By Rosalini 
କୃତ୍ରିମ ବୁଦ୍ଧିମତ୍ତା (AI) କ୍ଷେତ୍ରରେ ଆମେରିକା ଏବଂ ଚୀନ୍ ମଧ୍ୟରେ ଏକ ନୂଆ ଯୋଗାଯୋଗ ଚ୍ୟାନେଲ ପ୍ରତିଷ୍ଠା ହେବ। ଉଭୟ ଦେଶ AI ଏବଂ ସୁପର ଇଣ୍ଟେଲିଜେନ୍ସ (SI) ସହ ଜଡ଼ିତ ବିପଦ, ସମ୍ଭାବନା ଓ ଭବିଷ୍ୟତର ପ୍ରଭାବ ନେଇ ନିୟମିତ ଭାବେ ମତ ବିନିମୟ କରିବେ ବୋଲି ହ୍ୱାଇଟ୍ ହାଉସ୍ ପକ୍ଷରୁ କୁହାଯାଇଛି।
ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବଂ ଚୀନ୍ ରାଷ୍ଟ୍ରପତି ସି ଜିନପିଙ୍ଗଙ୍କ ମଧ୍ୟରେ ହୋଇଥିବା ଶିଖର ସମ୍ମିଳନୀରେ ଏହି ପ୍ରସଙ୍ଗ ଗୁରୁତ୍ୱ ପାଇଥିଲା। ଦୁଇ ନେତାଙ୍କ ଆଲୋଚନାରେ ବାଣିଜ୍ୟ ଓ ଦ୍ୱିପାକ୍ଷିକ ସମ୍ପର୍କ ସହିତ AI କ୍ଷେତ୍ରରେ ବଢୁଥିବା ସୁଯୋଗ ଓ ଚ୍ୟାଲେଞ୍ଜ ଉପରେ ମଧ୍ୟ ଚର୍ଚ୍ଚା ହୋଇଥିବା ହ୍ୱାଇଟ୍ ହାଉସ୍ କହିଛି।
ହ୍ୱାଇଟ୍ ହାଉସ୍ ଅନୁସାରେ, ଆମେରିକା ଓ ଚୀନ୍ AIର ବିପଦ ଏବଂ ଲାଭ ସମ୍ପର୍କରେ ମତ ବିନିମୟ ପାଇଁ ଏକ ଯୋଗାଯୋଗ ବ୍ୟବସ୍ଥା ଗଢ଼ିବାକୁ ରାଜି ହୋଇଛନ୍ତି। ଏହି ଆଲୋଚନାରେ ବିଶେଷ ଗୁରୁତ୍ୱ ପାଇଛି ‘ସୁପର ଇଣ୍ଟେଲିଜେନ୍ସ’ ବା SI। ଏହାକୁ AIର ଆଗାମୀ ବିକାଶ ସହ ଜଡ଼ିତ ଏକ ଗୁରୁତ୍ୱପୂର୍ଣ୍ଣ ବିଷୟ ଭାବେ ଦେଖାଯାଉଛି।
ଶିଖର ସମ୍ମିଳନୀ ପୂର୍ବରୁ ଟ୍ରମ୍ପ ମଧ୍ୟ ସୁପର ଇଣ୍ଟେଲିଜେନ୍ସ ଆଲୋଚନାର ଏକ ପ୍ରମୁଖ ବିଷୟ ହେବ ବୋଲି କହିଥିଲେ। ଅନ୍ୟପଟେ, ସି ଜିନପିଙ୍ଗ ଆମେରିକା ଓ ଚୀନ୍କୁ ଦୁଇ ଦେଶର ରଣନୈତିକ ପ୍ରତିଦ୍ୱନ୍ଦ୍ୱିତାକୁ ପରିଚାଳନା କରିବା ସହ କୃତ୍ରିମ ବୁଦ୍ଧିମତ୍ତାକୁ ମାନବ ନିୟନ୍ତ୍ରଣ ମଧ୍ୟରେ ରଖିବା ଦିଗରେ ଧ୍ୟାନ ଦେବାକୁ ଆହ୍ୱାନ କରିଥିବା ସୂଚନା ମିଳିଛି।
AIର ଦ୍ରୁତ ବିକାଶକୁ ନେଇ ସାରା ବିଶ୍ୱରେ ସୁଯୋଗ ସହିତ ସୁରକ୍ଷା, ନିୟନ୍ତ୍ରଣ ଓ ଦାୟିତ୍ୱ ଭଳି ପ୍ରସଙ୍ଗ ଉପରେ ଚର୍ଚ୍ଚା ଜାରି ରହିଛି। ଏପରି ସମୟରେ ବିଶ୍ୱର ଦୁଇ ପ୍ରମୁଖ ଶକ୍ତି ଆମେରିକା ଓ ଚୀନ୍ ମଧ୍ୟରେ AIକୁ ନେଇ ଏହି ଯୋଗାଯୋଗ ଚ୍ୟାନେଲ ପ୍ରତିଷ୍ଠା ହେବା ଆଗାମୀ ଦିନର ଟେକ୍ନୋଲୋଜି ନୀତି ଓ AI ସୁରକ୍ଷା ଆଲୋଚନା ପାଇଁ ଗୁରୁତ୍ୱ ବହନ କରିପାରେ।