By Rosalini 
ବଲିଉଡ୍ର ଚର୍ଚ୍ଚିତ ଯୋଡ଼ି ଶାହିଦ୍ କପୁର ଓ କରୀନା କପୁର ଖାନ୍ଙ୍କୁ ଏକାଠି ଦେଖି ଖୁସି ହୋଇଛନ୍ତି ଫ୍ୟାନ୍ସ। IIFA 2027ର ପ୍ରେସ୍ କନ୍ଫରେନ୍ସରେ ଉଭୟଙ୍କ ଭେଟଘାଟ୍ ଏବେ ଚର୍ଚ୍ଚାର ବିଷୟ ପାଲଟିଛି। କରୀନାଙ୍କୁ ଦେଖି ଶାହିଦ୍ ତାଙ୍କ ପାଖକୁ ଯାଇଥିଲେ ଏବଂ ଉଭୟ ପରସ୍ପରକୁ ଆଲିଙ୍ଗନ କରି ଅଭିବାଦନ ଜଣାଇଥିଲେ। ଏହି ମୁହୂର୍ତ୍ତର ଭିଡିଓ ସୋସିଆଲ୍ ମିଡିଆରେ ଭାଇରାଲ୍ ହେବା ପରେ ପୁଣି ଥରେ ଫ୍ୟାନ୍ସଙ୍କ ମନେ ପଡ଼ିଯାଇଛି ସୁପରହିଟ୍ ଫିଲ୍ମ ‘ଜବ୍ ଭି ମେଟ୍’ର ଗୀତ୍ ଓ ଆଦିତ୍ୟଙ୍କ କାହାଣୀ।
ଅକ୍ଟୋବର ୨୨ରେ ମୁମ୍ବାଇରେ IIFA 2027ର ପ୍ରେସ୍ କନ୍ଫରେନ୍ସ ଆୟୋଜିତ ହୋଇଥିଲା। ଏଥିରେ ସଲମାନ ଖାନ୍, ରଶ୍ମିକା ମନ୍ଦାନା, ଶାହିଦ୍ କପୁର ଓ କରୀନା କପୁର ଖାନ୍ଙ୍କ ସମେତ ବହୁ ନାମୀଦାମୀ କଳାକାର ଯୋଗ ଦେଇଥିଲେ। କିନ୍ତୁ ଏହି ଇଭେଣ୍ଟରେ ଶାହିଦ୍ ଓ କରୀନାଙ୍କ ଭେଟଘାଟ୍ ସମସ୍ତଙ୍କ ଦୃଷ୍ଟି ଆକର୍ଷଣ କରିଛି।
କରୀନା କଳା ରଙ୍ଗର ଆଉଟ୍ଫିଟ୍ରେ ନଜର ଆସିଥିବା ବେଳେ ଶାହିଦ୍ ଧଳା ରଙ୍ଗର ସୁଟ୍ ପିନ୍ଧିଥିଲେ। ଉଭୟ ପରସ୍ପରକୁ ହସି ହସି ଆଲିଙ୍ଗନ କରି ଅଭିବାଦନ ଜଣାଇଥିଲେ। ସେମାନଙ୍କ ଏହି ସୌହାର୍ଦ୍ଦ୍ୟପୂର୍ଣ୍ଣ ଭେଟଘାଟ୍ର ଦୃଶ୍ୟ କ୍ୟାମେରାରେ କଏଦ୍ ହୋଇଥିଲା। ଭିଡିଓଟି ସୋସିଆଲ୍ ମିଡିଆରେ ପ୍ରସାରିତ ହେବା ପରେ ଫ୍ୟାନ୍ସଙ୍କ ମଧ୍ୟରେ ଏହାକୁ ନେଇ ଉତ୍ସାହ ବଢ଼ିଛି।
ଶାହିଦ୍ ଓ କରୀନାଙ୍କ ଏହି ଭେଟଘାଟ୍ ଫ୍ୟାନ୍ସଙ୍କୁ ୨୦୦୭ର ସୁପରହିଟ୍ ଫିଲ୍ମ ‘ଜବ୍ ଭି ମେଟ୍’ର ସ୍ମୃତି ଫେରାଇ ଆଣିଛି। ଫିଲ୍ମରେ କରୀନାଙ୍କ ‘ଗୀତ୍’ ଓ ଶାହିଦ୍ଙ୍କ ‘ଆଦିତ୍ୟ’ ଚରିତ୍ର ଦର୍ଶକଙ୍କ ମନରେ ସ୍ୱତନ୍ତ୍ର ସ୍ଥାନ ସୃଷ୍ଟି କରିଥିଲା।
