By Rosalini 
ବାଂଲାଦେଶରେ ଦୀପୁ ଦାସଙ୍କ ନିର୍ମମ ଭିଡ଼ହତ୍ୟାକୁ ନେଇ ସମଗ୍ର ବିଶ୍ବ ସ୍ତବ୍ଧ ଥିବାବେଳେ ଆଉ ଜଣେ ହିନ୍ଦୁ ଯୁବକଙ୍କୁ ପିଟି ପିଟି ହତ୍ୟା କରିଛନ୍ତି। ମୃତ ଯୁବକଙ୍କ ନାଁ ଅମୃତ ମଣ୍ଡଳ ଓରଫ ସମ୍ରାଟ। ବୁଧବାର ରାତି ପ୍ରାୟ ୧୧ଟାରେ ଏହି ଭିଡ଼ ଆକ୍ରମଣ ହୋଇଥିଲା। ପୀଡିତଙ୍କ ନାମ ଅମୃତ ମଣ୍ଡଳ, ଯିଏକି ସମ୍ରାଟ ନାମରେ ମଧ୍ୟ ଜଣାଶୁଣା, ସେ ସେହି ଗାଁର ବାସିନ୍ଦା। ଡେଲି ଷ୍ଟାର ରିପୋର୍ଟ ଅନୁସାରେ, ପୋଲିସ ତାଙ୍କୁ ଗୁରୁତର ଅବସ୍ଥାରେ ପାଇ ସ୍ଥାନୀୟ ହସ୍ପିଟାଲକୁ ସ୍ଥାନାନ୍ତର କରିଥିଲା, ଯେଉଁଠାରେ ତାଙ୍କୁ ରାତି ପ୍ରାୟ ୨ଟାରେ ମୃତ ଘୋଷଣା କରାଯାଇଥିଲା।
ପୋଲିସ ଅଧିକାରୀମାନେ କହିଛନ୍ତି ଯେ ସମ୍ରାଟଙ୍କ ବିରୋଧରେ ଅତି କମରେ ଦୁଇଟି ମାମଲା ରୁଜୁ ହୋଇଛି, ଯେଉଁଥିରେ ଏକ ହତ୍ୟା ମାମଲା ମଧ୍ୟ ରହିଛି। ପୋଲିସ ଅଭିଯୋଗ କରିଛି ଯେ ସମ୍ରାଟ “ସମ୍ରାଟ ବାହିନୀ” ନାମରେ ଜଣାଶୁଣା ଏକ ସ୍ଥାନୀୟ ଗୋଷ୍ଠୀର ନେତା ଥିଲେ, ଯାହାକୁ ସେ ନିଜେ ଗଠନ କରିଥିଲେ ଏବଂ ଅଞ୍ଚଳର ଲୋକଙ୍କୁ ଧମକ ଦେଇ ଟଙ୍କା ଆଦାୟ କରୁଥିଲେ। ସ୍ଥାନୀୟ ବାସିନ୍ଦାଙ୍କ ସୂଚନା ଦେଇ ପୋଲିସ କହିଛି ଯେ ମଣ୍ଡଳ ନିୟମିତ ଭାବରେ ଗ୍ରାମବାସୀଙ୍କୁ ଭୟଭୀତ କରି ଜୋରଜବରଦସ୍ତ ଟଙ୍କା ଆଦାୟ କରୁଥିଲେ। ସେ ଦୀର୍ଘ ଦିନ ଧରି ଭାରତରେ ରହିବା ପରେ ଏବେ ଏହି ଅଞ୍ଚଳକୁ ଫେରି ଆସିଥିବା ସୂଚନା ମିଳିଛି।
