By Rosalini 
ସଫଳତା କେବେ ବି ଗୋଟିଏ ଦିନରେ ମିଳେନାହିଁ। ଏଥିପାଇଁ ଦରକାର ନିଷ୍ଠା, ପରିଶ୍ରମ ଏବଂ ଲୋକଙ୍କ ପାଇଁ କିଛି କରିବାର ଇଚ୍ଛା। ଏହାର ଏକ ଉଦାହରଣ ହେଉଛନ୍ତି ନିଥ୍ୟା ରମଣ। ଆମେରିକାର ଲସ୍ ଆଞ୍ଜେଲସ୍ ସହରର ମେୟର ନିର୍ବାଚନରେ ବିଜୟୀ ହୋଇ ସେ ଏବେ ବିଶ୍ୱସ୍ତରରେ ଚର୍ଚ୍ଚାକୁ ଆସିଛନ୍ତି। ନଭେମ୍ବର ୩ରେ ହୋଇଥିବା ନିର୍ବାଚନରେ ସେ ତତ୍କାଳୀନ ମେୟର କାରେନ୍ ବାସ୍ଙ୍କୁ ପରାସ୍ତ କରିଛନ୍ତି। ନଭେମ୍ବର ୫ରେ ବାସ୍ ନିଜ ପରାଜୟ ସ୍ୱୀକାର କରିବା ପରେ ନିଥ୍ୟା ରମଣଙ୍କ ବିଜୟ ସ୍ପଷ୍ଟ ହୋଇଛି।
ହେଲେ ଏହି ସଫଳତାର ଯାତ୍ରା କେବଳ ଆମେରିକାର ରାଜନୀତିରୁ ଆରମ୍ଭ ହୋଇନଥିଲା। ଏହାର ଏକ ଗୁରୁତ୍ୱପୂର୍ଣ୍ଣ ଅଧ୍ୟାୟ ରହିଛି ଭାରତର ଚେନ୍ନାଇରେ। ପ୍ରାୟ ୧୫ ବର୍ଷ ପୂର୍ବେ ଚେନ୍ନାଇରେ ସାଧାରଣ ଲୋକଙ୍କ ସମସ୍ୟା ବୁଝିବା ଏବଂ ସହରର ନାଗରିକ ସୁବିଧାକୁ ନେଇ କାମ କରୁଥିଲେ ସେ। ଆଜି ସେହି ନିଥ୍ୟା ରମଣ ଆମେରିକାର ଦ୍ୱିତୀୟ ବୃହତ୍ତମ ସହରର ନେତୃତ୍ୱ ନେବାକୁ ଯାଉଛନ୍ତି।
୨୦୧୦ ମସିହାରେ ନିଥ୍ୟା ରମଣ ଚେନ୍ନାଇରେ ‘Transparent Chennai’ ନାମକ ଏକ ନାଗରିକ ସୁବିଧା ଓ ସହର ଉନ୍ନୟନ ସମ୍ପର୍କିତ ପ୍ରୟାସ ଆରମ୍ଭ କରିଥିଲେ। ଏହି ପ୍ରୟାସର ମୁଖ୍ୟ ଉଦ୍ଦେଶ୍ୟ ଥିଲା ସହରର ବିଭିନ୍ନ ସମସ୍ୟା ସମ୍ପର୍କରେ ତଥ୍ୟ ସଂଗ୍ରହ କରିବା ଏବଂ ସେଗୁଡ଼ିକୁ ପ୍ରଶାସନର ନଜରକୁ ଆଣିବା।
ସାର୍ବଜନୀନ ଶୌଚାଳୟର ସ୍ଥିତି, ବସ୍ ରୁଟ୍, ଟ୍ରାଫିକ୍ ସମସ୍ୟା, ପାଦଚଲା ଲୋକଙ୍କ ସୁରକ୍ଷା ଏବଂ ରାସ୍ତାଘାଟର ସ୍ଥିତି ଭଳି ଅନେକ ବିଷୟ ଉପରେ କାମ କରାଯାଉଥିଲା। ସହରର ଗରିବ ଲୋକ ଓ ବସ୍ତିବାସିନ୍ଦାଙ୍କ ସମସ୍ୟାକୁ ମଧ୍ୟ ଏହି ପ୍ରୟାସରେ ଗୁରୁତ୍ୱ ଦିଆଯାଉଥିଲା।
