ଦଶହରାରେ ରାବଣ ପୋଡ଼ି ଉତ୍ସବରେ ଯୋଗଦେବେ ମୋଦୀ, ଦିଲ୍ଲୀରେ ୨୫୦୦ ସୁରକ୍ଷାକର୍ମୀ ମୁତୟନ

ନୂଆଦିଲ୍ଲୀ: ଦଶହରା ଉତ୍ସବକୁ ନେଇ ଦିଲ୍ଲୀରେ ଜୋରଦାର ପ୍ରସ୍ତୁତି ଚାଲିଛି। ପୂର୍ବ ଦିଲ୍ଲୀର ଆଇପି ଏକ୍ସଟେନ୍ସନ୍‌ସ୍ଥିତ ଉତ୍ସବ ମଇଦାନରେ ମଙ୍ଗଳବାର ସନ୍ଧ୍ୟାରେ ଅନୁଷ୍ଠିତ ହେବାକୁ ଥିବା ଦଶହରା ଉତ୍ସବ ଓ ରାବଣ ପୋଡ଼ି କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଯୋଗଦେବାର କାର୍ଯ୍ୟକ୍ରମ ରହିଛି। ତାଙ୍କ ଗସ୍ତକୁ ଦୃଷ୍ଟିରେ ରଖି କାର୍ଯ୍ୟକ୍ରମସ୍ଥଳରେ କଡ଼ା ସୁରକ୍ଷା ବ୍ୟବସ୍ଥା କରାଯାଇଛି।

ପ୍ରଧାନମନ୍ତ୍ରୀଙ୍କ ଗସ୍ତ ଓ କାର୍ଯ୍ୟକ୍ରମରେ ଯୋଗଦେବାକୁ ଥିବା ହଜାର ହଜାର ଲୋକଙ୍କ ସୁରକ୍ଷା ପାଇଁ ପ୍ରାୟ ୨,୫୦୦ ସୁରକ୍ଷାକର୍ମୀଙ୍କୁ ନିୟୋଜିତ କରାଯାଇଛି। ଏଥିରେ ସ୍ପେଶାଲ ପ୍ରୋଟେକ୍ସନ୍ ଗ୍ରୁପ୍‌ (ଏସପିଜି), କେନ୍ଦ୍ରୀୟ ଅର୍ଦ୍ଧସାମରିକ ବାହିନୀ, ଦିଲ୍ଲୀ ପୁଲିସ ଏବଂ ସ୍ୱାଟ୍ କମାଣ୍ଡୋ ସାମିଲ ଅଛନ୍ତି।

ସୁରକ୍ଷା ବ୍ୟବସ୍ଥାକୁ ତିନୋଟି ସ୍ତରରେ ବିଭକ୍ତ କରାଯାଇଛି। ସବୁଠାରୁ ଭିତର ସ୍ତରର ସୁରକ୍ଷା ଦାୟିତ୍ୱ ଏସପିଜି ହାତରେ ରହିବ। ମଧ୍ୟମ ସ୍ତରରେ ଦିଲ୍ଲୀ ପୁଲିସର ପ୍ରଧାନମନ୍ତ୍ରୀ ସୁରକ୍ଷା ୱିଙ୍ଗ୍ ଏବଂ ବାହାର ସ୍ତରରେ ସ୍ଥାନୀୟ ପୁଲିସ ମୁତୟନ ରହିବେ। ଏହା ସହିତ ଡ୍ରୋନ୍ ଜରିଆରେ ଆକାଶମାର୍ଗରୁ କାର୍ଯ୍ୟକ୍ରମସ୍ଥଳ ଉପରେ ନଜର ରଖାଯିବ।

କାର୍ଯ୍ୟକ୍ରମରେ ପ୍ରାୟ ୧୦ ହଜାର ଦର୍ଶକ ଯୋଗଦେବାର ଆକଳନ କରାଯାଇଛି। ଏଥିପାଇଁ କେବଳ ବୈଧ ପ୍ରବେଶ ପାସ୍ ଥିବା ବ୍ୟକ୍ତିଙ୍କୁ ଯାଞ୍ଚ ପରେ ଭିତରକୁ ଅନୁମତି ଦିଆଯିବ। ପ୍ରଧାନମନ୍ତ୍ରୀ ସନ୍ଧ୍ୟା ପ୍ରାୟ ୬ଟା ୩୦ରେ ପହଞ୍ଚିବା ପୂର୍ବରୁ ସୁରକ୍ଷା ଯାଞ୍ଚକୁ ଅଧିକ କଡ଼ା କରାଯାଇଛି।

