By Rosalini 
ଘରୋଇ କ୍ରିକେଟ୍ରେ ଅମ୍ପାୟାରମାନଙ୍କ ପାଇଁ ବଡ଼ ଅପଡେଟ୍। ପ୍ରାୟ ଏକ ଦଶନ୍ଧି ପରେ ଅମ୍ପାୟାରଙ୍କ ପାରିଶ୍ରମିକ ବ୍ୟବସ୍ଥାରେ ପରିବର୍ତ୍ତନ କରିଛି BCCI। ନୂଆ ବ୍ୟବସ୍ଥାରେ କେବଳ ଦୈନିକ ପାରିଶ୍ରମିକ ବଢ଼ାଯାଇନାହିଁ, ଅମ୍ପାୟାରମାନଙ୍କୁ ଚାରିଟି ନୂଆ ଗ୍ରେଡ୍ରେ ବିଭକ୍ତ କରାଯାଇଛି।
BCCI ସଚିବ ଦେବଜିତ ସାଇକିଆ ବୋର୍ଡର ବାର୍ଷିକ ସାଧାରଣ ବୈଠକ ପରେ ଏନେଇ ସୂଚନା ଦେଇଛନ୍ତି। ନୂଆ ବ୍ୟବସ୍ଥାରେ ଅମ୍ପାୟାରମାନେ ‘A’, ‘B’, ‘C’ ଏବଂ ‘D’—ଏହି ଚାରିଟି ଗ୍ରେଡ୍ରେ ରହିବେ। ପୂର୍ବରୁ ଥିବା ‘A+’, ‘A’, ‘B’ ଓ ‘C’ ବର୍ଗକୁ ବଦଳାଇ ଏହି ନୂଆ ଗ୍ରେଡ୍ ବ୍ୟବସ୍ଥା ଲାଗୁ କରାଯାଇଛି।
ନୂଆ ପାରିଶ୍ରମିକ ନୀତି ଅନୁସାରେ ‘A’ ଗ୍ରେଡ୍ର ଅମ୍ପାୟାରଙ୍କୁ ପ୍ରତିଦିନ ୬୦ ହଜାର ଟଙ୍କା ମିଳିବ। ସେହିପରି ‘B’ ଗ୍ରେଡ୍ ଅମ୍ପାୟାରଙ୍କୁ ୫୦ ହଜାର, ‘C’ ଗ୍ରେଡ୍ ପାଇଁ ୪୦ ହଜାର ଏବଂ ‘D’ ଗ୍ରେଡ୍ ଅମ୍ପାୟାରଙ୍କୁ ଦୈନିକ ୩୫ ହଜାର ଟଙ୍କା ପାରିଶ୍ରମିକ ମିଳିବ।
୨୦୧୭-୧୮ ପରେ ପ୍ରଥମ ଥର ପାଇଁ ଘରୋଇ କ୍ରିକେଟ୍ର ଅମ୍ପାୟାରଙ୍କ ପାରିଶ୍ରମିକରେ ଏଭଳି ସଂଶୋଧନ କରାଯାଇଛି। ଏହା ସହ ମ୍ୟାଚ୍ ରେଫରିଙ୍କ ପାରିଶ୍ରମିକରେ ମଧ୍ୟ ବୃଦ୍ଧି କରାଯାଇଛି।
ନୂଆ ବ୍ୟବସ୍ଥାର ସବୁଠାରୁ ବଡ଼ ବିଶେଷତା ହେଉଛି—ଅମ୍ପାୟାରଙ୍କ ଗ୍ରେଡ୍ ତାଙ୍କ ପ୍ରଦର୍ଶନ ଆଧାରରେ ନିର୍ଦ୍ଧାରିତ ହେବ। ଅମ୍ପାୟାର ବୋର୍ଡ ଅଧୀନରେ ଥିବା ଏକ ମୂଲ୍ୟାଙ୍କନ ଦଳ ସେମାନଙ୍କ ପ୍ରଦର୍ଶନ ଆକଳନ କରିବ।
ଘରୋଇ ସିଜନ୍ ଶେଷ ହେବା ପରେ ଏହି ମୂଲ୍ୟାଙ୍କନ ଆଧାରରେ ପଦୋନ୍ନତି କିମ୍ବା ଅବନତି କରାଯିବ। ଭଲ ପ୍ରଦର୍ଶନ କରୁଥିବା ଅମ୍ପାୟାର ଉପର ଗ୍ରେଡ୍କୁ ଯାଇପାରିବେ। ସେହିପରି ଆଶାନୁରୂପ ପ୍ରଦର୍ଶନ ନକରିପାରିଲେ ଉଚ୍ଚ ଗ୍ରେଡ୍ରୁ ନିମ୍ନ ଗ୍ରେଡ୍କୁ ଯିବାକୁ ପଡ଼ିପାରେ।
