By Rosalini 
ସୁପରଷ୍ଟାର ରଜନୀକାନ୍ତଙ୍କ ଫିଲ୍ମକୁ ନେଇ ପ୍ରଶଂସକଙ୍କ ଉତ୍ସାହ ସବୁବେଳେ ରହିଥାଏ ଭିନ୍ନ ସ୍ତରରେ। ତାଙ୍କ ବହୁପ୍ରତୀକ୍ଷିତ ଫିଲ୍ମ ‘ଜେଲର-୨’କୁ ନେଇ ମଧ୍ୟ ଫ୍ୟାନ୍ସଙ୍କ ମଧ୍ୟରେ ଜୋରଦାର ଉତ୍ସାହ ଦେଖିବାକୁ ମିଳିଛି। ଫିଲ୍ମର ରିଲିଜ୍କୁ ନେଇ ବିଭିନ୍ନ ସ୍ଥାନରେ ପ୍ରଶଂସକମାନେ ଉତ୍ସବ ପାଳନ କରୁଥିବା ଦୃଶ୍ୟ ସାମ୍ନାକୁ ଆସିଛି। କେଉଁଠି ଥିଏଟର ଭିତରେ ନାଚଗୀତର ମାହୋଲ ତ ଆଉ କେଉଁଠି ତାଳି ଓ ହ୍ୱିସିଲ୍ରେ କମ୍ପି ଉଠୁଛି ସିନେମା ହଲ୍।
କେରଳର ପଲକ୍କଡ୍ସ୍ଥିତ ପ୍ରିୟା ଥିଏଟରରେ ରଜନୀକାନ୍ତଙ୍କ ନାଁ ଓ ଫଟୋ ପରଦାରେ ଦେଖାଯିବା ମାତ୍ରେ ଦର୍ଶକଙ୍କ ଉତ୍ସାହ ଚରମ ସୀମାରେ ପହଞ୍ଚିଥିଲା। ତାଳି ଓ ହ୍ୱିସିଲ୍ରେ ପୂରା ଥିଏଟର ଗୁଞ୍ଜରି ଉଠିଥିଲା। ଫିଲ୍ମକୁ ଦେଖିବା ପାଇଁ ହଲ୍ରେ ଦର୍ଶକଙ୍କ ଭିଡ଼ ଜମିଥିବା ବେଳେ ଥଲାଇଭାଙ୍କ ପ୍ରତି ପ୍ରଶଂସକଙ୍କ ଭଲପାଇବା ପୁଣିଥରେ ଚର୍ଚ୍ଚାକୁ ଆସିଛି।
ସୋସିଆଲ୍ ମିଡିଆରେ ମଧ୍ୟ ଫ୍ୟାନ୍ସଙ୍କ ସେଲିବ୍ରେସନ୍ର ବିଭିନ୍ନ ଭିଡିଓ ସେୟାର ହେଉଛି। ଜଣେ ପ୍ରଶଂସକ ରଜନୀକାନ୍ତଙ୍କୁ ଅନନ୍ୟ ସୁପରଷ୍ଟାର ବୋଲି କହି ତାଙ୍କ ସ୍ଥାନ ଅନ୍ୟ କେହି ନେଇପାରିବେ ନାହିଁ ବୋଲି ନିଜର ଭଲପାଇବା ପ୍ରକାଶ କରିଛନ୍ତି।
ଏହି ଉତ୍ସବରେ ରଜନୀକାନ୍ତଙ୍କ ଝିଅ ସୌନ୍ଦର୍ଯ୍ୟା ମଧ୍ୟ ସାମିଲ ହୋଇଥିବା ଦୃଶ୍ୟ ସାମ୍ନାକୁ ଆସିଛି। ସେ ବିଭିନ୍ନ ଗୀତରେ ନାଚି ଫିଲ୍ମ ଜଗତରେ ରଜନୀକାନ୍ତଙ୍କ ୫୦ ବର୍ଷର ଯାତ୍ରାକୁ ନେଇ ଉତ୍ସବ ପାଳନ କରୁଥିବା ଦେଖାଯାଇଛି। ତାଙ୍କର ଏହି ଉତ୍ସବମୁଖର ମୁହୂର୍ତ୍ତ ପ୍ରଶଂସକଙ୍କ ଆକର୍ଷଣ ସାଜିଛି।