ସମ୍ଭାବ୍ୟ ବିପଦକୁ ଏଡ଼ାଇବା ପାଇଁ ବୋମା ନିଷ୍କ୍ରିୟକାରୀ ଦଳ, ସ୍ନିଫର୍ ଡଗ୍, ମେଟାଲ୍ ଡିଟେକ୍ଟର ଏବଂ ଛାତ ଉପରେ ସ୍ନାଇପର ମୁତୟନ କରାଯାଇଛି। ସାଧାରଣ ଲୋକ ଓ ଶ୍ରଦ୍ଧାଳୁଙ୍କ ସୁରକ୍ଷାକୁ ମଧ୍ୟ ପ୍ରାଥମିକତା ଦିଆଯାଉଛି।

ପ୍ରଧାନମନ୍ତ୍ରୀଙ୍କ ଗସ୍ତ ଏବଂ ଦଶହରା ଉତ୍ସବକୁ ଆଖିଆଗରେ ରଖି ଦିଲ୍ଲୀ ଟ୍ରାଫିକ୍ ପୁଲିସ ପକ୍ଷରୁ ମଧ୍ୟ ବିଶେଷ ବ୍ୟବସ୍ଥା କରାଯାଇଛି। ସନ୍ଧ୍ୟା ୫ଟାରୁ ରାତି ୮ଟା ପର୍ଯ୍ୟନ୍ତ ଜାତୀୟ ରାଜପଥ-୨୪, ବିକାଶ ମାର୍ଗ, ପଟପଡ଼ଗଞ୍ଜ ଏବଂ ଗାଜିପୁର ଅଞ୍ଚଳରେ ଟ୍ରାଫିକ୍ କଟକଣା ଓ ରୁଟ୍ ପରିବର୍ତ୍ତନ ଲାଗୁ ହେବ।

ଯାତାୟାତକୁ ସୁଗମ ରଖିବା ପାଇଁ ୩୦୦ରୁ ଅଧିକ ଟ୍ରାଫିକ୍ ପୁଲିସ କର୍ମଚାରୀ ଓ ବରିଷ୍ଠ ଅଧିକାରୀ ନିୟୋଜିତ ରହିବେ। ଏହି ସମୟରେ ଉକ୍ତ ରାସ୍ତା ଦେଇ ଯାତାୟାତ କରିବାକୁ ଥିବା ଲୋକଙ୍କୁ ଟ୍ରାଫିକ୍ ନିର୍ଦ୍ଦେଶାବଳୀ ମାନିବା ସହ ବିକଳ୍ପ ରାସ୍ତା ବ୍ୟବହାର କରିବାକୁ ପରାମର୍ଶ ଦିଆଯାଇଛି।

ଦଶହରା ଅବସରରେ ଆୟୋଜିତ ରାବଣ ପୋଡ଼ି କାର୍ଯ୍ୟକ୍ରମରେ ବହୁ ସଂଖ୍ୟକ ଲୋକଙ୍କ ସମାଗମ ହେବାର ଆଶା ରହିଛି। ତେଣୁ ଭିଡ଼ ନିୟନ୍ତ୍ରଣ, ଯାନବାହନ ଚଳାଚଳ ଏବଂ ପ୍ରଧାନମନ୍ତ୍ରୀଙ୍କ ସୁରକ୍ଷା ପାଇଁ ପ୍ରଶାସନ ପକ୍ଷରୁ ସମନ୍ୱିତ ବ୍ୟବସ୍ଥା କରାଯାଇଛି।

କଡ଼ା ସୁରକ୍ଷା ଓ ଟ୍ରାଫିକ୍ କଟକଣା ମଧ୍ୟରେ କାର୍ଯ୍ୟକ୍ରମକୁ ଶାନ୍ତିପୂର୍ଣ୍ଣ ଭାବେ ସମ୍ପନ୍ନ କରିବା ଉପରେ ପୁଲିସ ଓ ପ୍ରଶାସନର ଗୁରୁତ୍ୱ ରହିଛି।