By Rosalini 
ଗୋଆରେ ହୃଦ୍ଘାତରେ ପରଲୋକ, ୪୫ ମିନିଟ୍ CPR ପରେ ବି ବଞ୍ଚାଇ ହେଲାନି; ବଲିଉଡ୍ରେ ଶୋକର ଛାୟା
ମୁମ୍ବାଇ: ବଲିଉଡ୍ର ବର୍ଷୀୟାନ ଅଭିନେତା ନାନା ପାଟେକରଙ୍କ ଦେହାନ୍ତ ହୋଇଛି। ୭୫ ବର୍ଷ ବୟସରେ ସେ ଆଜି ଗୋଆରେ ଶେଷ ନିଃଶ୍ୱାସ ତ୍ୟାଗ କରିଛନ୍ତି। ଗୋଆର ଡୋନା ପାଉଲାସ୍ଥିତ ବାସଭବନରେ ସେ ଅସୁସ୍ଥ ହୋଇପଡ଼ିବା ପରେ ମଣିପାଲ ହସ୍ପିଟାଲକୁ ନିଆଯାଇଥିଲା। ଡାକ୍ତରମାନେ ପ୍ରାୟ ୪୫ ମିନିଟ୍ ଧରି CPR ଦେଇ ତାଙ୍କୁ ବଞ୍ଚାଇବାକୁ ଚେଷ୍ଟା କରିଥିଲେ। ତେବେ ତାଙ୍କୁ ଆଉ ବଞ୍ଚାଇ ହୋଇନଥିଲା। ସକାଳ ପ୍ରାୟ ୫ଟା ୨୦ ମିନିଟ୍ରେ ତାଙ୍କୁ ମୃତ ଘୋଷଣା କରାଯାଇଥିଲା।
ନାନା ପାଟେକରଙ୍କ ହଠାତ୍ ମୃତ୍ୟୁ ଖବରରେ ହିନ୍ଦୀ ଓ ମରାଠୀ ଫିଲ୍ମ ଇଣ୍ଡଷ୍ଟ୍ରିରେ ଶୋକର ଛାୟା ଖେଳିଯାଇଛି। ମଣିପାଲ ହସ୍ପିଟାଲର ଡାକ୍ତର ଶେଖର ସାଲକରଙ୍କ ସୂଚନା ଅନୁସାରେ, ଡାକ୍ତରୀ ଟିମ୍ ତାଙ୍କୁ ପୁନର୍ଜୀବିତ କରିବା ପାଇଁ ପ୍ରାୟ ୪୫ ମିନିଟ୍ CPR କରିଥିଲେ। ମାତ୍ର ଚିକିତ୍ସାରେ କୌଣସି ସୁଫଳ ମିଳିନଥିଲା। ମୃତ୍ୟୁ ମାମଲାରେ ମେଡିକୋ-ଲିଗାଲ୍ କେସ୍ ପଞ୍ଜିକୃତ ହୋଇଥିବା ଏବଂ ପୋଷ୍ଟମର୍ଟମ୍ କରାଯିବାର ସୂଚନା ମଧ୍ୟ ମିଳିଛି।
୧ ଜାନୁଆରୀ ୧୯୫୧ରେ ମହାରାଷ୍ଟ୍ରରେ ବିଶ୍ୱନାଥ ପାଟେକର ଭାବେ ଜନ୍ମ ନେଇଥିବା ନାନା ପାଟେକର ଭାରତୀୟ ସିନେମାର ଜଣେ ପ୍ରଭାବଶାଳୀ ଅଭିନେତା ଭାବେ ନିଜର ସ୍ୱତନ୍ତ୍ର ପରିଚୟ ଗଢ଼ିଥିଲେ। ଥିଏଟରରୁ ନିଜର ଅଭିନୟ ଯାତ୍ରା ଆରମ୍ଭ କରି ସେ ୧୯୭୮ର ‘ଗମନ’ ଜରିଆରେ ଫିଲ୍ମ ଜଗତରେ ପାଦ ରଖିଥିଲେ।
ପରବର୍ତ୍ତୀ ସମୟରେ ‘ଅଙ୍କୁଶ’, ‘ପ୍ରତିଘାତ’, ‘ସଲାମ ବମ୍ବେ’, ‘ପରିନ୍ଦା’, ‘କ୍ରାନ୍ତିବୀର’, ‘ଅଗ୍ନି ସାକ୍ଷୀ’, ‘ଖାମୋଶି: ଦି ମ୍ୟୁଜିକାଲ୍’, ‘ପ୍ରହାର: ଦି ଫାଇନାଲ୍ ଆଟାକ୍’, ‘ଅବ ତକ୍ ଛପ୍ପନ’, ‘ଅପହରଣ’ ଓ ‘ରାଜନୀତି’ ଭଳି ଫିଲ୍ମରେ ତାଙ୍କ ଦମଦାର ଅଭିନୟ ଦର୍ଶକଙ୍କୁ ମନ୍ତ୍ରମୁଗ୍ଧ କରିଥିଲା।
ଗମ୍ଭୀର ଓ ଶକ୍ତିଶାଳୀ ଚରିତ୍ର ସହିତ କମେଡି ଭୂମିକାରେ ମଧ୍ୟ ନାନା ପାଟେକର ନିଜର ଛାପ ଛାଡ଼ିଥିଲେ। ବିଶେଷକରି ‘ୱେଲକମ୍’ ଓ ‘ୱେଲକମ୍ ବ୍ୟାକ୍’ରେ ଉଦୟ ଶେଟ୍ଟୀ ଭୂମିକା ତାଙ୍କୁ ନୂଆ ପିଢ଼ିର ଦର୍ଶକଙ୍କ ମଧ୍ୟରେ ଅତ୍ୟନ୍ତ ଲୋକପ୍ରିୟ କରିଥିଲା।
