By Rosalini 
ଭାରତୀୟ ସିନେମାର ଜଣେ ଦକ୍ଷ ଓ ପ୍ରଭାବଶାଳୀ ଅଭିନେତା ନାନା ପାଟେକରଙ୍କ ୭୫ ବର୍ଷ ବୟସରେ ପରଲୋକ ହୋଇଛି। ଗୁରୁବାର ଭୋରେ ଗୋଆର ଡୋନା ପାଉଲାସ୍ଥିତ ବାସଭବନରେ ସେ ଅସୁସ୍ଥ ହୋଇପଡ଼ିଥିଲେ। ପରେ ତାଙ୍କୁ ମଣିପାଲ ହସ୍ପିଟାଲକୁ ନିଆଯାଇଥିଲା। ଡାକ୍ତରୀ ଟିମ୍ ପ୍ରାୟ ୪୫ ମିନିଟ୍ ଧରି CPR ଦେଇ ତାଙ୍କୁ ବଞ୍ଚାଇବାକୁ ଚେଷ୍ଟା କରିଥିଲେ, କିନ୍ତୁ ସଫଳ ହୋଇନଥିଲେ। ତାଙ୍କୁ ସକାଳ ପ୍ରାୟ ୫ଟା୨୦ରେ ମୃତ ଘୋଷଣା କରାଯାଇଥିଲା।
ନାନା ପାଟେକରଙ୍କ ଶେଷ ସମୟକୁ ନେଇ ଡାକ୍ତର ଶେଖର ସାଲକର ଗଣମାଧ୍ୟମକୁ କିଛି ତଥ୍ୟ ଦେଇଛନ୍ତି। ତାଙ୍କ ଅନୁଯାୟୀ, ରାତି ପ୍ରାୟ ୨ଟା୩୦ରେ ନାନା ଜଣେ ବନ୍ଧୁଙ୍କୁ ମେସେଜ କରି ଅସୁସ୍ଥ ଅନୁଭବ କରୁଥିବା ଏବଂ ଶରୀରର ବାମ ପାର୍ଶ୍ୱରେ ଯନ୍ତ୍ରଣା ଥିବା କଥା ଜଣାଇଥିଲେ। ରାତି ହୋଇଥିବାରୁ ବନ୍ଧୁ ମେସେଜଟି ତୁରନ୍ତ ଦେଖିପାରିନଥିଲେ।
ପ୍ରାୟ ୪ଟା ସମୟରେ ବନ୍ଧୁ ତାଙ୍କ ଘରେ ପହଞ୍ଚିଥିଲେ। ସେତେବେଳେ ନାନା ପାଟେକର ନିଃଶ୍ୱାସ ନେବାରେ କଷ୍ଟ ପାଉଥିବା ଏବଂ ଝାଳରେ ଭିଜିଥିବା ଡାକ୍ତର ସାଲକର କହିଛନ୍ତି। ପରେ କେୟାରଟେକରଙ୍କ ସହାୟତାରେ ଆମ୍ବୁଲାନ୍ସ ଡକାଯାଇଥିଲା। ଘରେ ହିଁ CPR ଆରମ୍ଭ କରାଯାଇ ତାଙ୍କୁ ହସ୍ପିଟାଲକୁ ନିଆଯାଇଥିଲା।
ମଣିପାଲ ହସ୍ପିଟାଲରେ ଡାକ୍ତରମାନେ ପ୍ରାୟ ୪୫ ମିନିଟ୍ ଧରି ତାଙ୍କୁ ପୁନର୍ଜୀବିତ କରିବାକୁ ଚେଷ୍ଟା କରିଥିଲେ। ତେବେ ସେତେବେଳକୁ ତାଙ୍କୁ ବଞ୍ଚାଇବା ସମ୍ଭବ ହୋଇନଥିଲା। ଡାକ୍ତରମାନେ ସକାଳ ପ୍ରାୟ ୫ଟା୨୦ରେ ମୃତ ଘୋଷଣା କରିଥିଲେ।
