By Rosalini 
ବଡ଼ ପରଦାରେ ଧମାଲ କରୁଛି ରଣବୀର କପୁର ଓ ୟଶଙ୍କ ଅଭିନୀତ ବହୁ ପ୍ରତୀକ୍ଷିତ ପୌରାଣିକ ଫିଲ୍ମ ‘ରାମାୟଣ’। ରିଲିଜ୍ର ପ୍ରଥମ ଦିନରୁ ହିଁ ସିନେମା ହଲ୍ରେ ଦର୍ଶକଙ୍କ ଭିଡ଼ ଓ ଫିଲ୍ମକୁ ନେଇ ଜବରଦସ୍ତ ଉତ୍ସାହ ଦେଖିବାକୁ ମିଳିଛି। ନୀତେଶ ତିୱାରୀଙ୍କ ନିର୍ଦ୍ଦେଶିତ ଏହି ମେଗା ବଜେଟ୍ ଫିଲ୍ମ ପ୍ରଥମ ଦିନରେ ଭାରତରେ ୬୪ କୋଟି ୮୫ ଲକ୍ଷ ଟଙ୍କାର ନେଟ୍ କଲେକ୍ସନ କରିଛି। ଏହି ଆୟ ସହ ୨୦୨୬ର ଦ୍ୱିତୀୟ ସର୍ବାଧିକ ହିନ୍ଦୀ ଓପନିଂ ଫିଲ୍ମ ଭାବେ ରେକର୍ଡ କରିଛି ‘ରାମାୟଣ’।
ଟ୍ରେଡ୍ ଟ୍ରାକିଂ ପୋର୍ଟାଲ୍ ସାକ୍ନିଲ୍କର ତଥ୍ୟ ଅନୁସାରେ, ଫିଲ୍ମଟି ରିଲିଜ୍ର ପ୍ରଥମ ଦିନରେ ଦେଶରେ ମୋଟ ୨୫ ହଜାର ୨୦୦ଟି ଶୋ’ରେ ପ୍ରଦର୍ଶିତ ହୋଇଥିଲା। ଏହି ସବୁ ଶୋ’ରୁ ଫିଲ୍ମଟି ମୋଟ ୬୪ କୋଟି ୮୫ ଲକ୍ଷ ଟଙ୍କାର ନେଟ୍ କଲେକ୍ସନ କରିଛି। ଅନ୍ୟପଟେ ଏହାର ମୋଟ ଇଣ୍ଡିଆ ଗ୍ରସ୍ କଲେକ୍ସନ ୭୭ କୋଟି ୫୦ ଲକ୍ଷ ଟଙ୍କା ରହିଛି।
ଫିଲ୍ମର ଭାଷାଭିତ୍ତିକ କଲେକ୍ସନକୁ ଦେଖିଲେ, ହିନ୍ଦୀ ଭର୍ସନ ସବୁଠାରୁ ଅଧିକ ଆୟ କରିଛି। କେବଳ ହିନ୍ଦୀ ଭାଷାରୁ ୪୭ କୋଟି ୫୦ ଲକ୍ଷ ଟଙ୍କା ଆସିଥିବା ବେଳେ କନ୍ନଡ଼ ଭର୍ସନରୁ ୭ କୋଟି ୨୫ ଲକ୍ଷ, ତେଲୁଗୁରୁ ୬ କୋଟି, ତାମିଲ୍ରୁ ୨ କୋଟି ୬୦ ଲକ୍ଷ ଏବଂ ମାଲାୟଲମ୍ ଭର୍ସନରୁ ପ୍ରାୟ ଦେଢ଼ କୋଟି ଟଙ୍କା ଆୟ ହୋଇଛି।
ପ୍ରଥମ ଦିନରେ ଏତେ ବଡ଼ ଆୟ କରିଥିଲେ ମଧ୍ୟ ଗୋଟିଏ ରେକର୍ଡ ଭାଙ୍ଗିବାରେ ବିଫଳ ହୋଇଛି ‘ରାମାୟଣ’। ୨୦୨୩ରେ ରିଲିଜ୍ ହୋଇଥିବା ପ୍ରଭାସଙ୍କ ଅଭିନୀତ ‘ଆଦିପୁରୁଷ’ ପ୍ରଥମ ଦିନରେ ସବୁ ଭାଷାକୁ ମିଶାଇ ୮୬ କୋଟି ୭୫ ଲକ୍ଷ ଟଙ୍କା ଆୟ କରିଥିଲା। ଏହି ରେକର୍ଡକୁ ପଛରେ ପକାଇବାରେ ‘ରାମାୟଣ’ ସଫଳ ହୋଇନାହିଁ।
ଅର୍ଥାତ୍, ଭଲ ଓପନିଂ ସତ୍ତ୍ୱେ ପ୍ରଥମ ଦିନର ଆୟ ଦୃଷ୍ଟିରୁ ‘ଆଦିପୁରୁଷ’ ଏବେ ବି ଆଗରେ ରହିଛି। ତେବେ ଆଗାମୀ ଦିନରେ ‘ରାମାୟଣ’ର ଆୟ କେତେ ବଢ଼ୁଛି, ତାହା ଉପରେ ଫିଲ୍ମ ଟ୍ରେଡ୍ର ନଜର ରହିଛି।