ତାଙ୍କ ଅଭିନୟର ବିଶେଷତା ଥିଲା ତୀକ୍ଷ୍ଣ ସଂଳାପ ପ୍ରଦାନ, ଭାବପ୍ରବଣ ଅଭିବ୍ୟକ୍ତି ଓ ଚରିତ୍ରକୁ ନିଜସ୍ୱ ଶୈଳୀରେ ଜୀବନ୍ତ କରିବାର କ୍ଷମତା।
ନାନା ପାଟେକରଙ୍କ ଅଭିନୟ ଜୀବନରେ ଅନେକ ବଡ଼ ସମ୍ମାନ ଯୋଡ଼ି ହୋଇଥିଲା। ସେ ତିନିଟି ଜାତୀୟ ଚଳଚ୍ଚିତ୍ର ପୁରସ୍କାରରେ ସମ୍ମାନିତ ହୋଇଥିଲେ। ଭାରତୀୟ ସିନେମା ଓ କଳା କ୍ଷେତ୍ରରେ ତାଙ୍କ ଅବଦାନ ପାଇଁ ୨୦୧୩ରେ ତାଙ୍କୁ ପଦ୍ମଶ୍ରୀରେ ସମ୍ମାନିତ କରାଯାଇଥିଲା।
ନାନା ପାଟେକର କେବଳ ଜଣେ ଅଭିନେତା ନଥିଲେ। ସେ ନିର୍ଦ୍ଦେଶକ ଓ ଲେଖକ ଭାବେ ମଧ୍ୟ କାମ କରିଥିଲେ। ‘ପ୍ରହାର: ଦି ଫାଇନାଲ୍ ଆଟାକ୍’ ଭଳି ଫିଲ୍ମରେ ତାଙ୍କର ସେନା ଓ ଦେଶପ୍ରେମ ସହ ଜଡ଼ିତ ରୁଚିର ପ୍ରଭାବ ଦେଖିବାକୁ ମିଳିଥିଲା।
ସେ ଟେରିଟୋରିଆଲ୍ ଆର୍ମି ସହ ମଧ୍ୟ ଜଡ଼ିତ ଥିଲେ। ଭାରତୀୟ ସିନେମାରେ ନିଜର ଦମଦାର ଅଭିନୟ ସହିତ ସାମାଜିକ କାର୍ଯ୍ୟରେ ମଧ୍ୟ ସେ ଜଡ଼ିତ ରହିଥିଲେ।
ନାନା ପାଟେକର ନିଜ କ୍ୟାରିୟରର ଶେଷ ପର୍ଯ୍ୟାୟରେ ମଧ୍ୟ ଅଭିନୟ ଜାରି ରଖିଥିଲେ। ୨୦୨୬ରେ ତାଙ୍କୁ ‘ଓ ରୋମିଓ’ରେ ଦେଖିବାକୁ ମିଳିଥିଲା। ଏହି ଫିଲ୍ମରେ ଶାହିଦ କପୁର ଓ ତୃପ୍ତି ଡିମରିଙ୍କ ସହ ସେ ଅଭିନୟ କରିଥିଲେ। ଏହା ସହିତ ଅନିଲ କପୁରଙ୍କ ‘ସୁବେଦାର’ରେ ମଧ୍ୟ ସେ ଅଭିନୟ କରିଥିଲେ।
ଏହା ପୂର୍ବରୁ ‘ହାଉସଫୁଲ୍-୫’, ‘ବନବାସ’ ଭଳି ଫିଲ୍ମରେ ମଧ୍ୟ ତାଙ୍କୁ ଦେଖିଥିଲେ ଦର୍ଶକ। ୨୦୨୬ରେ ପ୍ରକାଶ ଝାଙ୍କ ରାଜନୈତିକ ଡ୍ରାମା ଧାରାବାହିକ ‘ସଂକଳ୍ପ’ ଜରିଆରେ ସେ OTT ଜଗତରେ ମଧ୍ୟ ନିଜର ଉପସ୍ଥିତି ଜଣାଇଥିଲେ।
ନାନା ପାଟେକରଙ୍କ ହଠାତ୍ ଦେହାନ୍ତ ଭାରତୀୟ ସିନେମା ପାଇଁ ଏକ ବଡ଼ କ୍ଷତି। ତାଙ୍କ ଅଭିନୟର ତୀବ୍ରତା, ସଂଳାପ କହିବାର ଅନନ୍ୟ ଶୈଳୀ ଓ ଅସାଧାରଣ ପରଦା ଉପସ୍ଥିତି ପାଇଁ ସେ ସବୁବେଳେ ଦର୍ଶକଙ୍କ ମନରେ ଜୀବିତ ରହିବେ।
୭୫ ବର୍ଷ ବୟସରେ ନାନା ପାଟେକରଙ୍କ ଅଭିନୟ ଯାତ୍ରାରେ ପୂର୍ଣ୍ଣଛେଦ ପଡ଼ିଥିଲେ ମଧ୍ୟ, ଭାରତୀୟ ସିନେମାରେ ତାଙ୍କ ଅବଦାନ ଓ ଅଭିନୟର ଛାପ ସବୁବେଳେ ଅମର ରହିବ।