଣାଳୟ କହିଛି।

ଧର୍ମଘଟ ଯୋଗୁଁ ବ୍ୟାଙ୍କ ସେବା ପ୍ରଭାବିତ ହେବାର ଆଶଙ୍କା ଥିବାରୁ ସେବାକୁ ସ୍ୱାଭାବିକ ରଖିବା ଦିଗରେ ଆବଶ୍ୟକ ପଦକ୍ଷେପ ନେବାକୁ ବ୍ୟାଙ୍କଗୁଡ଼ିକୁ କୁହାଯାଇଛି।

ତିନିଦିନିଆ ଧର୍ମଘଟ ପୂର୍ବରୁ ବ୍ୟାଙ୍କ ସେବାକୁ ସୁଗମ ରଖିବା ପାଇଁ ସେପ୍ଟେମ୍ବର ୨୭ ରବିବାର ଦିନ ମଧ୍ୟ ଶାଖା ଖୋଲିବାକୁ ରାଷ୍ଟ୍ରାୟତ୍ତ ବ୍ୟାଙ୍କ ଓ ଆଞ୍ଚଳିକ ଗ୍ରାମ୍ୟ ବ୍ୟାଙ୍କଗୁଡ଼ିକୁ ନିର୍ଦ୍ଦେଶ ଦିଆଯାଇଛି।

ଏହାସହିତ କର୍ମଚାରୀମାନଙ୍କୁ ଆଗୁଆ ବେତନ ପ୍ରଦାନ କରିବାକୁ ସମସ୍ତ ମନ୍ତ୍ରଣାଳୟ ଓ ବିଭାଗକୁ କୁହାଯାଇଛି। ଧର୍ମଘଟ ସମୟରେ ଗ୍ରାହକଙ୍କ ଉପରେ ପଡ଼ିପାରୁଥିବା ପ୍ରଭାବକୁ କମାଇବା ଓ ଆବଶ୍ୟକ ବ୍ୟାଙ୍କିଂ ସେବା ଜାରି ରଖିବା ଉପରେ ଗୁରୁତ୍ୱ ଦିଆଯାଉଛି।

ଏବେ ୫ ଦିନିଆ କାର୍ଯ୍ୟ ସପ୍ତାହ ଦାବି ଏବଂ ସରକାରଙ୍କ ସ୍ପଷ୍ଟୀକରଣ ମଧ୍ୟରେ ଆଗାମୀ ଦିନରେ ଆଲୋଚନା ମାଧ୍ୟମରେ କୌଣସି ସମାଧାନ ବାହାରୁଛି କି ନାହିଁ, ତାହା ଉପରେ ବ୍ୟାଙ୍କ କର୍ମଚାରୀ ଓ ଗ୍ରାହକଙ୍କ ନଜର ରହିଛି।