By Rosalini 
ମେଗାଷ୍ଟାର୍ ଅମିତାଭ ବଚ୍ଚନଙ୍କ କାର୍ଯ୍ୟ ବିରତି ଖବର ପ୍ରଶଂସକଙ୍କ ମନରେ ଚିନ୍ତା ବଢ଼ାଇଛି। ନିଜେ ସୋସିଆଲ୍ ମିଡିଆରେ ପୋଷ୍ଟ୍ କରି କିଛି ଦିନ ପାଇଁ ବିଶ୍ରାମ ନେବାକୁ ଯାଉଥିବା ସୂଚନା ଦେଇଛନ୍ତି ବଲିଉଡ୍ର ଏହି ମହାନାୟକ। ତେବେ ଏହି ବିରତି ପଛରେ ପ୍ରକୃତ କାରଣ କ’ଣ, ସେ ସମ୍ପର୍କରେ ଅମିତାଭ ସ୍ପଷ୍ଟ କରିନାହାନ୍ତି। ଏହାକୁ ନେଇ ତାଙ୍କ ପ୍ରଶଂସକଙ୍କ ମଧ୍ୟରେ ବିଭିନ୍ନ ଚର୍ଚ୍ଚା ଆରମ୍ଭ ହୋଇଛି।
ଅମିତାଭ ବଚ୍ଚନ ନିୟମିତ ଭାବେ ନିଜ ବ୍ଲଗ୍ ଲେଖିବା ସହ ସୋସିଆଲ୍ ମିଡିଆ ଜରିଆରେ ପ୍ରଶଂସକଙ୍କ ସହ ଯୋଡ଼ି ହୋଇ ରହିଥାନ୍ତି। ବିଶେଷକରି ବିଳମ୍ବିତ ରାତିରେ ତାଙ୍କର ପୋଷ୍ଟ୍ ଯୁବପିଢ଼ିଙ୍କ ମଧ୍ୟରେ ମଧ୍ୟ ବେଶ୍ ଲୋକପ୍ରିୟ।
ଗତ ୨୧ ତାରିଖରେ ନିଜର ଏକ୍ସ୍ ହ୍ୟାଣ୍ଡଲ୍ରେ ପୋଷ୍ଟ୍ କରି ଅମିତାଭ ଜଣାଇଥିଲେ ଯେ ତାଙ୍କୁ କିଛି ଦିନ ବିଶ୍ରାମ ନେବାକୁ ପରାମର୍ଶ ଦିଆଯାଇଛି। ଏହି କାରଣରୁ ସେ ଲେଖିପାରୁନାହାନ୍ତି ବୋଲି କହିବା ସହ ପ୍ରଶଂସକଙ୍କୁ କ୍ଷମା ମାଗିଥିଲେ।
ତାଙ୍କର ଏହି ପୋଷ୍ଟ୍ ପରେ ବିଗ୍ ବିଙ୍କ ସ୍ୱାସ୍ଥ୍ୟକୁ ନେଇ ପ୍ରଶଂସକଙ୍କ ମନରେ ପ୍ରଶ୍ନ ଉଠିଛି।
ଅମିତାଭଙ୍କ ବିଶ୍ରାମ ଘୋଷଣାକୁ ନେଇ ଚର୍ଚ୍ଚା ମଧ୍ୟରେ ତାଙ୍କର ପୂର୍ବ ଆଣ୍ଠୁ ଆଘାତ କଥା ମଧ୍ୟ ସାମ୍ନାକୁ ଆସିଛି। ଏହା ପୂର୍ବରୁ ‘କୌନ୍ ବନେଗା କରୋଡ୍ପତି ୧୮’ର ଏକ ଏପିସୋଡ୍ରେ ସେ ନିଜ ଆଣ୍ଠୁରେ ଆଘାତ ଲାଗିଥିବା କଥା କହିଥିଲେ।
ସୁଟିଂ ସମୟରେ ଖସିପଡ଼ିବା ଯୋଗୁଁ ତାଙ୍କ ଆଣ୍ଠୁରେ ଆଘାତ ଲାଗିଥିଲା। ଏହାପରେ ଏକ ଏପିସୋଡ୍ର ଆରମ୍ଭରେ ସେ ଠିଆ ହୋଇ କାର୍ଯ୍ୟକ୍ରମ ପରିଚାଳନା କରିବା ପରିବର୍ତ୍ତେ ବସି ରହିଥିଲେ। ତେବେ ସେତେବେଳେ ଆଘାତ ଗୁରୁତର ନୁହେଁ ବୋଲି ଅମିତାଭ ପ୍ରକାଶ କରିଥିଲେ।
ଅମିତାଭ ବଚ୍ଚନଙ୍କ କାର୍ଯ୍ୟ ବିରତି ପଛରେ ଆଣ୍ଠୁ ଆଘାତ ରହିଛି କି ଅନ୍ୟ କୌଣସି କାରଣ, ତାହା ସ୍ପଷ୍ଟ ହୋଇନାହିଁ। ସେ ନିଜେ ମଧ୍ୟ ବିଶ୍ରାମ ନେବାର ନିର୍ଦ୍ଦିଷ୍ଟ କାରଣ ପ୍ରକାଶ କରିନାହାନ୍ତି।
ନିଜ ବୟସ ଓ ବ୍ୟସ୍ତ କାର୍ଯ୍ୟସୂଚୀ ସତ୍ତ୍ୱେ ଅମିତାଭ ଦୀର୍ଘ ସମୟ ଧରି ଚଳଚ୍ଚିତ୍ର ଓ ଟେଲିଭିଜନ୍ ଜଗତରେ ସକ୍ରିୟ ରହିଆସିଛନ୍ତି। ତେଣୁ ତାଙ୍କର ଏହି ବିରତି ଘୋଷଣା ପ୍ରଶଂସକଙ୍କ ମଧ୍ୟରେ ଉତ୍କଣ୍ଠା ସୃଷ୍ଟି କରିଛି। ବର୍ତ୍ତମାନ ତାଙ୍କ ବିଶ୍ରାମର ପ୍ରକୃତ କାରଣ ସମ୍ପର୍କରେ ଅଧିକ ସ୍ପଷ୍ଟତାକୁ ଅପେକ୍ଷା କରାଯାଇଛି।