ଅଶ୍ଳୀଳ କଣ୍ଟେଣ୍ଟ ପୋଷ୍ଟ ବିରୋଧରେ କେନ୍ଦ୍ର ସରକାରଙ୍କ ଆକ୍ସନ

ସୋସିଆଲ ମିଡିଆ ପ୍ଲାଟଫର୍ମ ‘X’କୁ ଏକ କଡ଼ା ନୋଟିସ୍‌ ଜାରି କରିଛନ୍ତି କେନ୍ଦ୍ର ସରକାର । ସୋସିଆଲ ମିଡିଆ ପ୍ଲାଟଫର୍ମ ‘X’ ଏହାର Grok AI ରୁ ଅଶ୍ଳୀଳ ବିଷୟବସ୍ତୁ ହଟାଇବାକୁ ନିର୍ଦ୍ଦେଶ ଦେଇଛନ୍ତି । ସରକାର ଏହା ମଧ୍ୟ ନିର୍ଦ୍ଦେଶ ଦେଇଛନ୍ତି ଯେ ଏହି ମାମଲାରେ ନିଆଯାଇଥିବା ଯେକୌଣସି କାର୍ଯ୍ୟାନୁଷ୍ଠାନ କିମ୍ବା ସମୀକ୍ଷାର ରିପୋର୍ଟ ୭୨ ଘଣ୍ଟା ମଧ୍ୟରେ କେନ୍ଦ୍ର ସରକାରଙ୍କୁ ଦେବାକୁ କହିଛନ୍ତି ।

ଗତ କିଛି ଦିନ ମଧ୍ୟରେ, ସୋସିଆଲ ମିଡିଆ ପ୍ଲାଟଫର୍ମ X ର ଜେନେରେଟିଭ୍ AI ଚାଟବଟ୍ Grok ର ଅଧିକରୁ ଅଧିକ ଅପବ୍ୟବହାର କରାଯାଉଛି । ୟୁଜର୍ସମାନେ ଏହାକୁ ଅଶ୍ଳୀଳ ବିଷୟବସ୍ତୁ ସୃଷ୍ଟି କରିବା ପାଇଁ ବ୍ୟବହାର କରୁଛନ୍ତି । ଏହି ବଢ଼ୁଥିବା ଧାରା କେନ୍ଦ୍ର ସରକାରଙ୍କ ଚିନ୍ତା ବଢାଇ ଦେଇଛି । ଯାହାଫଳରେ ଭାରତର ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା ମନ୍ତ୍ରଣାଳୟ (IT ମନ୍ତ୍ରଣାଳୟ) କଡ଼ା କାର୍ଯ୍ୟାନୁଷ୍ଠାନ ନେଇ ‘X’ କୁ ତୁରନ୍ତ ଏହାର Grok AI ପ୍ରଯୁକ୍ତିବିଦ୍ୟା ସମୀକ୍ଷା କରିବାକୁ ନିର୍ଦ୍ଦେଶ ଦେଇଛି ।

ବାସ୍ତବରେ ‘X’ ୟୁଜର୍ସମାନେ ଫଟୋ ପୋଷ୍ଟ କରି ମହିଳାଙ୍କ ପୋଷାକ କାଢ଼ି ଅଧିକ ଉତ୍ତେଜକ ଭାବେ ପ୍ରଦର୍ଶନ କରିବାକୁ ପ୍ରମ୍ପ୍ଟ ଦେଉଥିଲେ । ଆଉ ଗ୍ରୋକ୍ ପ୍ରାୟତଃ ଅନୁମତି ବିନା ମହିଳାଙ୍କ ଅଶ୍ଳୀଳ ଫଟୋ ଦେଇଥାଏ । ଯାହା ପ୍ଲାଟଫର୍ମର ନିଜସ୍ୱ ନୀତି ଏବଂ ଭାରତୀୟ ଆଇନକୁ ଉଲ୍ଲଂଘନ କରେ । ତେଣୁ କେନ୍ଦ୍ର ସରକାର ଏବେ ସୋସିଆଲ ମିଡିଆ ପ୍ଲାଟଫର୍ମ ‘X’ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିଛି । ଯଦି ‘X’ ୭୨ ଘଣ୍ଟା ମଧ୍ୟରେ କେନ୍ଦ୍ର ସରକାରଙ୍କୁ କୌଣସି ରିପୋର୍ଟ ପ୍ରଦାନ ନ କରେ ତେବେ ସେମାନେ ଆଇନଗତ କାର୍ଯ୍ୟାନୁଷ୍ଠାନର ସମ୍ମୁଖୀନ ହୋଇପାରନ୍ତି ।

୨୦୨୫ର ଶେଷ ସପ୍ତାହରେ ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା ମନ୍ତ୍ରଣାଳୟ ଏକ ନୂଆ ପରାମର୍ଶ ଜାରି କରି ସୋସିଆଲ ମିଡିଆ ପ୍ଲାଟଫର୍ମଗୁଡ଼ିକୁ ଅଶ୍ଳୀଳ, ବୟସ୍କ କିମ୍ବା ଅବୈଧ ବିଷୟବସ୍ତୁ ଅପସାରଣ କରିବା ପାଇଁ ସେମାନଙ୍କର ଦାୟିତ୍ୱକୁ “ଅଧିକ କଠୋର ଭାବରେ ପାଳନ” କରିବାକୁ ନିର୍ଦ୍ଦେଶ ଦେଇଥିଲା । ଏହା କରିବାରେ ବିଫଳ ହେଲେ କଠୋର କାର୍ଯ୍ୟାନୁଷ୍ଠାନ ହୋଇପାରେ ବୋଲି ନିର୍ଦ୍ଦେଶ ଦେଇଥିଲେ ।