ନାଗରିକ ସୁବିଧା କେବଳ ଧନୀ ଓ ସମ୍ଭ୍ରାନ୍ତ ଅଞ୍ଚଳ ପାଇଁ ନୁହେଁ, ସହରର ପ୍ରତ୍ୟେକ ବାସିନ୍ଦାଙ୍କ ପାଖରେ ପହଞ୍ଚିବା ଉଚିତ୍ ବୋଲି ତାଙ୍କ କାମର ମୂଳ ଲକ୍ଷ୍ୟ ଥିଲା। ଲୋକଙ୍କ ସମସ୍ୟାକୁ କେବଳ ଶୁଣିବା ନୁହେଁ, ତଥ୍ୟ ଆଧାରରେ ସେଗୁଡ଼ିକର ସମାଧାନ ଖୋଜିବା ଉପରେ ସେ ଗୁରୁତ୍ୱ ଦେଉଥିଲେ।
ନିଥ୍ୟା ରମଣଙ୍କ ଜନ୍ମ କେରଳର ଥିରୁଅନନ୍ତପୁରମ୍ରେ ହୋଇଥିଲା। ତାଙ୍କୁ ପ୍ରାୟ ୬ ବର୍ଷ ହୋଇଥିବା ବେଳେ ପରିବାର ସହ ଆମେରିକା ଚାଲିଯାଇଥିଲେ। ସେଠାରେ ଶିକ୍ଷା ଗ୍ରହଣ କରିବା ସହ ହାର୍ଭାର୍ଡ ବିଶ୍ୱବିଦ୍ୟାଳୟରେ ପଢ଼ିଥିଲେ। ପରେ ଭାରତକୁ ଫେରି ସାମାଜିକ କ୍ଷେତ୍ରରେ କାମ କରିଥିଲେ।
ଚେନ୍ନାଇରେ ‘Transparent Chennai’ ପ୍ରୟାସ ସହ ଜଡ଼ିତ ହେବା ପୂର୍ବରୁ ସେ ଦିଲ୍ଲୀରେ ବସ୍ତିବାସିନ୍ଦାଙ୍କ ସମସ୍ୟା ଓ ଉଚ୍ଛେଦ ବିରୋଧୀ ଆନ୍ଦୋଳନ ସହ ମଧ୍ୟ କାମ କରିଥିଲେ। ଏହି ଅଭିଜ୍ଞତା ତାଙ୍କୁ ସହର ଯୋଜନା, ଗରିବଙ୍କ ଅଧିକାର ଓ ନାଗରିକ ସୁବିଧା ସମ୍ପର୍କରେ ଗଭୀର ଅନୁଭବ ଦେଇଥିଲା।
୨୦୧୩ରେ ନିଥ୍ୟା ରମଣ ଆମେରିକାର ଲସ୍ ଆଞ୍ଜେଲସ୍କୁ ଫେରିଥିଲେ। ସେଠାରେ ସହର ପ୍ରଶାସନ ଓ ଗୃହହୀନ ଲୋକଙ୍କ ସମସ୍ୟାକୁ ନେଇ କାମ କରିଥିଲେ। ୨୦୧୭ରେ ସେ ‘SELAH Neighborhood Homeless Coalition’ ନାମକ ଏକ ସଂଗଠନ ଗଠନ କରିଥିଲେ। ଏହା ମାଧ୍ୟମରେ ଗୃହହୀନ ଲୋକଙ୍କ ସମସ୍ୟା ଓ ସେମାନଙ୍କ ପାଇଁ ସହାୟତା ବ୍ୟବସ୍ଥାକୁ ନେଇ କାମ କରାଯାଉଥିଲା।
ଏହି ସାମାଜିକ କାର୍ଯ୍ୟ ତାଙ୍କୁ ସ୍ଥାନୀୟ ରାଜନୀତି ଆଡ଼କୁ ଆକର୍ଷିତ କରିଥିଲା। ୨୦୨୦ରେ ସେ ଲସ୍ ଆଞ୍ଜେଲସ୍ ସିଟି କାଉନସିଲ୍ ନିର୍ବାଚନରେ ବିଜୟୀ ହୋଇଥିଲେ। ୨୦୨୪ରେ ପୁଣି ଥରେ ନିଜ ଆସନ ବଜାୟ ରଖିଥିଲେ। ଏହି ଅଭିଜ୍ଞତା ତାଙ୍କୁ ସହରର ସମସ୍ୟା ଓ ପ୍ରଶାସନିକ କାର୍ଯ୍ୟଧାରାକୁ ନିକଟରୁ ବୁଝିବାର ସୁଯୋଗ ଦେଇଥିଲା।
