ବିଜୁଳି ବିଲ୍ ସହ ଯୋଡ଼ି ହେବ କି ଟ୍ରାଫିକ୍ ଚାଲାଣ? ବକେୟା ଇ-ଚାଲାଣ ଆଦାୟ ପାଇଁ ସୁପ୍ରିମକୋର୍ଟଙ୍କ ବଡ଼ ପ୍ରସ୍ତାବ

ନୂଆଦିଲ୍ଲୀ: ଟ୍ରାଫିକ୍ ନିୟମ ଉଲ୍ଲଂଘନ କରି ଚାଲାଣ କାଟିଥିଲେ, କିନ୍ତୁ ଦୀର୍ଘଦିନ ଧରି ତାହା ପଇଠ କରୁନାହାନ୍ତି କି? ତେବେ ଆଗାମୀ ଦିନରେ ବକେୟା ଟ୍ରାଫିକ୍ ଚାଲାଣକୁ ବିଜୁଳି ବିଲ୍ ସହ ଯୋଡ଼ି ଆଦାୟ କରାଯିବ କି? ଏହି ପ୍ରଶ୍ନ ଏବେ ଚର୍ଚ୍ଚାରେ ରହିଛି।

ଦେଶରେ ବକେୟା ଥିବା ଟ୍ରାଫିକ୍ ଇ-ଚାଲାଣ ଆଦାୟକୁ ନେଇ ଶୁଣାଣି ସମୟରେ ସୁପ୍ରିମକୋର୍ଟ ଏକାଧିକ ବିକଳ୍ପ ବ୍ୟବସ୍ଥା ଉପରେ ବିଚାର କରିବାକୁ ସୂଚନା ଦେଇଛନ୍ତି। ଏଥିମଧ୍ୟରେ ବକେୟା ଚାଲାଣକୁ ବିଜୁଳି ବିଲ୍ ସହ ଯୋଡ଼ି ଆଦାୟ କରିବାର ଧାରଣା ମଧ୍ୟ ରହିଛି।

ଶୁଣାଣି ସମୟରେ କୋର୍ଟଙ୍କୁ ଜଣାଯାଇଥିଲା ଯେ ପ୍ରାୟ ୪୫ ହଜାର କୋଟି ଟଙ୍କାର ଇ-ଚାଲାଣ ଜାରି ହୋଇଥିବାବେଳେ ପ୍ରାୟ ୨୫ ହଜାର କୋଟି ଟଙ୍କା ଆଦାୟ ହୋଇଛି। ଅର୍ଥାତ୍ ପ୍ରାୟ ୨୦ ହଜାର କୋଟି ଟଙ୍କାର ଚାଲାଣ ଏବେ ବି ଆଦାୟ ହେବା ବାକି ରହିଛି।

କୋର୍ଟଙ୍କ ମତରେ, କେବଳ ଇ-ଚାଲାଣ କାଟିଦେଲେ ହେବ ନାହିଁ, ବରଂ ବକେୟା ଜରିମାନା କିପରି ଆଦାୟ ହେବ, ସେଥିପାଇଁ ମଧ୍ୟ ପ୍ରଭାବଶାଳୀ ବ୍ୟବସ୍ଥା ଆବଶ୍ୟକ।

ବକେୟା ଚାଲାଣ ଆଦାୟ ପାଇଁ ସୁପ୍ରିମକୋର୍ଟ ବିଜୁଳି ବିଲ୍ ସହ ଏହାକୁ ଯୋଡ଼ିବାର ସମ୍ଭାବନା ଉପରେ ବିଚାର କରିବାକୁ କହିଛନ୍ତି। ତେବେ ଏହା ଏବେଠାରୁ ଲାଗୁ ହୋଇଥିବା କୌଣସି ନିୟମ ନୁହେଁ। ଏହା ହେଉଛି ବକେୟା ଚାଲାଣ ଆଦାୟ ପାଇଁ ଏକ ପ୍ରସ୍ତାବିତ ବିକଳ୍ପ। ଏହାକୁ କିପରି କାର୍ଯ୍ୟକାରୀ କରାଯିବ ଓ କେଉଁ ସଂସ୍ଥା ମାଧ୍ୟମରେ ଆଦାୟ ହେବ, ସେନେଇ ପରବର୍ତ୍ତୀ ସ୍ତରରେ ନିଷ୍ପତ୍ତି ଆବଶ୍ୟକ।

ବକେୟା ଚାଲାଣ ଥିବା ଗାଡ଼ିଗୁଡ଼ିକ ବିରୋଧରେ ଆହୁରି କିଛି ପଦକ୍ଷେପ ନେବାର ପ୍ରସ୍ତାବ ମଧ୍ୟ ଆସିଛି। ଏଥିରେ ଗାଡ଼ିର ରେଜିଷ୍ଟ୍ରେସନ୍ ନବୀକରଣ, ମାଲିକାନା ପରିବର୍ତ୍ତନ, ଫିଟନେସ୍ ଓ PUC ସାର୍ଟିଫିକେଟ୍ ସମ୍ପର୍କିତ ପ୍ରକ୍ରିୟା ରୋକିବା ଭଳି ବ୍ୟବସ୍ଥା ଉପରେ ମଧ୍ୟ ବିଚାର ହୋଇଛି। ବକେୟା ଚାଲାଣ ଥିବା ଗାଡ଼ିକୁ ଟ୍ରାନ୍ସପୋର୍ଟ ପୋର୍ଟାଲରେ ବ୍ଲାକଲିଷ୍ଟ କରିବା ଏବଂ ରାସ୍ତାରେ ରାଣ୍ଡମ୍ ଚେକିଂ କରିବା ନେଇ ମଧ୍ୟ ଆଲୋଚନା ହୋଇଛି।

ଏହାକୁ ନେଇ ଏବେ ଲୋକଙ୍କ ମନରେ ବିଭିନ୍ନ ପ୍ରଶ୍ନ ଉଠୁଛି—ଟ୍ରାଫିକ୍ ଚାଲାଣ ବକେୟା ରହିଲେ କ’ଣ ସତରେ ବିଜୁଳି ବିଲ୍‌ରେ ଅତିରିକ୍ତ ଟଙ୍କା ଯୋଡ଼ାଯିବ? କିମ୍ବା ଅନ୍ୟ କୌଣସି ଉପାୟରେ ବକେୟା ଜରିମାନା ଆଦାୟ କରାଯିବ?

ବର୍ତ୍ତମାନ ସ୍ଥିତିରେ ବିଜୁଳି ବିଲ୍‌ରେ ଟ୍ରାଫିକ୍ ଚାଲାଣ ଯୋଡ଼ିବା କୌଣସି ଲାଗୁ ହୋଇଥିବା ନିୟମ ନୁହେଁ। ବକେୟା ଚାଲାଣ ଆଦାୟ ପାଇଁ ସୁପ୍ରିମକୋର୍ଟ ଏକାଧିକ ବିକଳ୍ପ ଉପରେ ବିଚାର କରିବାକୁ କହିଛନ୍ତି। ଆଗାମୀ ଦିନରେ ସରକାର ଓ ସମ୍ପୃକ୍ତ ବିଭାଗ କେଉଁ ବ୍ୟବସ୍ଥା ଗ୍ରହଣ କରୁଛନ୍ତି, ତାହା ଉପରେ ନଜର ରହିବ।