By Rosalini 
ଶୀତ ଋତୁ ଆସିନି, ହେଲେ ରାଜଧାନୀ ଭୁବନେଶ୍ୱରରେ ଏବେଠାରୁ ଘନ କୁହୁଡ଼ିର ଆସ୍ତରଣ। ସକାଳୁ ସକାଳୁ ଭୁବନେଶ୍ୱର ସମେତ ଏହାର ଆଖପାଖ ଅଞ୍ଚଳରେ ଦେଖିବାକୁ ମିଳିଛି ଘନ କୁହୁଡ଼ି। ଫଳରେ ସାଧାରଣ ଜନଜୀବନ ପ୍ରଭାବିତ ହେବା ସହ ଯାତାୟାତରେ ଦେଖାଦେଇଛି ସମସ୍ୟା। ରାସ୍ତାଘାଟରେ ଦୃଶ୍ୟମାନ ଦୂରତା ୫୦ ମିଟର କିମ୍ବା ତା’ଠାରୁ କମ୍କୁ ଖସି ଆସିଥିବାରୁ ଗାଡ଼ି ଚାଳକଙ୍କୁ ଯାତାୟାତ ସମୟରେ ଅଧିକ ସତର୍କ ରହିବାକୁ ପଡ଼ିଛି।
ଘନ କୁହୁଡ଼ିର ପ୍ରଭାବ ୧୬ ନମ୍ବର ଜାତୀୟ ରାଜପଥ ସମେତ ରାଜଧାନୀର ଅନ୍ୟ ପ୍ରମୁଖ ରାସ୍ତାରେ ଅନୁଭୂତ ହୋଇଛି। କୁହୁଡ଼ି ଯୋଗୁଁ ଆଗରେ ଯାଉଥିବା ଗାଡ଼ି ଏବଂ ରାସ୍ତା ସ୍ପଷ୍ଟ ଦେଖାଯାଉନାହିଁ। ଫଳରେ ଯାନବାହନ ଚଳାଚଳ ବାଧାପ୍ରାପ୍ତ ହୋଇଛି। ବିଶେଷକରି ଦ୍ରୁତଗତିରେ ଗାଡ଼ି ଚଳାଉଥିବା ଚାଳକଙ୍କ ପାଇଁ ଦୁର୍ଘଟଣାର ଆଶଙ୍କା ବଢ଼ିଯାଇଛି।
ସକାଳୁ ଅଫିସ୍, ସ୍କୁଲ ଓ ଅନ୍ୟାନ୍ୟ କାର୍ଯ୍ୟ ପାଇଁ ବାହାରୁଥିବା ଲୋକମାନେ ମଧ୍ୟ କୁହୁଡ଼ି ଯୋଗୁଁ ଅସୁବିଧାର ସମ୍ମୁଖୀନ ହେଉଛନ୍ତି। ରାସ୍ତାରେ ଦୃଶ୍ୟମାନ ଦୂରତା କମିଯିବାରୁ ଗାଡ଼ି ଚାଳକମାନେ ଧୀରେ ଧୀରେ ଯାତାୟାତ କରୁଥିବା ଦେଖିବାକୁ ମିଳିଛି।
ଏଭଳି ପରିସ୍ଥିତିରେ କୁହୁଡ଼ି ସମୟରେ ଯାତାୟାତ କରୁଥିବା ଲୋକଙ୍କୁ ସତର୍କ ରହିବା ଜରୁରୀ। ଗାଡ଼ି ଚଳାଇବା ସମୟରେ ଫଗ୍ ଲାଇଟ୍ ବ୍ୟବହାର କରିବା ସହ ଗାଡ଼ିର ବେଗ ନିୟନ୍ତ୍ରଣରେ ରଖିବା ଆବଶ୍ୟକ। ଏଥିସହ ଆଗରେ ଯାଉଥିବା ଗାଡ଼ିଠାରୁ ଯଥେଷ୍ଟ ଦୂରତା ବଜାୟ ରଖିବା ଉଚିତ। ହଠାତ୍ ବ୍ରେକ୍ ଲଗାଇବା ଓ ଦ୍ରୁତଗତିରେ ଗାଡ଼ି ଚଳାଇବାରୁ ନିବୃତ୍ତ ରହିବା ଦରକାର।
ଘନ କୁହୁଡ଼ି ଥିବା ସମୟରେ ଅତ୍ୟନ୍ତ ଜରୁରୀ ନହେଲେ ଯାତ୍ରାକୁ ଏଡ଼ାଇବା ମଧ୍ୟ ଏକ ସୁରକ୍ଷିତ ପଦକ୍ଷେପ ହୋଇପାରେ। ତେଣୁ ରାଜଧାନୀରେ କୁହୁଡ଼ିର ପ୍ରଭାବ ରହୁଥିବା ସମୟରେ ସମସ୍ତ ଗାଡ଼ି ଚାଳକ ସତର୍କତା ଅବଲମ୍ବନ କରିବା ଆବଶ୍ୟକ।