ଗାଁ ଲୋକଙ୍କ ଅନୁଯାୟୀ, ସମ୍ରାଟ ସ୍ଥାନୀୟ ବାସିନ୍ଦା ଶାହିଦୁଲ ଇସଲାମଙ୍କଠାରୁ ଚାନ୍ଦା ଦାବି କରିଥିଲେ ବୋଲି ଅଭିଯୋଗ ହୋଇଛି। ବୁଧବାର ରାତିରେ, ସେ ଏବଂ ତାଙ୍କର ଅନେକ ସହଯୋଗୀ ଟଙ୍କା ଆଦାୟ କରିବାକୁ ଶାହିଦୁଲଙ୍କ ଘରକୁ ଯାଇଥିଲେ। ପରିବାର ଲୋକେ “ଡ଼କାୟତ” ବୋଲି ଚିତ୍କାର କରିବା ପରେ, ଗାଁ ଲୋକେ ଏକାଠି ହୋଇ ସମ୍ରାଟଙ୍କୁ ଆକ୍ରମଣ କରିଥିଲେ। ଗୋଷ୍ଠୀର ଅନ୍ୟ ସଦସ୍ୟମାନେ ଖସିଯିବାରେ ସଫଳ ହୋଇଥିଲେ, କିନ୍ତୁ ସେଲିମଙ୍କୁ ଅସ୍ତ୍ରଶସ୍ତ୍ର ସହିତ ଧରାପଡ଼ି ପୋଲିସକୁ ହସ୍ତାନ୍ତର କରାଯାଇଥିଲା।
କିଛି ଦିନ ତଳେ ବାଂଲାଦେଶରେ ଭାରତ ବିରୋଧୀ ପ୍ରତିବାଦ ଭିତରେ ଜଣେ ହିନ୍ଦୁ ଯୁବକଙ୍କୁ ବୀଭତ୍ସ ଭାବେ ହତ୍ୟା କରାଯାଇଛି । ତାଙ୍କ ନାଁ ହେଲା ୩୦ ବର୍ଷୀୟ ଦୀପୁ ଚନ୍ଦ୍ର ଦାସ । ବାଂଲାଦେଶର ପୂର୍ବତନ ପ୍ରଧାନମନ୍ତ୍ରୀ ଶେଖ ହସିନାଙ୍କ ବିରୋଧୀ ଶରିଫ ଓସମାନ ହାଦିଙ୍କ ମୃତ୍ୟୁ ପରେ ଉତ୍ତେଜନା ଲାଗି ରହିଛି । ଶରିଫ ଓସମାନ ହାଡ଼ି ଜୁଲାଇରେ ହସିନା ବିରୋଧୀ ପ୍ରତିବାଦର ଅନ୍ୟତମ ପ୍ରମୁଖ ନେତା।
ପ୍ରତିବାଦ ବେଳେ ହିନ୍ଦୁଙ୍କୁ ପିଟିପିଟି ହତ୍ୟା କରାଯିବାକୁ ବାଂଲାଦେଶର ଅନ୍ତରୀଣ ମହମ୍ମଦ ୟୁନୁସଙ୍କ ସରକାର ନିନ୍ଦା କରିଛି । ୟୁନୁସଙ୍କ ସରକାର କହିଛନ୍ତି, “ନୂଆ ବାଂଲାଦେଶରେ ଏଭଳି ହିଂସାର ସ୍ଥାନ ନାହିଁ । ଏଭଳି ଘୃଣ୍ୟ କାର୍ଯ୍ୟକୁ କଦାପି ପ୍ରଶ୍ରୟ ଦିଆଯିବ ନାହିଁ ।” ମୁସଲିମ୍ ବହୁଳ ବାଂଲାଦେଶରେ ହିନ୍ଦୁ ହେଉଛନ୍ତି ସଂଖ୍ୟାଲଘୁ । ଏବେ ବାଂଲାଦେଶ ଅଶାନ୍ତ ହୋଇ ଉଠିଥିବା ବେଳେ ହିନ୍ଦୁ ଯୁବକ ଦୀପୁ ଚନ୍ଦ୍ର ଦାସଙ୍କୁ ଗୁରୁବାର ରାତିରେ ପିଟି ପିଟି ମାରି ଦେଇଛନ୍ତି ଆନ୍ଦୋଳନକାରୀ ।