ଗୀତ୍ର ଚଞ୍ଚଳ ସ୍ୱଭାବ, ଆଦିତ୍ୟଙ୍କ ଭାବପ୍ରବଣ କାହାଣୀ ଏବଂ ଉଭୟଙ୍କ ମଧ୍ୟରେ ଥିବା ରୋମାଣ୍ଟିକ୍ ସମ୍ପର୍କ ଫିଲ୍ମଟିକୁ ଆଜି ମଧ୍ୟ ଦର୍ଶକଙ୍କ ପ୍ରିୟ କରି ରଖିଛି। ଏହି ଫିଲ୍ମର ଗୀତ, ସଂଳାପ ଓ ଦୃଶ୍ୟ ଆଜି ବି ଫ୍ୟାନ୍ସଙ୍କ ମନରେ ରହିଛି।
IIFA ମଞ୍ଚରେ ଶାହିଦ୍-କରୀନାଙ୍କ ଭେଟଘାଟ୍ ପରେ ସୋସିଆଲ୍ ମିଡିଆରେ ଅନେକ ଫ୍ୟାନ୍ସ ପୁଣି ଥରେ ଏହି ଯୋଡ଼ିକୁ ଏକାଠି ପରଦାରେ ଦେଖିବାକୁ ଇଚ୍ଛା ପ୍ରକାଶ କରିଛନ୍ତି। ତେବେ ଭବିଷ୍ୟତରେ ଉଭୟ ଏକାଠି କୌଣସି ଫିଲ୍ମରେ ନଜର ଆସିବେ କି ନାହିଁ, ସେନେଇ କୌଣସି ନିଶ୍ଚିତ ଘୋଷଣା ନାହିଁ।
IIFA 2027ର ପ୍ରେସ୍ କନ୍ଫରେନ୍ସରେ ସଲମାନ ଖାନ୍ଙ୍କୁ ନେଇ ମଧ୍ୟ ଏକ ମନଛୁଆଁ ମୁହୂର୍ତ୍ତ ଚର୍ଚ୍ଚାକୁ ଆସିଛି। ଜଣେ କୁନି ଝିଅ ସଲମାନଙ୍କ ପୋଷ୍ଟର ଧରି ତାଙ୍କୁ ଭେଟିବାକୁ ପହଞ୍ଚିଥିଲେ। ସଲମାନ ମଧ୍ୟ ତାଙ୍କୁ ସ୍ନେହର ସହ ଭେଟିବା ସହ ଆଲିଙ୍ଗନ କରିଥିବା ଭିଡିଓରେ ଦେଖିବାକୁ ମିଳିଛି।
ଏହି ଦୃଶ୍ୟ ସୋସିଆଲ୍ ମିଡିଆରେ ଲୋକଙ୍କ ମନ ଜିଣିଛି। ଜଣେ ପଟେ ଶାହିଦ୍-କରୀନାଙ୍କ ଭେଟଘାଟ୍ ପୁରୁଣା ସ୍ମୃତିକୁ ତାଜା କରିଥିବା ବେଳେ ଅନ୍ୟପଟେ ସଲମାନ ଓ କୁନି ଫ୍ୟାନ୍ଙ୍କ ମଧ୍ୟରେ ଏହି ସ୍ନେହଭରା ମୁହୂର୍ତ୍ତ ଆକର୍ଷଣର କେନ୍ଦ୍ର ପାଲଟିଛି।
IIFA ପ୍ରେସ୍ କନ୍ଫରେନ୍ସର ଏହି ଦୁଇଟି ମୁହୂର୍ତ୍ତ ଏବେ ମନୋରଞ୍ଜନ ଜଗତରେ ଚର୍ଚ୍ଚା ବଢ଼ାଇଛି। ଶାହିଦ୍ ଓ କରୀନାଙ୍କ ଭେଟଘାଟ୍ ପୁରୁଣା ଫିଲ୍ମର ସ୍ମୃତିକୁ ଫେରାଇ ଆଣିଥିବା ବେଳେ ସଲମାନଙ୍କ ସହ କୁନି ଫ୍ୟାନ୍ଙ୍କ ସାକ୍ଷାତ ମଧ୍ୟ ଦର୍ଶକଙ୍କୁ ଆକର୍ଷିତ କରିଛି। ଏହି ଭିଡିଓଗୁଡ଼ିକ କଳାକାର ଓ ସେମାନଙ୍କ ଫ୍ୟାନ୍ସଙ୍କ ମଧ୍ୟରେ ଥିବା ଭଲପାଇବାକୁ ପୁଣି ଥରେ ସାମ୍ନାକୁ ଆଣିଛି।