ଶୀତ ଅଧିବେଶନର ପ୍ରଥମ ଦିନରୁ ହୁଲସ୍ତୁଲ ହେଲା ଓଡ଼ିଶା ବିଧାନସଭା। ଅଧିବେଶନ ଆରମ୍ଭ ହେବାର କିଛି ସମୟ ପରେ ହିଁ କୋଟିଆ ପ୍ରସଙ୍ଗକୁ ନେଇ ଗୃହରେ ହଙ୍ଗାମା ଆରମ୍ଭ ହୋଇଥିଲା। ବିରୋଧୀ ବିଧାୟକମାନେ ୱେଲ୍କୁ ଆସି ପ୍ଲାକାର୍ଡ ଧରି ସରକାରଙ୍କ ବିରୋଧରେ ନାରାବାଜି କରିଥିଲେ। ଫଳରେ ଗୃହ କାର୍ଯ୍ୟ ସ୍ୱାଭାବିକ ଭାବେ ଚାଲିପାରିନଥିଲା। ଶେଷରେ ବାଚସ୍ପତି ସୁରମା ପାଢ଼ୀ ଗୃହକୁ ଅପରାହ୍ଣ ୪ଟା ପର୍ଯ୍ୟନ୍ତ ମୁଲତବୀ ଘୋଷଣା କରିଥିଲେ।
ଡିସେମ୍ବର ୩୧ ପର୍ଯ୍ୟନ୍ତ ଚାଲିବାକୁ ଥିବା ଏହି ଶୀତ ଅଧିବେଶନରେ ମୋଟ୍ ୩୩ଟି କାର୍ଯ୍ୟଦିବସ ରହିଛି। ଅଧିବେଶନର ପ୍ରଥମ ଦିନରେ ପ୍ରଥମେ ଦିବଂଗତ ସଦସ୍ୟ ଓ ଅନ୍ୟ ମୃତକଙ୍କ ଉଦ୍ଦେଶ୍ୟରେ ଶୋକ ପ୍ରସ୍ତାବ ଆଗତ ହୋଇଥିଲା।
ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଶୋକ ପ୍ରସ୍ତାବ ଆଗତ କରିଥିଲେ। ଏଥିରେ ପୂର୍ବତନ ମନ୍ତ୍ରୀ ସ୍ୱର୍ଗତ ରାସବିହାରୀ ବେହେରା ଏବଂ ପୂର୍ବତନ ସଦସ୍ୟ କାହ୍ନୁଚରଣ ନାୟକଙ୍କ ସ୍ମୃତିଚାରଣ କରାଯାଇଥିଲା। ଏହାସହ କର୍ତ୍ତବ୍ୟ ସମ୍ପାଦନ କରୁଥିବା ସମୟରେ ପ୍ରାଣ ହରାଇଥିବା ଓଡ଼ିଶା ପୁଲିସର ପୂର୍ବତନ କନଷ୍ଟେବଳ ଅଜୟ ଓ ହିମାଂଶୁ ରାୟଙ୍କୁ ମଧ୍ୟ ଶ୍ରଦ୍ଧାଞ୍ଜଳି ଜଣାଯାଇଥିଲା।
ଗତ ୨୯ ତାରିଖରେ ଗଞ୍ଜାମ ଜିଲ୍ଲାରେ ଘଟିଥିବା ପ୍ରଳୟଙ୍କାରୀ ବନ୍ୟା ଏବଂ ଗିଡ଼ିପାବାଲି ଗାଁରେ ଭୂସ୍ଖଳନ ଯୋଗୁଁ ପ୍ରାଣ ହରାଇଥିବା ଲୋକଙ୍କ ପାଇଁ ମଧ୍ୟ ଗୃହରେ ଶୋକ ପ୍ରକାଶ କରାଯାଇଥିଲା।
