By Rosalini 
ହାଇଦ୍ରାବାଦ ବିମାନବନ୍ଦରରେ ବିଦେଶୀ ମୁଦ୍ରା ଚାଲାଣ ଉଦ୍ୟମର ପର୍ଦ୍ଦାଫାସ। ଟ୍ରଲି ବ୍ୟାଗ୍ରେ ପୋଷାକ ଭିତରେ ଲୁଚାଇ ରଖାଯାଇଥିଲା ବିପୁଳ ପରିମାଣର ଆମେରିକୀୟ ଡଲାର ଓ ଅନ୍ୟ ବିଦେଶୀ ମୁଦ୍ରା। ଗୁପ୍ତ ସୂଚନା ଆଧାରରେ ଚଢ଼ାଉ କରି ଡିରେକ୍ଟୋରେଟ୍ ଅଫ୍ ରେଭେନ୍ୟୁ ଇଣ୍ଟେଲିଜେନ୍ସ (DRI) ହାଇଦ୍ରାବାଦ ଜୋନାଲ ୟୁନିଟ୍ ପ୍ରାୟ ୧ କୋଟି ୫୬ ଲକ୍ଷ ଟଙ୍କା ମୂଲ୍ୟର ବିଦେଶୀ ମୁଦ୍ରା ଜବତ କରିଛି। ଏହି ଘଟଣାରେ ଜଣେ ପୁରୁଷ ଓ ଜଣେ ମହିଳା ଯାତ୍ରୀଙ୍କୁ ଗିରଫ କରାଯାଇଛି।
ସୂଚନା ଅନୁସାରେ, ହାଇଦ୍ରାବାଦର ରାଜୀବ ଗାନ୍ଧୀ ଅନ୍ତର୍ଜାତୀୟ ବିମାନବନ୍ଦର (RGIA)ରେ ବିଦେଶୀ ମୁଦ୍ରା ଚାଲାଣ ହେଉଥିବା ନେଇ DRIକୁ ଗୁପ୍ତ ସୂଚନା ମିଳିଥିଲା। ଏହା ପରେ ଅଧିକାରୀମାନେ ଯାଞ୍ଚ ଆରମ୍ଭ କରିଥିଲେ। କୁଆଲାଲମ୍ପୁର ଯାଉଥିବା ଏୟାରଏସିଆ ବିମାନରେ ଯାତ୍ରା କରିବାକୁ ଥିବା ଜଣେ ପୁରୁଷ ଯାତ୍ରୀଙ୍କ ଟ୍ରଲି ବ୍ୟାଗ୍ରୁ ବିଦେଶୀ ମୁଦ୍ରା ମିଳିଥିଲା।
ଯାଞ୍ଚ ସମୟରେ ପୁରୁଷ ଯାତ୍ରୀଙ୍କ ବ୍ୟାଗ୍ରୁ ୬୬ ହଜାର ୬୦୦ ଆମେରିକୀୟ ଡଲାର, ୩ ହଜାର ୭୭୩ ମାଲେସିଆ ରିଙ୍ଗିଟ୍ ଏବଂ ୨ ସିଙ୍ଗାପୁର ଡଲାର ଜବତ କରାଯାଇଥିଲା। ଏହି ବିଦେଶୀ ମୁଦ୍ରାର ମୋଟ ମୂଲ୍ୟ ପ୍ରାୟ ୬୩ ଲକ୍ଷ ୬୨ ହଜାର ଟଙ୍କା ବୋଲି ଆକଳନ କରାଯାଇଛି।
ଏହା ପରେ ସେହି ବିମାନରେ ଯାତ୍ରା କରୁଥିବା ଜଣେ ମହିଳା ଯାତ୍ରୀଙ୍କ ବ୍ୟାଗ୍ରେ ମଧ୍ୟ ଯାଞ୍ଚ କରାଯାଇଥିଲା। ତାଙ୍କ ବ୍ୟାଗ୍ରୁ ୯୭ ହଜାର ୬୦୦ ଆମେରିକୀୟ ଡଲାର ଜବତ ହୋଇଥିଲା। ଏହାର ମୂଲ୍ୟ ପ୍ରାୟ ୯୧ ଲକ୍ଷ ୯୪ ହଜାର ଟଙ୍କା ବୋଲି ଜଣାପଡ଼ିଛି।
ଉଭୟ ଯାତ୍ରୀଙ୍କ ବ୍ୟାଗ୍ରେ ଥିବା ପୋଷାକ ମଧ୍ୟରେ କଳା ପଲିଥିନରେ ଏହି ବିଦେଶୀ ମୁଦ୍ରାକୁ ଲୁଚାଇ ରଖାଯାଇଥିଲା। ଏଭଳି ଭାବେ ମୁଦ୍ରା ପରିବହନ କରାଯାଉଥିବା ଘଟଣା ଯାଞ୍ଚ ବେଳେ ସାମ୍ନାକୁ ଆସିଥିଲା।
ଜବତ ହୋଇଥିବା ବିଦେଶୀ ମୁଦ୍ରାର ବୈଧ ଉତ୍ସ ଓ ପରିବହନ ସମ୍ପର୍କରେ ଆବଶ୍ୟକ ଦସ୍ତାବିଜ ଦେଖାଇପାରିନଥିବାରୁ ଉଭୟ ଯାତ୍ରୀଙ୍କୁ ଗିରଫ କରାଯାଇଥିବା ସୂଚନା ମିଳିଛି। ସେମାନଙ୍କଠାରୁ ବିଦେଶୀ ମୁଦ୍ରା ସହ ବ୍ୟାଗ୍ଗୁଡ଼ିକୁ ମଧ୍ୟ ଜବତ କରାଯାଇଛି।
ଏତେ ପରିମାଣର ବିଦେଶୀ ମୁଦ୍ରା କେଉଁଠାରୁ ଆସିଥିଲା ଏବଂ ଏହା ପଛରେ ଆଉ କାହାର ସମ୍ପୃକ୍ତି ରହିଛି କି ନାହିଁ, ସେନେଇ ତଦନ୍ତ ଜାରି ରହିଛି। ଏହି ଘଟଣାରେ DRIର ପରବର୍ତ୍ତୀ ତଦନ୍ତ ଓ ଅଧିକାରିକ ସୂଚନା ଉପରେ ନଜର ରହିଛି।