By Rosalini 
ଏସିଆନ୍ ଗେମ୍ସ ୨୦୨୬ ପୁରୁଷ ହକିରେ ରୋମାଞ୍ଚକର ବିଜୟ ସହ ଫାଇନାଲ୍ରେ ପହଞ୍ଚିଛି ଭାରତ। ଜାପାନର କାକାମିଗାହାରାରେ ଖେଳାଯାଇଥିବା ସେମିଫାଇନାଲ୍ରେ ପାକିସ୍ତାନକୁ ୪-୩ ଗୋଲ୍ରେ ହରାଇଛି ଡିଫେଣ୍ଡିଂ ଚାମ୍ପିୟନ୍ ଭାରତ। ଶେଷ ମୁହୂର୍ତ୍ତରେ ଅଭିଷେକଙ୍କ ଗୋଲ୍ ଭାରତକୁ ଫାଇନାଲ୍ ଟିକେଟ୍ ଦେଇଛି।
ମ୍ୟାଚ୍ର ଆରମ୍ଭରୁ ଭାରତ ଆକ୍ରମଣାତ୍ମକ ଖେଳ ଦେଖାଇଥିଲା। ଅଧିନାୟକ ହରମନପ୍ରୀତ ସିଂହ ୫ମ ଓ ୧୩ତମ ମିନିଟ୍ରେ ଦୁଇଟି ପେନାଲ୍ଟି କର୍ଣ୍ଣରରୁ ଗୋଲ୍ କରି ଭାରତକୁ ୨-୦ରେ ଆଗୁଆ କରିଥିଲେ।
୨୩ତମ ମିନିଟ୍ରେ ସୁଖଜିତ ସିଂହ ଭାରତ ପାଇଁ ତୃତୀୟ ଗୋଲ୍ କରିଥିଲେ। ଫଳରେ ଭାରତ ୩-୦ରେ ଦୃଢ଼ ସ୍ଥିତିରେ ପହଞ୍ଚିଥିଲା।
ତେବେ ମ୍ୟାଚ୍ର ଦ୍ୱିତୀୟାର୍ଦ୍ଧରେ ଚିତ୍ର ବଦଳିଯାଇଥିଲା। ୩୦ତମ ମିନିଟ୍ରେ ଅବୁ ମହମୁଦ ପାକିସ୍ତାନ ପାଇଁ ପ୍ରଥମ ଗୋଲ୍ କରିଥିଲେ।
ଏହାପରେ ୪୫ତମ ମିନିଟ୍ରେ ହନାନ ଶାହିଦ ଏବଂ ୪୯ତମ ମିନିଟ୍ରେ ୱାହିଦ ଆଶ୍ରାଫ ରାନା ଗୋଲ୍ କରି ସ୍କୋର୍କୁ ୩-୩ କରିଦେଇଥିଲେ। ଏଥିସହ ପାକିସ୍ତାନ ଭାରତର ୩-୦ ଅଗ୍ରଣୀକୁ ସମାନ ସ୍ଥିତିକୁ ଆଣିଥିଲା।
ମ୍ୟାଚ୍ ଶୁଟ୍ଆଉଟ୍କୁ ଯିବା ଭଳି ଲାଗୁଥିବା ବେଳେ ଶେଷ ମୁହୂର୍ତ୍ତରେ ଭାରତ ପାଇଁ ନିର୍ଣ୍ଣାୟକ ଗୋଲ୍ କରିଥିଲେ ଅଭିଷେକ।
ମ୍ୟାଚ୍ ଶେଷ ହେବାକୁ ୪୯.୨ ସେକେଣ୍ଡ ବାକି ଥିବା ବେଳେ ଅଭିଷେକଙ୍କ ଶଟ୍ ପାକିସ୍ତାନ ଖେଳାଳିଙ୍କ ଷ୍ଟିକ୍ରେ ବାଜି ଡିଫ୍ଲେକ୍ଟ ହୋଇ ଗୋଲ୍ ହୋଇଥିଲା। ଏହି ଗୋଲ୍ ସହ ଭାରତ ୪-୩ରେ ବିଜୟୀ ହୋଇ ଫାଇନାଲ୍ରେ ପ୍ରବେଶ କରିଛି।
ଏହି ବିଜୟ ସହ ଭାରତ ଏସିଆନ୍ ଗେମ୍ସ ହକିର ଗୋଲ୍ଡ ମେଡାଲ୍ ମ୍ୟାଚ୍ରେ ପହଞ୍ଚିଛି। ଫାଇନାଲ୍ରେ ଭାରତ ମାଲେସିଆ ଓ ଦକ୍ଷିଣ କୋରିଆ ମଧ୍ୟରୁ ସେମିଫାଇନାଲ୍ର ବିଜେତାକୁ ଭେଟିବ। ଗୋଲ୍ଡ ମେଡାଲ୍ ମ୍ୟାଚ୍ ଅକ୍ଟୋବର ୩ରେ ଖେଳାଯିବ।