ଜ୍ଞାନେଶ କୁମାରଙ୍କ ବିରୋଧରେ ପୁଣି ମାର୍ଚ୍ଚ କରିବ ଇଣ୍ଡିଆ ମେଣ୍ଟ, ପବନ ଖେଡ଼ାଙ୍କ ତେଜ୍ ବୟାନ

ମୁଖ୍ୟ ନିର୍ବାଚନ କମିସନର ଜ୍ଞାନେଶ କୁମାରଙ୍କ ବିରୋଧରେ ପୁଣିଥରେ ରାସ୍ତାକୁ ଓହ୍ଲାଇବାକୁ ପ୍ରସ୍ତୁତ ହୋଇଛି ଇଣ୍ଡିଆ ମେଣ୍ଟ। ନିର୍ବାଚନ ପ୍ରକ୍ରିୟା, ଭୋଟର ତାଲିକା ଏବଂ ବିଶେଷ ସଂଶୋଧନ ପ୍ରକ୍ରିୟାକୁ ନେଇ ବିରୋଧୀ ଦଳଗୁଡ଼ିକ ଦୀର୍ଘଦିନ ଧରି ନିର୍ବାଚନ ଆୟୋଗ ଉପରେ ପ୍ରଶ୍ନ ଉଠାଇଆସୁଛନ୍ତି। ଏବେ ଏହି ପ୍ରସଙ୍ଗକୁ ନେଇ ପୁଣି ଏକାଠି ହୋଇଛି ବିରୋଧୀ ମେଣ୍ଟ।

ପ୍ରସ୍ତାବିତ ମାର୍ଚ୍ଚ ପୂର୍ବରୁ ଇଣ୍ଡିଆ ମେଣ୍ଟ ପକ୍ଷରୁ ଏକ ଲଞ୍ଚ ବୈଠକ ଆୟୋଜନ କରାଯାଇଥିଲା। ଏଥିରେ ବିରୋଧୀ ମେଣ୍ଟର ଅନେକ ସାଂସଦ ସାମିଲ ହୋଇଥିଲେ।

ବୈଠକରେ ଆଗାମୀ କାର୍ଯ୍ୟକ୍ରମ ସହ ନିର୍ବାଚନ ଆୟୋଗ ବିରୋଧରେ ଆନ୍ଦୋଳନକୁ କିପରି ଆହୁରି ଜୋରଦାର କରାଯିବ, ସେନେଇ ଆଲୋଚନା ହୋଇଥିବା ଜଣାପଡ଼ିଛି।

ଏହି ସମୟରେ କଂଗ୍ରେସ ନେତା ପବନ ଖେଡ଼ାଙ୍କ ଏକ ବୟାନ ଚର୍ଚ୍ଚାକୁ ଆସିଛି। ଏଫଆଇଆରକୁ ନେଇ ପ୍ରଶ୍ନ କରାଯିବାରୁ ସେ କହିଛନ୍ତି, “ଆମେ କ’ଣ ଏଫଆଇଆରକୁ ଡରୁଛୁ? ଏଫଆଇଆର ତ ଅନର୍।”

ଆବଶ୍ୟକ ପଡ଼ିଲେ ଦସ୍ତଖତ କରିବାକୁ ହେଲେ ଦସ୍ତଖତ କରିବେ ବୋଲି ମଧ୍ୟ ସେ କହିଛନ୍ତି। ଏହା ସହ ଚିଠି ପଠାଇବା ନେଇ ମଧ୍ୟ ସେ ସୂଚନା ଦେଇଛନ୍ତି।

ପବନ ଖେଡ଼ା ନିର୍ବାଚନ ଆୟୋଗର ଅଧିକାରୀମାନଙ୍କୁ ନେଇ ମଧ୍ୟ ଟିପ୍ପଣୀ କରିଛନ୍ତି। ତାଙ୍କ ବୟାନରେ ଜ୍ଞାନେଶ କୁମାରଙ୍କ ନାମ ଉଲ୍ଲେଖ ହୋଇଥିବା ବେଳେ, ବର୍ତ୍ତମାନର ଅଧିକାରୀମାନଙ୍କୁ ସେ ‘ଆଉଟଗୋଇଂ’ ବୋଲି ମଧ୍ୟ କହିଛନ୍ତି।

ଇଣ୍ଡିଆ ମେଣ୍ଟର ଏହି ପଦକ୍ଷେପ ଏବଂ ପବନ ଖେଡ଼ାଙ୍କ ତୀବ୍ର ବୟାନ ପରେ ନିର୍ବାଚନ ଆୟୋଗ ଓ ବିରୋଧୀ ଦଳଗୁଡ଼ିକ ମଧ୍ୟରେ ରାଜନୈତିକ ତାତି ଆହୁରି ବଢ଼ିବାର ସମ୍ଭାବନା ରହିଛି।

ଏବେ ଇଣ୍ଡିଆ ମେଣ୍ଟର ଏହି ମାର୍ଚ୍ଚ କେବେ ହେବ ଏବଂ ଏଥିରେ କେଉଁ କେଉଁ ବିରୋଧୀ ଦଳ ସାମିଲ ହେବେ, ତା’ ଉପରେ ନଜର ରହିଛି।