୨୦୨୬ ଲସ୍ ଆଞ୍ଜେଲସ୍ ମେୟର ନିର୍ବାଚନରେ ନିଥ୍ୟା ରମଣଙ୍କ ଲଢ଼େଇ ଥିଲା ତତ୍କାଳୀନ ମେୟର କାରେନ୍ ବାସ୍ଙ୍କ ସହ। ଏହି ନିର୍ବାଚନରେ ନିଥ୍ୟା ରମଣ ପ୍ରାୟ ୫୨.୧ ପ୍ରତିଶତ ଭୋଟ୍ ପାଇଥିବା ବେଳେ କାରେନ୍ ବାସ୍ଙ୍କୁ ପ୍ରାୟ ୪୭.୯ ପ୍ରତିଶତ ଭୋଟ୍ ମିଳିଥିଲା। ନଭେମ୍ବର ୫ରେ କାରେନ୍ ବାସ୍ ପରାଜୟ ସ୍ୱୀକାର କରି ନିଥ୍ୟାଙ୍କୁ ଅଭିନନ୍ଦନ ଜଣାଇଥିଲେ।
ଏହି ବିଜୟ ସହ ନିଥ୍ୟା ରମଣ ଲସ୍ ଆଞ୍ଜେଲସ୍ର ପରବର୍ତ୍ତୀ ମେୟର ହେବାକୁ ଯାଉଛନ୍ତି। ଏହା ଏକ ଐତିହାସିକ ରାଜନୈତିକ ସଫଳତା। ଭାରତୀୟ ମୂଳର ଜଣେ ମହିଳା ଭାବେ ଆମେରିକାର ଏତେ ବଡ଼ ସହରର ନେତୃତ୍ୱ ନେବାକୁ ଯାଉଥିବାରୁ ତାଙ୍କ ବିଜୟକୁ ନେଇ ଭାରତୀୟଙ୍କ ମଧ୍ୟରେ ମଧ୍ୟ ଉତ୍ସାହ ଦେଖାଯାଉଛି।
ନିଥ୍ୟା ରମଣଙ୍କ ଆଗରେ ଏବେ ଅନେକ ବଡ଼ ଚ୍ୟାଲେଞ୍ଜ ରହିଛି। ଗୃହହୀନ ଲୋକଙ୍କ ସମସ୍ୟା, ଘରଭଡ଼ା ଓ ଘର ମୂଲ୍ୟର ବୃଦ୍ଧି, ସାଧାରଣ ସୁରକ୍ଷା, ଯାତାୟାତ ଓ ସହରର ମୌଳିକ ସେବାକୁ ଉନ୍ନତ କରିବା ତାଙ୍କ ପାଇଁ ପ୍ରମୁଖ ପ୍ରାଥମିକତା ହେବ।
ନିର୍ବାଚନ ପ୍ରଚାର ସମୟରେ ସେ ଅଧିକ ସୁଲଭ ଘର, ଉନ୍ନତ ଯାତାୟାତ ବ୍ୟବସ୍ଥା, ସହରର ମୌଳିକ ସେବା ଓ ସୁରକ୍ଷା ଉପରେ ଗୁରୁତ୍ୱ ଦେଇଥିଲେ। ଏବେ ମେୟର ଭାବେ ଦାୟିତ୍ୱ ଗ୍ରହଣ କରିବା ପରେ ଏହି ପ୍ରତିଶ୍ରୁତିଗୁଡ଼ିକୁ କିପରି କାର୍ଯ୍ୟକାରୀ କରୁଛନ୍ତି, ତାହା ଉପରେ ସମସ୍ତଙ୍କ ନଜର ରହିବ।
ଚେନ୍ନାଇରେ ସାଧାରଣ ଲୋକଙ୍କ ସମସ୍ୟା ବୁଝିବାରୁ ଆରମ୍ଭ ହୋଇଥିବା ଯାତ୍ରା ଆଜି ଲସ୍ ଆଞ୍ଜେଲସ୍ର ମେୟର ଚୌକି ପର୍ଯ୍ୟନ୍ତ ପହଞ୍ଚିଛି। ନିଥ୍ୟା ରମଣଙ୍କ ଏହି ସଫଳତା କେବଳ ଏକ ନିର୍ବାଚନୀ ବିଜୟ ନୁହେଁ, ବରଂ ସମାଜ ପାଇଁ ତୃଣମୂଳ ସ୍ତରରୁ କାମ କରିବାର ଦୀର୍ଘ ଯାତ୍ରାର ଏକ ବଡ଼ ଉପଲବ୍ଧି।