ବେଙ୍ଗାଲୁରୁରେ ଫିଲ୍ମ ରିଲିଜ୍କୁ ନେଇ ଥିଏଟର ବାହାରେ ପ୍ରଶଂସକମାନେ ଆତସବାଜି ଫୁଟାଇ ଉତ୍ସବ ପାଳନ କରିଥିବା ସୂଚନା ମିଳିଛି। ମହୀଶୂରରେ ମଧ୍ୟ ରଜନୀକାନ୍ତଙ୍କ ଫ୍ୟାନ୍ସଙ୍କ ଉତ୍ସାହ ଦେଖିବାକୁ ମିଳିଛି। ଏପରିକି ଆମେରିକାରେ ରହୁଥିବା ପ୍ରଶଂସକମାନେ ମଧ୍ୟ ଫିଲ୍ମର ରିଲିଜ୍କୁ ନେଇ ସେଲିବ୍ରେସନ୍ କରୁଥିବା ଦୃଶ୍ୟ ସାମ୍ନାକୁ ଆସିଛି।
ଏହି ସବୁ ଦୃଶ୍ୟ ରଜନୀକାନ୍ତଙ୍କ ଲୋକପ୍ରିୟତା କେବଳ ଦକ୍ଷିଣ ଭାରତରେ ସୀମିତ ନୁହେଁ, ବରଂ ଦେଶ ବାହାରେ ମଧ୍ୟ ତାଙ୍କର ବଡ଼ ପ୍ରଶଂସକ ଗୋଷ୍ଠୀ ରହିଥିବା କଥାକୁ ଆଲୋକିତ କରୁଛି।
‘ଜେଲର-୨’କୁ ନେଇ ଦର୍ଶକଙ୍କ ମଧ୍ୟରେ ମିଶ୍ର ପ୍ରତିକ୍ରିୟା ରହିଥିବା ଦାବି କରାଯାଉଛି। କିଛି ଦର୍ଶକ ଫିଲ୍ମର କାହାଣୀ ଓ ପ୍ରଥମ ଭାଗକୁ ପସନ୍ଦ କରୁଥିବା ବେଳେ ଅନ୍ୟ କିଛି ଦର୍ଶକ ଦ୍ୱିତୀୟ ଭାଗକୁ ନେଇ ନିଜ ମତ ରଖୁଛନ୍ତି। ତେବେ ଫିଲ୍ମର ପ୍ରକୃତ ସଫଳତା ଜାଣିବା ପାଇଁ ଆଗାମୀ ଦିନର ବକ୍ସ ଅଫିସ୍ ଆୟ ଓ ଦର୍ଶକଙ୍କ ପ୍ରତିକ୍ରିୟା ଉପରେ ନଜର ରହିବ।
ଦିଆଯାଇଥିବା ରିପୋର୍ଟ ଅନୁସାରେ, ସକାଳ ୯ଟା ସୁଦ୍ଧା ଫିଲ୍ମର ଆୟ ୧୩ କୋଟି ଟଙ୍କା ହୋଇଥିବା ଦାବି କରାଯାଇଛି। ଦିନ ଶେଷ ସୁଦ୍ଧା ଏହାର ଆୟ ୧୨୦ରୁ ୧୪୫ କୋଟି ଟଙ୍କା ମଧ୍ୟରେ ପହଞ୍ଚିପାରେ ବୋଲି ଆକଳନ କରାଯାଇଛି। ତେବେ ଏହି ଆକଳନ ଏବଂ ପ୍ରକୃତ ବକ୍ସ ଅଫିସ୍ ଆୟ ମଧ୍ୟରେ ପାର୍ଥକ୍ୟ ରହିପାରେ।
ରଜନୀକାନ୍ତଙ୍କ ଷ୍ଟାରଡମ୍, ଫ୍ୟାନ୍ସଙ୍କ ଜୋରଦାର ସେଲିବ୍ରେସନ୍ ଏବଂ ଫିଲ୍ମକୁ ନେଇ ଚର୍ଚ୍ଚା ଭିତରେ ‘ଜେଲର-୨’ର ବକ୍ସ ଅଫିସ୍ ପ୍ରଦର୍ଶନ ଉପରେ ଏବେ ସମସ୍ତଙ୍କ ନଜର।