ଶୋକ ପ୍ରସ୍ତାବକୁ ବିରୋଧୀ ଦଳ ନେତା ନବୀନ ପଟ୍ଟନାୟକ ସମର୍ଥନ କରିବା ସହ ଦିବଂଗତଙ୍କ ପରିବାର ପ୍ରତି ସମବେଦନା ଜଣାଇଥିଲେ। କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡ଼ାମ ମଧ୍ୟ ଶୋକ ବ୍ୟକ୍ତ କରିଥିଲେ। ଏହାପରେ ବାଚସ୍ପତି ସୁରମା ପାଢ଼ୀ ମଧ୍ୟ ଦିବଂଗତଙ୍କ ପ୍ରତି ଶ୍ରଦ୍ଧାଞ୍ଜଳି ଜଣାଇଥିଲେ।
ଶୋକ ପ୍ରସ୍ତାବ ପରେ ହଠାତ୍ ଗୃହରେ ଉତ୍ତେଜନା ବଢ଼ିଥିଲା। କୋଟିଆ ପ୍ରସଙ୍ଗ ଉଠାଇ ବିରୋଧୀ ବିଧାୟକମାନେ ୱେଲ୍କୁ ଆସି ନାରାବାଜି ଆରମ୍ଭ କରିଥିଲେ। ବାଚସ୍ପତିଙ୍କ ପୋଡିୟମ୍ ସମ୍ମୁଖରେ ପ୍ଲାକାର୍ଡ ଦେଖାଇ ସରକାରଙ୍କ ବିରୋଧରେ ସ୍ୱର ଉଠାଇଥିଲେ।
ଏପରିକି ମନ୍ତ୍ରୀ ଗୃହରେ ଉତ୍ତର ରଖୁଥିବା ସମୟରେ ମଧ୍ୟ ବିରୋଧୀ ବିଧାୟକମାନେ ତାଙ୍କ ନିକଟକୁ ଯାଇ ହୋହଲ୍ଲା କରିଥିଲେ। ଏହାଦ୍ୱାରା ଗୃହରେ ବିତର୍କ ଓ ଆଲୋଚନା ଆଗକୁ ବଢ଼ିବା ସମ୍ଭବ ହୋଇନଥିଲା।
ହଟ୍ଟଗୋଳ ମଧ୍ୟରେ କଂଗ୍ରେସ ବିଧାୟକ ତାରାପ୍ରସାଦ ବାହିନୀପତିଙ୍କ ଆଚରଣ ମଧ୍ୟ ଚର୍ଚ୍ଚାକୁ ଆସିଥିଲା। କ୍ୟାମେରା ଯେଉଁ ଦିଗକୁ ଯାଉଥିଲା, ସେହି ଦିଗକୁ ଯାଇ ସେ ପ୍ଲାକାର୍ଡ ଦେଖାଇବା ସହ ନାରାବାଜି କରୁଥିବା ଦେଖିବାକୁ ମିଳିଥିଲା।
ବିରୋଧୀଙ୍କ ଏହି ହୋହଲ୍ଲା ଯୋଗୁଁ ବିଧାନସଭାର କାର୍ଯ୍ୟ ଆଗକୁ ବଢ଼ିପାରିନଥିଲା। ପରିସ୍ଥିତିକୁ ଦେଖି ବାଚସ୍ପତି ସୁରମା ପାଢ଼ୀ ଅପରାହ୍ଣ ୪ଟା ପର୍ଯ୍ୟନ୍ତ ଗୃହକୁ ମୁଲତବୀ ରଖିଥିଲେ।
ମୋଟ୍ ୩୩ଟି କାର୍ଯ୍ୟଦିବସ ଥିବା ଏହି ଶୀତ ଅଧିବେଶନ ଡିସେମ୍ବର ୩୧ ଯାଏଁ ଚାଲିବାକୁ ଥିବାବେଳେ ପ୍ରଥମ ଦିନରୁ ହିଁ କୋଟିଆ ପ୍ରସଙ୍ଗକୁ ନେଇ ଗୃହରେ ହଟ୍ଟଗୋଳ ଦେଖିବାକୁ ମିଳିଛି। ଆଗାମୀ ଦିନରେ ଏହି ପ୍ରସଙ୍ଗକୁ ନେଇ ଗୃହରେ କିଭଳି ଆଲୋଚନା ହେଉଛି ଏବଂ ଶାସକ-ବିରୋଧୀଙ୍କ ମଧ୍ୟରେ କିଭଳି ମୁହାଁମୁହିଁ ସ୍ଥିତି ଉପୁଜୁଛି, ତାହା ଉପରେ ନଜର ରହିବ।