୨୦୨୬ର ବକ୍ସ ଅଫିସ୍ ଓପନିଂ ରେକର୍ଡ ତାଲିକାରେ ‘ରାମାୟଣ’ ଦ୍ୱିତୀୟ ସ୍ଥାନରେ ରହିଛି। ଏହି ବର୍ଷର ସବୁଠାରୁ ବଡ଼ ଓପନର୍ ଭାବେ ‘ଧୁରନ୍ଧର: ଦି ରିଭେଞ୍ଜ’ ରହିଛି। ଏହି ଫିଲ୍ମ ପ୍ରଥମ ଦିନରେ ୧୦୨ କୋଟି ୫୫ ଲକ୍ଷ ଟଙ୍କା ଆୟ କରିଥିଲା।
ସେହିପରି ୬୨ କୋଟି ଟଙ୍କାର ଓପନିଂ ସହ ‘ଦୃଶ୍ୟମ୍ ୩’ ତୃତୀୟ ସ୍ଥାନରେ ରହିଛି। ଏହି ତାଲିକାରେ ‘ରାମାୟଣ’ର ଦମଦାର ଆରମ୍ଭ ଫିଲ୍ମକୁ ବର୍ଷର ସବୁଠାରୁ ଚର୍ଚ୍ଚିତ ସିନେମା ମଧ୍ୟରେ ସାମିଲ କରିଛି।
ଏବେ ସମସ୍ତଙ୍କ ନଜର ଫିଲ୍ମର ଦ୍ୱିତୀୟ ଦିନ ଓ ପରବର୍ତ୍ତୀ ଦିନଗୁଡ଼ିକର ବକ୍ସ ଅଫିସ୍ କଲେକ୍ସନ ଉପରେ। ପ୍ରଥମ ଦିନର ଭଲ ଓପନିଂ ପରେ ଦର୍ଶକଙ୍କ ପ୍ରତିକ୍ରିୟା ଓ ମାଉଥ୍ ପବ୍ଲିସିଟି ଫିଲ୍ମର ଆୟ ବଢ଼ାଇବାରେ କେତେ ସହାୟକ ହେଉଛି, ତାହା ଗୁରୁତ୍ୱପୂର୍ଣ୍ଣ ହେବ।
ଅନ୍ୟପଟେ ଦୀପାବଳି ରବିବାର ପଡ଼ୁଥିବାରୁ ଲକ୍ଷ୍ମୀପୂଜା ଯୋଗୁଁ ସନ୍ଧ୍ୟା ଶୋ’ରେ ଦର୍ଶକଙ୍କ ଉପସ୍ଥିତି ପ୍ରଭାବିତ ହୋଇପାରେ। କିନ୍ତୁ ସୋମବାର ଛୁଟି ଥିବାରୁ ଏହାର ଫାଇଦା ଫିଲ୍ମକୁ ମିଳିବା ନେଇ ଆଶା କରାଯାଉଛି। ଦର୍ଶକଙ୍କ ସକାରାତ୍ମକ ପ୍ରତିକ୍ରିୟା ଜାରି ରହିଲେ ଆଗକୁ ଫିଲ୍ମର କଲେକ୍ସନ ଆହୁରି ବଢ଼ିପାରେ।
‘ରାମାୟଣ’କୁ ଦୁଇଟି ଭାଗରେ ନିର୍ମାଣ କରାଯାଉଛି। ପ୍ରଥମ ଭାଗ ପରେ ଦ୍ୱିତୀୟ ଭାଗକୁ ୨୦୨୮ ଦୀପାବଳିରେ ରିଲିଜ୍ କରିବାର ଯୋଜନା ରହିଛି। ରିପୋର୍ଟ ଅନୁସାରେ, ଏହି ଦୁଇଟି ଭାଗର ମୋଟ ନିର୍ମାଣ ବଜେଟ୍ ପ୍ରାୟ ୪ ହଜାର କୋଟି ଟଙ୍କା।
ଏତେ ବଡ଼ ବଜେଟ୍ରେ ନିର୍ମିତ ଏହି ପୌରାଣିକ ଫିଲ୍ମକୁ ନେଇ ଦର୍ଶକଙ୍କ ମଧ୍ୟରେ ଆରମ୍ଭରୁ ହିଁ ଉତ୍ସାହ ରହିଛି। ତେବେ ପ୍ରଥମ ଦିନର ଆୟ ଫିଲ୍ମ ପାଇଁ ଏକ ଦମଦାର ଆରମ୍ଭ ହୋଇଥିଲେ ମଧ୍ୟ ଆଗାମୀ ଦିନର କଲେକ୍ସନ ହିଁ ଏହାର ବକ୍ସ ଅଫିସ୍ ସଫଳତାର ପ୍ରକୃତ ଚିତ୍ର ସ୍ପଷ୍ଟ କରିବ।