ମୃତ୍ୟୁ ପରେ ମେଡିକୋ-ଲିଗାଲ୍ କେସ୍ ପଞ୍ଜୀକରଣ କରାଯାଇଥିବା ଡାକ୍ତର ଶେଖର ସାଲକର କହିଛନ୍ତି। ମୃତଦେହକୁ ଗୋଆ ମେଡିକାଲ କଲେଜକୁ ପୋଷ୍ଟମର୍ଟମ ପାଇଁ ପଠାଯାଇଛି। ତେଣୁ ଅନ୍ତିମ ମେଡିକାଲ ରିପୋର୍ଟ ଆସିବା ପରେ ମୃତ୍ୟୁର ସଠିକ୍ କାରଣ ସମ୍ପର୍କରେ ଅଧିକ ସ୍ପଷ୍ଟତା ମିଳିବ।
ନାନା ପାଟେକରଙ୍କ ପୁଅ ମଲ୍ହାର ପାଟେକର ତାଙ୍କ ପିତାଙ୍କ ମୃତ୍ୟୁ ଖବରକୁ ନିଶ୍ଚିତ କରିଥିବା ରିପୋର୍ଟ ରହିଛି। ମଲ୍ହାର ସେତେବେଳେ ପୁଣେରେ ଥିବା ଏବଂ ଗୋଆ ଯାଉଥିବା କହିଥିଲେ।
ନାନା ପାଟେକରଙ୍କ ଶେଷକୃତ୍ୟ ପୁଣେରେ ରାଜ୍ୟ ସମ୍ମାନ ସହ କରାଯିବ ବୋଲି ମହାରାଷ୍ଟ୍ର ସରକାର ପକ୍ଷରୁ ଘୋଷଣା ହୋଇଛି। ପୁଣେର ତାଙ୍କ ଫାର୍ମହାଉସରେ ଶେଷକୃତ୍ୟ ହେବ ଏବଂ ଅପରାହ୍ନ ୫ଟାରେ ଅନ୍ତିମ ସଂସ୍କାର ହେବାର ସୂଚନା ରହିଛି।
ନାନା ପାଟେକର ହିନ୍ଦୀ ଓ ମରାଠୀ ସିନେମାରେ ଦୀର୍ଘ ଦିନ ଧରି ନିଜର ଦମଦାର ଅଭିନୟରେ ଦର୍ଶକଙ୍କ ମନ ଜିତିଥିଲେ। ‘ପରିନ୍ଦା’, ‘କ୍ରାନ୍ତିବୀର’, ‘ଅଗ୍ନି ସାକ୍ଷୀ’, ‘ଖାମୋଶୀ’, ‘ୱେଲକମ୍’ ଏବଂ ‘ନଟସମ୍ରାଟ’ ଭଳି ଫିଲ୍ମରେ ତାଙ୍କ ଅଭିନୟ ବେଶ ଚର୍ଚ୍ଚିତ ହୋଇଥିଲା। ସେ ତିନିଥର ଜାତୀୟ ଚଳଚ୍ଚିତ୍ର ପୁରସ୍କାର ପାଇଥିବା ସହ ୨୦୧୩ରେ ପଦ୍ମଶ୍ରୀରେ ସମ୍ମାନିତ ହୋଇଥିଲେ।
ନାନା ପାଟେକରଙ୍କ ଅଚାନକ ବିୟୋଗରେ ଭାରତୀୟ ସିନେମା ଜଗତରେ ଶୋକର ଛାୟା ଖେଳିଯାଇଛି। ତାଙ୍କ ଅଭିନୟ ଓ ସିନେମା ପ୍ରତି ଅବଦାନ ତାଙ୍କୁ ଦର୍ଶକଙ୍କ ମନରେ ସବୁବେଳେ ଜୀବନ୍ତ ରଖିବ।