By Rosalini 
ଓଡ଼ିଶାର ବିଭିନ୍ନ କଲେଜ ଓ ବିଶ୍ୱବିଦ୍ୟାଳୟରୁ ଆସିବାରେ ଲାଗିଛି ଛାତ୍ର ସଂସଦ ନିର୍ବାଚନର ଫଳାଫଳ। ଅନେକ ଶିକ୍ଷାନୁଷ୍ଠାନରେ ABVP ପ୍ରାର୍ଥୀ ବିଜୟୀ ହୋଇଥିବା ବେଳେ କିଛି କଲେଜରେ BCJD ପ୍ରାର୍ଥୀଙ୍କୁ ମିଳିଛି ସଫଳତା। ବିଶେଷକରି ଭୁବନେଶ୍ୱରର ବିଜେବି ଓ ରାଜଧାନୀ କଲେଜ ସହ ସମ୍ବଲପୁରର GM ବିଶ୍ୱବିଦ୍ୟାଳୟର ଫଳାଫଳକୁ ନେଇ ଚର୍ଚ୍ଚା ବଢ଼ିଛି।
ଭୁବନେଶ୍ୱରର ପ୍ରମୁଖ ଶିକ୍ଷାନୁଷ୍ଠାନ ବିଜେବି କଲେଜ ଓ ରାଜଧାନୀ କଲେଜରେ ସଭାପତି ପଦ ହାତେଇଛନ୍ତି ABVP ପ୍ରାର୍ଥୀ। ବିଜେବି କଲେଜରେ ଆର୍ଯ୍ୟନ ମହାପାତ୍ର ବିଜୟୀ ହୋଇଥିବା ବେଳେ ରାଜଧାନୀ କଲେଜରେ ଅବିନାଶ ପାଢ଼ୀ ସଭାପତି ପଦରେ ବାଜି ମାରିଛନ୍ତି। ଏହି ବିଜୟକୁ ନେଇ ସମ୍ପୃକ୍ତ କଲେଜଗୁଡ଼ିକରେ ଛାତ୍ର ରାଜନୀତି ସରଗରମ ହୋଇଛି।
ସମ୍ବଲପୁରର GM ବିଶ୍ୱବିଦ୍ୟାଳୟରେ ABVPର ଦବଦବା ଦେଖିବାକୁ ମିଳିଛି। ଏଠାରେ ସଭାପତି ପଦରେ ସ୍ୱାଧୀନ ଆଚାର୍ଯ୍ୟ ଏବଂ ସମ୍ପାଦକ ପଦରେ ନିଖିଲ ଅଗ୍ରୱାଲ ବିଜୟୀ ହୋଇଛନ୍ତି। ଦିଆଯାଇଥିବା ସୂଚନା ଅନୁସାରେ, ବିଶ୍ୱବିଦ୍ୟାଳୟର ସମସ୍ତ ୧୩ଟି ପଦବୀରେ ABVP ପ୍ରତିନିଧି ବିଜୟ ହାସଲ କରିଛନ୍ତି। ଏହି ଫଳାଫଳ ଛାତ୍ର ରାଜନୀତିରେ ABVPର ସଫଳତାକୁ ନେଇ ଚର୍ଚ୍ଚାକୁ ଆହୁରି ବଢ଼ାଇଛି।
କେବଳ ଭୁବନେଶ୍ୱର ଓ ସମ୍ବଲପୁର ନୁହେଁ, ରାଜ୍ୟର ଅନ୍ୟ ଅଞ୍ଚଳର କଲେଜଗୁଡ଼ିକରୁ ମଧ୍ୟ ନିର୍ବାଚନୀ ଫଳାଫଳ ସାମ୍ନାକୁ ଆସୁଛି। କେନ୍ଦ୍ରାପଡ଼ା ଜିଲ୍ଲାର ମାର୍ଶାଘାଇସ୍ଥିତ ଅନ୍ତେଇ ବିଜୁ ପଟ୍ଟନାୟକ କଲେଜ, ଅନୁଗୁଳ ମହିଳା କଲେଜ, କଟକ କଲେଜ, କିଶୋରନଗର ଡିଗ୍ରୀ କଲେଜ ଏବଂ ଧାମନଗର ମହାବିଦ୍ୟାଳୟରେ ABVP ପ୍ରାର୍ଥୀ ବିଜୟୀ ହୋଇଥିବା ସୂଚନା ମିଳିଛି।
ଅନ୍ୟପଟେ, ରାଜ୍ୟର କିଛି ଶିକ୍ଷାନୁଷ୍ଠାନରେ BCJD ପ୍ରାର୍ଥୀ ମଧ୍ୟ ବିଜୟ ହାସଲ କରିଛନ୍ତି। ନୟାଗଡ଼ ଜିଲ୍ଲା ଦଶପଲ୍ଲାର ବୃନ୍ଦାବନ ସୁବୁଦ୍ଧି ଡିଗ୍ରୀ ମହାବିଦ୍ୟାଳୟରେ ସଭାପତି, ଉପସଭାପତି ଓ ସାଧାରଣ ସମ୍ପାଦକ ପଦରେ BCJD ପ୍ରାର୍ଥୀ ବିଜୟୀ ହୋଇଛନ୍ତି। ସେହିପରି ଝାରସୁଗୁଡ଼ାର PKSS କଲେଜରେ ସଭାପତି ଓ ସାଧାରଣ ସମ୍ପାଦକ ପଦ BCJD ହାତକୁ ଯାଇଛି।
ବିଭିନ୍ନ କଲେଜରୁ ଫଳାଫଳ ଆସିବା ସହ ଛାତ୍ର ସଂସଦ ନିର୍ବାଚନକୁ ନେଇ ଉତ୍ସାହ ବଢ଼ିଛି। କେଉଁଠି ABVPର ବିଜୟ ଦେଖିବାକୁ ମିଳିଛି ତ କେଉଁଠି BCJD ପ୍ରାର୍ଥୀ ବାଜି ମାରିଛନ୍ତି। ଅବଶିଷ୍ଟ ଫଳାଫଳ ସ୍ପଷ୍ଟ ହେବା ପରେ ବିଭିନ୍ନ କଲେଜରେ ଛାତ୍ର ସଂଗଠନଗୁଡ଼ିକର ସଫଳତାର ସମ୍ପୂର୍ଣ୍ଣ ଚିତ୍ର ସାମ୍ନାକୁ ଆସିବ।