ଏହା ଦ୍ୱାରା ଅମ୍ପାୟାରମାନେ ନିଜ ପ୍ରଦର୍ଶନକୁ ନେଇ ଅଧିକ ସଚେତନ ରହିବା ସହ ପ୍ରତ୍ୟେକ ମ୍ୟାଚ୍ରେ ନିଷ୍ପତ୍ତି ନେବା ବେଳେ ଅଧିକ ସତର୍କ ରହିବେ ବୋଲି ଆଶା କରାଯାଉଛି।
କେବଳ ଅମ୍ପାୟାରଙ୍କ ପାରିଶ୍ରମିକ ନୁହେଁ, ବୟସ ଜାଲିଆତି ରୋକିବା ନେଇ ମଧ୍ୟ BCCI ପକ୍ଷରୁ ପଦକ୍ଷେପ ନିଆଯାଇଛି। ବୟସ ବର୍ଗର କ୍ରିକେଟ୍ ପାଇଁ ସମସ୍ତ ରାଜ୍ୟ କ୍ରିକେଟ୍ ସଂଘକୁ ନୂଆ Standard Operating Procedure ବା SOP ଜାରି କରାଯାଇଛି।
ଏହାର ଉଦ୍ଦେଶ୍ୟ ବୟସ ନିର୍ଦ୍ଧାରଣ ସମ୍ପର୍କିତ ନିୟମକୁ ଅଧିକ ସୁଦୃଢ଼ କରିବା। ଏଥିସହ ଶାରୀରିକ ଭିନ୍ନକ୍ଷମ କ୍ରିକେଟରମାନଙ୍କୁ ସହାୟତା କରିବା ପାଇଁ ମଧ୍ୟ ରାଜ୍ୟ କ୍ରିକେଟ୍ ସଂଘଗୁଡ଼ିକୁ ସକ୍ରିୟ ଭାବେ କାମ କରିବାକୁ କୁହାଯାଇଛି।
ଅନ୍ୟପକ୍ଷରେ, BCCI ପୁଣିଥରେ ମୁଖ୍ୟ କ୍ରୀଡ଼ା ବିଜ୍ଞାନ ଅଧିକାରୀ ପଦ ପାଇଁ ବିଜ୍ଞପ୍ତି ଜାରି କରିଛି। ଖେଳାଳିଙ୍କ ଫିଟନେସ୍, ରିକଭରି ଓ କ୍ରୀଡ଼ା ବିଜ୍ଞାନ ସମ୍ପର୍କିତ ବ୍ୟବସ୍ଥାକୁ ଅଧିକ ସୁଦୃଢ଼ କରିବାରେ ଏହି ପଦ ଗୁରୁତ୍ୱପୂର୍ଣ୍ଣ।
ଏହା ସହ ୨୦୨୭ IPLକୁ ନେଇ ମଧ୍ୟ ଅପଡେଟ୍ ମିଳିଛି। BCCI ସଚିବ ଦେବଜିତ ସାଇକିଆଙ୍କ ସୂଚନା ଅନୁସାରେ, ୨୦୨୭ IPL ମାର୍ଚ୍ଚ ଶେଷ ଆଡ଼କୁ ଆରମ୍ଭ ହେବାର ସମ୍ଭାବନା ରହିଛି।
ଅମ୍ପାୟାରଙ୍କ ପାରିଶ୍ରମିକ ବୃଦ୍ଧି, ନୂଆ ଗ୍ରେଡ୍ ବ୍ୟବସ୍ଥା, ପ୍ରଦର୍ଶନ ଆଧାରିତ ପଦୋନ୍ନତି ଏବଂ ମ୍ୟାଚ୍ ରେଫରିଙ୍କ ପାରିଶ୍ରମିକ ବୃଦ୍ଧି—ଘରୋଇ କ୍ରିକେଟ୍ର ଅଫିସିଆଲ୍ମାନଙ୍କ ପାଇଁ ଏହି ସବୁ ପରିବର୍ତ୍ତନ ଗୁରୁତ୍ୱ ବହନ କରୁଛି।