By Rosalini 
ପକେଟ୍ରେ ଟଙ୍କା ନଥିଲା। ହେଲେ ଲୁଟେରାଙ୍କ ଟାର୍ଗେଟ୍ରୁ ବର୍ତ୍ତିପାରିଲେନି ଯୁବକ। ଟଙ୍କା ନମିଳିବାରୁ ଜୋର୍ ଜବରଦସ୍ତି ମୋବାଇଲ୍ ଆପ୍ରୁ ଲୋନ୍ କରାଇଲେ ଅଭିଯୁକ୍ତ। ଲୋନ୍ ଟଙ୍କା ମଞ୍ଜୁର ହେବା ପରେ ATMରୁ ଉଠାଇ ନେଇଗଲେ ୯ ହଜାର ୫୦୦ ଟଙ୍କା। ଚେନ୍ନାଇର ପଲ୍ଲିକରଣାଇ ଅଞ୍ଚଳରୁ ସାମ୍ନାକୁ ଆସିଛି ଏଭଳି ଏକ ଅଜବ ଲୁଟ୍ର ଘଟଣା।
ରିପୋର୍ଟ ଅନୁସାରେ, ୨୧ ବର୍ଷୀୟ ଅଜୟଙ୍କୁ ଚାରି ଜଣ ଯୁବକ ଏକ ଅଟୋରେ ଅପହରଣ କରି ନେଇଥିଲେ। ଏହାପରେ ଅଭିଯୁକ୍ତମାନେ ତାଙ୍କୁ ଟଙ୍କା ମାଗିଥିଲେ। କିନ୍ତୁ ନିଜ ପାଖରେ ଟଙ୍କା ନଥିବା ଅଜୟ କହିବାରୁ ଅଭିଯୁକ୍ତମାନେ ରାଗିଯାଇଥିଲେ। ତାଙ୍କୁ ମାଡ଼ ମାରିବା ସହ ମୋବାଇଲ୍ ଆପ୍ ଜରିଆରେ ଲୋନ୍ ପାଇଁ ଆବେଦନ କରିବାକୁ ବାଧ୍ୟ କରିଥିଲେ।
ମୋବାଇଲ୍ ଆପ୍ରେ ଲୋନ୍ ମଞ୍ଜୁର ହେବା ପରେ ଅଭିଯୁକ୍ତମାନେ ଅଜୟଙ୍କୁ ATMକୁ ନେଇଥିଲେ। ସେଠାରୁ ୯,୫୦୦ ଟଙ୍କା ଉଠାଇ ନେଇ ଘଟଣାସ୍ଥଳରୁ ଫେରାର ହୋଇଯାଇଥିଲେ। ଏହି ଘଟଣାରେ ଅଜୟ ଲୁଟ୍ର ଶିକାର ହେବା ସହ ତାଙ୍କ ନାମରେ ଋଣର ବୋଝ ମଧ୍ୟ ପଡ଼ିବାର ଆଶଙ୍କା ରହିଛି।
ଘଟଣା ସମ୍ପର୍କରେ ତଦନ୍ତ ପରେ ପୁଲିସ ଚାରି ଜଣ ଅଭିଯୁକ୍ତଙ୍କୁ ଗିରଫ କରିଛି। ଅପହରଣରେ ବ୍ୟବହୃତ ଅଟୋକୁ ମଧ୍ୟ ଜବତ କରାଯାଇଛି। ପୁଲିସ ସୂଚନା ଅନୁଯାୟୀ, ଗିରଫ ଅଭିଯୁକ୍ତମାନଙ୍କୁ ନ୍ୟାୟିକ ହାଜତକୁ ପଠାଯାଇଛି।
ଏହି ଘଟଣା ଡିଜିଟାଲ୍ ଲୋନ୍ର ଦୁରୁପଯୋଗକୁ ନେଇ ଚିନ୍ତା ବଢ଼ାଇଛି। ଲୁଟେରାମାନେ ଟଙ୍କା ନପାଇବାରୁ ପୀଡ଼ିତଙ୍କୁ ଋଣ ନେବାକୁ ବାଧ୍ୟ କରିଥିବା ଅଭିଯୋଗ ହୋଇଛି। ଏପରି ଘଟଣାରେ ଅଭିଯୁକ୍ତମାନେ ଟଙ୍କା ନେଇ ଚାଲିଯାଉଥିବା ବେଳେ ଋଣ ପରିଶୋଧର ଦାୟିତ୍ୱ ପୀଡ଼ିତଙ୍କ ଉପରେ ପଡ଼ିପାରେ।
ତେଣୁ କେହି ଯଦି ଧମକ ଦେଇ ମୋବାଇଲ୍ ଆପ୍ରୁ ଲୋନ୍ ନେବାକୁ କିମ୍ବା ATMରୁ ଟଙ୍କା ଉଠାଇବାକୁ ବାଧ୍ୟ କରନ୍ତି, ତେବେ ନିଜ ସୁରକ୍ଷାକୁ ପ୍ରାଥମିକତା ଦେଇ ତୁରନ୍ତ ପୁଲିସର ସହାୟତା ନିଅନ୍ତୁ। ଏହା ସହ ଲୋନ୍ ଆପ୍ର ତଥ୍ୟ, ଟଙ୍କା ଟ୍ରାଞ୍ଜାକ୍ସନ୍ ଓ ଅନ୍ୟ ପ୍ରମାଣ ସୁରକ୍ଷିତ ରଖିବା ମଧ୍ୟ ଗୁରୁତ୍ୱପୂର୍ଣ୍ଣ।